Stap Aninit Long Plang Bilong Mi
1 Planti man long graun i gat ol hevi na wari, tasol yumi kisim bel isi tru taim yumi bihainim singaut bilong Jisas long kisim nupela strong aninit long plang bilong em. (Mt. 11:29, 30) Taim yumi kisim plang bilong em olsem wok bilong i stap disaipel, yumi insait long wanpela wok i gat hatwok bilong en, tasol tu em i givim nupela strong long yumi. Em wok bilong autim gutnius bilong Kingdom na helpim ol narapela man long kisim nupela strong wantaim yumi aninit long plang bilong Jisas.—Mt. 24:14; 28:19, 20.
2 Wok Autim Tok i Givim Nupela Strong: Jisas i no tokim ol disaipel long karim samting em i laik givim ol na putim antap long ol hevi ol i karim pinis. Nogat. Em i singautim ol long senisim hevipela samting ol i karim wantaim samting em i laik givim ol bilong karim, em dispela samting i no hevi. Ol wari na ol hevi bilong dispela graun i no daunim yumi moa, na tu, yumi no wok strong bilong kisim planti mani kago i save bagarap kwik. (Lu. 21:34; 1 Ti. 6:17) Tru, yumi bisi na yumi mas mekim wok bilong kisim ol samting bilong wan wan de, tasol pasin bilong lotuim God i stap nambawan samting long laip bilong yumi. (Mt. 6:33) Sapos yumi holimpas stretpela tingting long wanem samting i nambawan bikpela samting, oltaim bai yumi ting wok autim tok i givim nupela strong long yumi na i no putim hevi long yumi.—Fl. 1:10.
3 Yumi save amamas long toktok long ol samting i bikpela samting long yumi. (Lu. 6:45) Olgeta Kristen i save tingim tru Jehova na ol blesing bilong Kingdom em i bin promis long kamapim. Olsem na taim yumi toktok long “gutnius bilong ol gutpela samting,” dispela i givim nupela strong long yumi na yumi no tingim ol wari bilong yumi taim yumi autim tok! (Ro. 10:15, NW ) Taim yumi mekim wanpela wok planti taim, bai yumi lain long mekim gut dispela wok na kisim bikpela amamas moa long en. Olsem na sapos yumi inap lusim bikpela hap taim moa long mekim wok autim tok, bai yumi kisim moa yet nupela strong. Na yumi save amamas tru taim ol man i harim na bihainim ol tok yumi autim! (Ap. 15:3) Maski ol man i no laik harim o ol i birua long yumi, wok autim tok bai givim nupela strong long yumi sapos yumi tingim olsem hatwok yumi mekim i amamasim Jehova, na blesing bilong em i mekim na wok bilong yumi i kamapim ol gutpela samting.—Ap. 5:41; 1 Ko. 3:9.
4 Taim yumi bihainim singaut bilong Jisas, yumi inap mekim gutpela wok wantaim em olsem wanpela Witnes Bilong Jehova. (Ais. 43:10; KTH 1:5) I no gat narapela samting inap givim nupela strong long yumi olsem dispela wok!