‘Kisim Plang i Isi Long Karim na i No Hevi’
“Yupela kisim save long mi na aninit long tok bilong mi.”—MATYU 11:29.
SAPOS yu tuhat na yu waswas long wara i kol, o yu raun long longwe rot na bihain yu kisim gutpela slip, bai yu malolo na kisim strong gen, a? Na i wankain tu taim bikpela hevi i tekewe long yumi, o God i rausim ol sin bilong yumi. (Sindaun 25:25; Aposel 3:19) Long kain taim olsem yumi kisim nupela strong, na yumi inap wok i go moa.
2 Olgeta man i save hatwok tru na karim ol bikpela hevi ol i ken kam long Jisas, long wanem, em i tok promis long givim malolo long ol. Yumi laik tru long kisim malolo, a? Tasol bilong kisim, i gat samting yumi mas mekim na yumi mas laik long mekim. Jisas i tok: “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. . . . Na bai yupela i kisim malolo.” (Matyu 11:29) Wanem dispela plang yumi mas kisim? Olsem wanem em inap givim malolo long yumi?
Plang i Isi Long Karim
3 Jisas na ol man em i autim tok long ol, ol i stap namel long ol manmeri bilong wok gaden, na ol i save gut long plang ol man i save putim long nek bilong ol bulmakau. Plang i longpela liklik na ol i katim tupela hap daunbilo bambai em i sindaun gut long nek bilong tupela bulmakau. Plang i pasim tupela wantaim bambai ol i ken pulim hap ain bilong brukim graun, o pulim karis samting. (1 Samuel 6:7) I gat plang bilong putim long nek bilong ol man tu. Em olsem hap plang o mambu samting ol i putim long sol na karim samting long han sut na han kais bilong en. Dispela kain plang i helpim ol wokman long karim ol hevipela samting. (Jeremaia 27:2; 28:10, 13) Plang bilong nek em bilong karim hevipela samting na mekim bikpela hatwok, olsem na sampela taim Baibel i stori long en bilong makim pasin bilong putim hevi long ol man na daunim ol na bosim ol strong.—Lo 28:48; 1 King 12:4; Aposel 15:10.
4 Orait, wanem dispela plang Jisas i laik givim long ol man em i singautim ol i kam long em bilong kisim malolo? Yu tingim tok bilong em? Em i tok: “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau.” (Matyu 11:29) Man i kisim skul long wanpela man, em i disaipel bilong dispela man. Olsem na bilong kisim plang bilong Jisas, yumi mas kamap disaipel bilong em. (Filipai 4:3) Yumi mas kisim save long ol tok bilong em, tasol i no dispela samting tasol yumi mas mekim. Yumi mas mekim ol samting i stret wantaim dispela save yumi kisim—yumi mas mekim wok em i mekim, na bihainim pasin bilong em. (1 Korin 11:1; 1 Pita 2:21) Long laik bilong yumi yet yumi mas daun long em, na aninit long ol man em i givim namba long ol long bosim yumi. (Efesus 5:21; Hibru 13:17) Yumi mas kamap Kristen; yumi mas dediket, na kisim baptais, na mekim olgeta wok em man i dediket long God i mas mekim. Em dispela plang yumi mas kisim bambai yumi inap kam long Jisas na kisim malolo. Yu laik kisim dispela plang?—Jon 8:31, 32.
5 Tasol man i putim plang long nek, olsem wanem em inap kisim malolo? Ating narapela tok i pait long narapela tok, a? Nogat. Long wanem, Jisas i tok plang em i laik putim long nek bilong yumi em “i isi long karim.” Dispela tok i makim samting i gutpela, na em i mekim gut long yumi, na yumi laikim. (Matyu 11:30; Luk 5:39; Rom 2:4; 1 Pita 2:3) Jisas em i man bilong mekim wok kamda, na ating em i bin wokim planti samting bilong brukim graun na ol plang bilong putim long nek bilong bulmakau. Em i save long pasin bilong wokim plang i sindaun gut long nek na i isi long karim na i helpim bulmakau long wok strong. Ating em i save pasim hap laplap samting long hap bilong plang i sindaun long nek. Ol i save wokim planti plang olsem bambai plang i no ken skrapim skin. Na olsem tasol dispela plang Jisas i tokim yumi long kisim em “i isi long karim.” Tru, taim yumi kamap disaipel bilong em, i gat sampela wok yumi mas mekim, tasol dispela i no givim hevi long yumi; em i givim malolo long yumi. Ol lo bilong Papa Jehova tu i no givim hevi long yumi.—Lo 30:11; 1 Jon 5:3.
6 Na i gat narapela samting tu i mekim na plang bilong Jisas em “i isi long karim.” Taim Jisas i tok yumi mas “kisim plang,” dispela inap makim wanpela bilong tupela samting. Sapos em i tingim plang i pasim tupela bulmakau wantaim bilong mekim wok, orait i olsem em i singautim yumi bilong pas wantaim em long karim plang na mekim wok. Olaman! Sapos Jisas i helpim yumi long mekim wok em bai gutpela tru! Tasol sapos Jisas i tingim plang ol wokman i save pasim long nek, orait i olsem em i laik soim rot long yumi bambai yumi no ken hatwok tumas. Maski em i tingim wanem kain plang, plang bilong em inap mekim gut tru long yumi, long wanem, em i tok: “Mi save mekim pasin isi long ol man na mi save daunim mi yet.”
7 Orait, yumi mas mekim wanem sapos yumi pilim olsem yumi no inap karim moa ol hevi bilong yumi na yumi bel hevi na tingting i laik bagarap? Sampela inap kisim tingting kranki olsem dispela plang ol i kisim—olsem ol i stap disaipel bilong Krais—dispela i hevi tumas na i hatwok tumas, maski em ol hevi bilong olgeta de i givim hatwok long ol. Olsem na sampela i kirap lusim ol miting Kristen, o ol i no autim tok moa. Ol i ting long dispela rot bai hevi i tekewe long ol na bai ol i kisim malolo. Tasol ol i popaia tru.
8 Yumi save, plang Jisas i putim long nek bilong yumi em “i isi long karim.” Tasol sapos yumi no pasim gut, em inap givim hevi long yumi. Sapos olsem, orait yumi mas skelim gut plang yumi karim. Sapos plang i bagarap liklik o i no sindaun gut, bai yumi hatwok long karim na em i givim pen long yumi. I olsem: Sapos yumi pilim olsem ol wok bilong God i givim hevi long yumi na i hatwok tumas long mekim, yumi mas skelim ol samting yumi mekim—yumi mekim stret wok o nogat? Wanem samting i kirapim yumi long mekim wok? Yumi redim gut ol tok bilong miting na yumi go? Yumi redim gut skin na tingting taim yumi go autim tok? Yumi stap gut wantaim ol brata sista long kongrigesen na pas gut wantaim ol? Na bikpela samting tru em olsem: Yumi pas gut wantaim God Jehova na Pikinini bilong em Krais Jisas o nogat?
9 Taim yumi givim bel long kisim plang bilong Jisas, na plang i sindaun gut long nek, olsem yumi lain long mekim gut ol wok, orait bai i no gat as na yumi pilim olsem dispela i putim bikpela hevi tumas long yumi. Na sapos yumi tingim Jisas i helpim yumi long karim plang, i no hatwok long save husat tru i mekim bikpela wok bilong karim. Yumi olsem liklik pikinini i wokabaut holim wilka na em i ting em yet i subim i go, tasol nogat, papa i mekim. God Jehova em i gutpela Papa; em i sori long yumi na em i save yumi no strong tumas na i gat sampela samting yumi no inap mekim, na em i save yumi sot long wanem samting, na em i helpim yumi long rot bilong Krais Jisas. Pol i tok: “God . . . bai inapim tru olgeta samting yupela i sot long en.”—Filipai 4:19; skelim wantaim Aisaia 65:24.
10 Planti Kristen i dediket pinis ol i pilim pinis dispela gutpela pasin bilong God. Olsem Jenny, em i save wok mani long olgeta de na mekim wok painia haptaim tu long olgeta mun, olsem na em i gat planti wok na planti samting em i mas tingim. Tasol em i pilim olsem wok painia i helpim em long i stap belgut na amamas. Taim em i skulim ol man long ol tok i tru bilong Baibel na em i lukim ol i stretim pasin bilong ol bambai God i ken orait long ol, em i save amamas moa yet. Em i wanbel tru long tok bilong Sindaun 10:22: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”
I No Hevi
11 Jisas i tok plang em “i isi long karim,” na em i tok moa olsem: “Samting mi givim yupela bilong karim, em i no hevi.” Sapos plang “i isi long karim,” orait i no hatwok long yumi mekim wok; na sapos samting yumi karim “i no hevi,” bai yumi amamas long mekim wok. Tasol wanem insait bilong tok bilong Jisas, olsem “samting mi givim yupela bilong karim, em i no hevi”?
12 Orait, tingim samting man bilong wok gaden i mas mekim sapos em i laik givim nupela wok long ol bulmakau, em pastaim ol i pulim hap ain bilong brukim graun na nau em i laik bai ol i pulim karis? Em i mas rausim hap ain pastaim, na bihain em i ken pasim karis. Sapos em i laik pasim hap ain bilong brukim graun na karis tu wantaim long ol, em i longlong, a? Olsem na ol man i kisim wok Jisas i laik givim long ol, Jisas i no laik bai ol i pasim dispela nupela wok antap long olpela wok bilong ol. Nogat. Em i tokim ol disaipel bilong em olsem: “I no gat wanpela wokboi inap i stap aninit long tupela bosman wantaim.” (Luk 16:13) Olsem na Jisas i laik bai ol man i tingting gut: Ol i laik karim yet hevi ol i karim, o ol i laik lusim na kisim wok em i laik givim long ol? Bilong helpim ol long tingting gut, Jisas i tok: “Samting mi givim yupela bilong karim, em i no hevi.”
13 Ol manmeri long taim bilong Jisas i karim bikpela hevi aninit long ol hatpela bos bilong Rom na ol hetman bilong lotu i mekim planti pasin giaman bilong lotu. (Matyu 23:23) Sampela i laik rausim ol Rom na bai ol i no ken bosim ol moa, na ol i kirap mekim pait long gavman na ol i bagarap. (Aposel 5:36, 37) Sampela i givim bel olgeta long kisim mani kago bilong helpim sindaun bilong ol. (Matyu 19:21, 22; Luk 14:18-20) Jisas i soim rot long ol bilong kisim malolo—em i singautim ol i kamap disaipel bilong em—tasol planti ol i no laik bihainim dispela rot. Maski samting ol i karim em i hevi tru, ol i no laik lusim na kisim samting Jisas i laik givim long ol bilong karim. (Luk 9:59-62) Ol i kranki tru!
14 Sapos yumi no was gut, yumi tu inap kranki olsem. Taim yumi kamap disaipel bilong Jisas, yumi kamap fri—yumi no wok strong moa long kisim ol samting ol manmeri bilong dispela graun i laik kisim, o mekim ol samting ol i mekim. Tru, yumi mas wok strong yet bilong kisim kaikai samting bilong olgeta de, tasol yumi no tingim ol samting bilong skin i nambawan bikpela samting. Tasol yumi mas was gut, long wanem, pasin bilong tingting planti long ol samting bilong graun na laikim tumas long kisim gutpela sindaun em inap kalabusim yumi. Sapos yumi givim rot long ol dispela laik bilong skin, ol inap kamap olsem gras nogut i karamapim tok i tru yumi bin amamas long harim. (Matyu 13:22) Sapos yumi wok strong long inapim ol laik bilong skin, yumi inap pilim olsem ol wok Kristen bilong yumi i olsem hevipela samting yumi karim, na yumi laik mekim kwik tasol na yumi no givim bel long mekim. Sapos yumi no givim bel long mekim wok bilong God, bai bel bilong yumi i no kisim malolo.
15 Jisas i tokaut klia, sapos yumi laik i stap belgut na amamas, yumi no ken wok strong long inapim olgeta laik bilong yumi; yumi mas tingim ol samting i bikpela samting tru. Jisas i tok: “Yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ Ating laip em i winim kaikai, na bodi em i winim ol laplap samting.” Nau em i stori long ol pisin na em i tok: “Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol.” Na em i stori long ol plaua na em i tok: “Ol i no save hatwok. Ol i no save wokim laplap. Tasol mi tokim yupela, bipo King Solomon i save putim olgeta gutpela bilas bilong en, tasol gutpela bilas bilong ol dispela plaua i winim tru bilas bilong Solomon.”—Matyu 6:25-29.
16 Stori bilong ol pisin na ol plaua inap givim wanem save long yumi? Yumi save, man i wok strong long kisim planti mani samting, em i save insait moa long ol wok bilong graun na samting em i karim i kamap hevipela moa. I gat planti man bilong bisnis ol i kamap maniman, tasol famili bilong ol i bruk, na marit bilong ol i bagarap, na sik i kisim ol, na ol i gat planti narapela hevi. (Luk 9:25; 1 Timoti 6:9, 10) Wanpela saveman i kisim Prais Nobel, em Albert Einstein, em i tok: “Pasin bilong holim planti samting bilong skin, na holim bikpela wok na biknem, na kisim ol gutpela gutpela samting—mi tingim ol dispela samting i pipia nating tasol. Mi ting i gutpela sapos man i no holim planti samting bilong skin, na em i ting em i olsem man nating tasol.” Dispela tok i wankain olsem tok bilong aposel Pol, olsem: “Tru, sapos yumi bihainim pasin bilong God yumi kisim planti gutpela samting, em sapos yumi amamas long ol samting God i save givim yumi.”—1 Timoti 6:6.
17 Tasol i gat wanpela bikpela samting yumi mas tingim. Sapos yumi ‘no holim planti samting bilong skin, na yumi ting olsem yumi man nating tasol,’ dispela inap helpim yumi, tasol dispela yet i no inap mekim na bai yumi stap belgut na amamas. Planti man i holim liklik samting tasol, long wanem, ol i stap rabis, tasol dispela i no mekim ol i stap amamas. Baibel i no tokim yumi long lusim olgeta gutpela samting bilong skin na i go i stap nating longwe long ol man. Nogat. Baibel i kirapim yumi long givim bel long God maski yumi gat planti samting o yumi no gat planti samting. Sapos yumi mekim olsem, bai yumi “kisim planti gutpela samting.” Wanem ol samting? Long dispela pas Pol i raitim long Timoti, bihain liklik em i tok yumi no ken bilip long mani samting bilong dispela graun, em i save bagarap kwik; yumi mas bilip tru long God, na sapos yumi mekim olsem, bai yumi “bungim planti samting bilong helpim [yumi] bihain, na [yumi] bai i kisim dispela laip em i laip tru.”—1 Timoti 6:17-19.
18 Bel bilong yumi inap kisim malolo sapos yumi lain long lusim hevipela samting yumi karim, na yumi kisim samting Jisas i laik givim long yumi bilong karim, em i no hevi. Planti manmeri ol i bin stretim sampela samting long sindaun bilong ol bambai ol inap mekim bikpela wok moa bilong Kingdom na nau ol i stap belgut na amamas. Tru, bilong mekim olsem ol i mas bilip tru na strongim bel, na ating i gat sampela samting i laik pasim rot bilong ol. Tasol Baibel i tok: “Sapos yu wetim gutpela taim bilong win na ren samting, orait bai yu no inap wokim gaden na yu no inap kisim kaikai i mau.” (Saveman 11:4) I gat planti samting i no hatwok tumas long mekim sapos yumi pasim tingting pinis long mekim. Hatwok em bilong pasim tok long bel olsem yumi bai mekim. Sapos yumi gat tupela tingting na yumi wok long skelim skelim, olsem yumi bai mekim dispela wok o nogat, o yumi sakim tingting bilong mekim dispela wok, ating bai strong bilong yumi i pinis. Tasol sapos yumi redim tingting na kirap mekim wok, yumi inap kisim gutpela blesing tru long en. Man bilong raitim Song em i tok: “Yupela yet i mas traim na lukim na bai yupela i save olsem Bikpela i gutpela tru.”—Song 34:8; 1 Pita 1:13.
“Bai Yupela i Kisim Malolo”
19 Aposel Pol i tokim ol disaipel bilong pastaim: “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.” (Aposel 14:22) Dispela tok i sutim yumi long nau tu. Pasin bilong graun i wok long i go nogut moa yet na dispela i putim planti hevi moa long ol manmeri i laik bihainim stretpela pasin na givim bel long God. (2 Timoti 3:12; KTH 13:16, 17) Tasol yumi pilim olsem Pol taim em i tok: “Long olgeta hap, ol kain kain hevi i save kamap long mipela, tasol ol i no pinisim tru strong bilong mipela. Planti samting i save paulim tingting bilong mipela, tasol tingting bilong mipela i no bagarap olgeta. Ol man i save mekim nogut long mipela, tasol God i no save lusim mipela. Ol i save paitim mipela na mekim mipela i pundaun, tasol ol i no bagarapim olgeta.” As bilong dispela i olsem: Krais Jisas i givim bikpela strong long yumi, em strong bilong God. (2 Korin 4:7-9) Taim yumi kamap disaipel bilong Krais na givim bel long mekim wok, gutpela tok promis bilong Jisas bai kamap tru long yumi, olsem: “Bai yupela i kisim malolo.”—Matyu 11:29.
Yu Inap Stori Long Dispela?
◻ Wanem dispela plang Jisas i laik givim long yumi na em i isi long karim?
◻ Sapos yumi pilim olsem plang i hevi tumas, yumi mas mekim wanem?
◻ Wanem insait bilong tok bilong Jisas olsem: “Samting mi givim yupela bilong karim, em i no hevi”?
◻ Yumi mas mekim wanem na bai samting yumi karim i no ken hevi tumas?
[Askim Bilong Stadi]
1, 2. (a) Wanem sampela samting i givim malolo na nupela strong long yu yet? (b) Yumi mas mekim wanem bilong kisim dispela malolo Jisas i tok promis long en?
3. (a) Long taim bilong Baibel ol i mekim wok long wanem ol plang bilong nek? (b) Baibel i stori long plang bilong nek bilong makim wanem samting?
4. Plang em Jisas i singautim ol man long kisim, em i makim wanem samting?
5. Sapos yumi kisim plang bilong Jisas, olsem wanem dispela i no ken givim hevi long yumi?
6. Taim Jisas i tok yumi mas “kisim plang,” dispela tok inap makim wanem samting?
7, 8. Sampela i kisim wanem tingting kranki taim ol i pilim olsem ol i karim bikpela hevi tumas?
9. Olsem wanem na i no gat as na yumi pilim olsem plang Kristen i putim bikpela hevi tumas long yumi?
10. Kolim stori bilong wanpela meri i tingim wok disaipel i bikpela samting.
11, 12. Wanem insait bilong tok bilong Jisas olsem “samting mi givim yupela bilong karim, em i no hevi”?
13. Ol manmeri long taim bilong Jisas i karim wanem ol hevi? Na wanem samting i kamap?
14. Sapos yumi tingting planti long ol samting bilong graun na laikim tumas long kisim mani, olsem wanem dispela inap mekim na bai i olsem yumi karim samting i hevi tumas?
15. Jisas i tok wanem long ol samting bilong skin yumi laik kisim?
16. Wanem samting i bin painim planti man i wok strong long kisim planti mani kago?
17. Gutpela yumi bihainim wanem kain pasin long sindaun bilong yumi, olsem Baibel i tok?
18. (a) I gat wanem rot bilong kisim malolo tru? (b) Sapos yumi mas senisim sampela pasin bilong yumi, bai yumi ting olsem wanem long dispela?
19. (a) Pasin bilong graun i wok long i go nogut na yumi ken save wanem samting bai painim yumi? (b) Taim yumi karim plang bilong Jisas, yumi ken bilip tru long wanem samting?