Kisim Nupela Strong Long Ol Wok Bilong Spirit

“Yupela [mas] . . . aninit long tok bilong mi, . . . na bai ol samting i no ken givim hevi long yupela na bai yupela i kisim malolo.”​—MT. 11:29.

1. Long maunten Sainai, God i kamapim wanem lo? Bilong wanem em i mekim olsem?

INSAIT long kontrak bilong Lo i kamap long maunten Sainai, i gat lo bilong Sabat. Long rot bilong mausman bilong em, Moses, Jehova i tokim lain Israel: “Long olgeta wik yupela i mas wok long 6-pela de tasol, na long de namba 7 yupela i no ken wok. Olsem na bai ol donki na bulmakau na ol wokboi na wokmeri nating na ol man bilong narapela kantri i stap wantaim yupela, ol i ken malolo na kisim strong gen.” (Kis. 23:12) Yes, Jehova i tingim ol manmeri bilong em i stap aninit long Lo, na em i makim wanpela de we ol i ken malolo na “kisim strong gen.”

2. Olsem wanem pasin bilong bihainim lo bilong Sabat i bin helpim ol Israel?

² Olsem wanem? Sabat em wanpela de bilong kisim malolo tasol? Nogat, Sabat em wanpela bikpela hap bilong wok lotu bilong ol Israel. Taim ol i bihainim lo bilong Sabat, dispela i givim rot long ol het bilong famili long skulim famili bilong ol long ‘bihainim tok bilong Bikpela, na bihainim gutpela na stretpela pasin.’ (Stt. 18:19) Na tu, de Sabat i givim rot long famili na ol pren long bung wantaim na amamas na tingim ol bikpela wok Jehova i bin mekim. (Ais. 58:​13, 14) Na bikpela samting moa yet, de Sabat i makim wanpela taim bihain we ol man bai kisim amamas tru long Taim Bilong Wan Tausen Yia Bilong Krais i Stap King. (Ro. 8:​21) Tasol olsem wanem long taim bilong yumi? Ol trupela Kristen husat i laik bihainim laik bilong Jehova, ol inap kisim we nupela strong na kisim olsem wanem?

Kisim Nupela Strong Long Rot Bilong Bung Wantaim Ol Wanbilip Kristen

3. Ol Kristen bilong pastaim i save mekim wanem bilong helpim ol wanbilip? Wanem samting i kamap long dispela?

³ Aposel Pol i tok kongrigesen Kristen i stap olsem “strongpela pos i karim [“helpim,” NW] tok tru.” (1 Ti. 3:​15) Ol Kristen bilong pastaim i bin helpim ol wanbilip long rot bilong laikim ol na strongim ol. (Ef. 4:​11, 12, 16) Taim Pol i stap long Efesus, ol brata long kongrigesen long Korin ol i kam lukim em bilong strongim em. Tingim samting visit bilong ol i mekim long Pol: “Stefanas na Fortunatus na Akaikus i bin i kam long mi, na mi amamas long lukim ol, long wanem, . . . ol i bin mekim isi bel bilong mi.” (1 Ko. 16:​17, 18) Na taim Taitus i go lukim ol brata long Korin, Pol i salim pas i go long kongrigesen na tokim ol: “Yupela olgeta i bin pinisim ol wari bilong Taitus na mekim bel bilong en i gutpela.” (2 Ko. 7:​13) Long nau tu, ol Witnes Bilong Jehova i save kisim nupela strong long rot bilong bung wantaim ol wanbilip.

4. Olsem wanem ol miting bilong kongrigesen i givim nupela strong long yumi?

⁴ Yumi save pinis olsem ol miting bilong kongrigesen em ples we yumi inap kisim bikpela amamas. Em ples we bilip bilong ol lain i kam bung i “strongim bel bilong yumi olgeta wantaim.” (Ro. 1:​12) Ol bratasista Kristen bilong yumi i no olsem man na meri em yumi bungim wan wan taim tasol, nogat. Ol i pren tru, em yumi laikim ol tru na rispek long ol. Taim yumi bung wantaim ol long olgeta taim, yumi save kisim bikpela amamas na bel bilong yumi i stap isi tru.​​—Fm. 7.

5. Olsem wanem narapela i ken givim nupela strong long narapela long ol kibung?

⁵ Narapela ples we yumi inap kisim nupela strong, em long ol kibung i save kamap long olgeta yia. Long ol kibung yumi save kisim wara bilong laip, em tok i tru i stap long Baibel, na tu, yumi gat rot long “laikim” planti bratasista moa. (2 Ko. 6:​12, 13) Tasol olsem wanem sapos yumi man bilong sem na yumi hatwok long kisim save long ol nupela man? Wanpela rot bilong kisim save long ol bratasista bilong yumi, em yumi ken mekim sampela wok long kibung. Long wanpela kibung intenesenel, wanpela sista i helpim wok bilong klinim, na bihain em i tok: “Pastaim mi bin save long famili bilong mi na wan wan bratasista tasol long kibung. Tasol taim mi helpim wok bilong klinim, mi bungim planti bratasista moa! Mi kisim bikpela amamas tru!”

6. Wanem wanpela samting yumi ken mekim bilong kisim nupela strong long taim yumi go holide?

⁶ Inap 3-pela taim long olgeta yia, ol Israel i save go long Jerusalem bilong mekim lotu. (Kis. 34:23) Bilong mekim olsem, sampela i mas lusim ol gaden na ol stua bilong ol na wokabaut inap planti de long ol rot i gat planti das. Tasol taim ol i kamap long tempel na lukim ol lain i “litimapim nem bilong” Jehova, ol i “amamas tru.” (2 Sto. 30:21) Planti wokboi bilong Jehova long nau, ol tu i kisim bikpela amamas taim ol i go wantaim famili bilong ol long visitim Betel, olsem brens ofis bilong ol Witnes Bilong Jehova. Olsem wanem? Yu tu inap mekim olsem neks taim famili bilong yu i kisim holide samting?

7. (a) Ol bung bilong amamas inap helpim yumi olsem wanem? (b) Bilong ol bung i ken strongim gut yumi, wanem sampela pasin i gutpela long bihainim?

⁷ Taim yumi bung wantaim famili na ol pren bilong yumi bilong kisim amamas, dispela tu inap strongim yumi. Saveman King Solomon i tok: “Yumi save kaikai na dring, na amamas long wok bilong yumi.” (Sav. 2:​24) Ol bung bilong amamas i save givim nupela strong long yumi, na tu, pasin laikim i save kamap strong moa namel long yumi na ol wanbilip Kristen taim yumi save gut moa long ol. Bilong ol bung bilong amamas i ken strongim gut yumi, i gutpela sapos ol i no bikpela tumas na i mas i gat wanpela man i bosim gut dispela bung, na moa yet sapos ol i putim alkohol bilong ol man i ken kisim.

Wok Autim Tok i Givim Nupela Strong

8, 9. (a) Olsem wanem tok bilong Jisas i narapela kain tru long ol tok bilong ol saveman bilong lo na ol Farisi? (b) Taim yumi autim ol tok i tru bilong Baibel long ol narapela, olsem wanem dispela i helpim yumi yet?

⁸ Jisas i givim bel tru long mekim wok autim tok, na em i kirapim ol disaipel long mekim wankain pasin. Dispela samting i kamap ples klia long tok bilong em: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Mt. 9:​37, 38) Jisas i skulim ol man long “gutnius,” na dispela tok i givim nupela strong long ol. (Mt. 4:​23; 24:14) Dispela tok i narapela kain tru long ol hevipela lo ol Farisi i putim long ol manmeri.​​—Ritim Matyu 23:​4, 23, 24.

⁹ Taim yumi tokim ol man long tok bilong Kingdom, ol i kisim nupela strong, na long wankain taim yumi yet i kliagut moa long ol gutpela tok i tru bilong Baibel na pilim tru long bel. Man bilong raitim song i tok: “Litimapim nem bilong Bikpela! I gutpela long yumi singim song na litimapim nem bilong God bilong yumi.” (Sng. 147:1) Olsem wanem? Amamas yu kisim long litimapim nem bilong Jehova long ol narapela, yu inap mekim dispela amamas i kamap bikpela moa?

10. Taim ol man i harim tok yumi autim, yu ting dispela tasol i makim olsem wok autim tok bilong yumi i kamap gutpela? Stori long dispela.

¹⁰ Tru, long sampela teritori ol man i amamas long harim gutnius, winim ol narapela teritori. (Ritim Aposel 18:​1, 5-8.) Sapos yu stap long wanpela hap we i no gat planti man i harim tok bilong Kingdom, wok long tingim ol gutpela samting wok bilong yu i kamapim. Tingim, wok yu mekim long litimapim nem bilong Jehova i no inap lus nating. (1 Ko. 15:58) Na tingim dispela samting tu, maski ol man i harim gutnius o nogat, dispela i no makim olsem wok autim tok bilong yumi i kamap gutpela o nogat. Yumi ken bilip olsem Jehova bai stretim rot na bai ol man i gat gutpela bel ol i gat rot long harim tok bilong Kingdom.​​—Jo. 6:​44.

Famili Lotu i Givim Nupela Strong

11. Jehova i bin givim wanem wok long ol papamama? Olsem wanem ol inap mekim dispela wok?

¹¹ Ol papamama i daun long God ol i gat wok long skulim ol pikinini bilong ol long Jehova na ol lo bilong em. (Lo 11:​18, 19) Sapos yu wanpela papa o mama, yu save makim taim bilong skulim ol pikinini bilong yu long gutpela Papa bilong yumi long heven? Bilong helpim yu long inapim dispela bikpela wok na lukautim famili bilong yu long ol samting ol i mas kisim, Jehova i bin givim yumi planti kaikai bilong spirit long rot bilong ol buk, nius, na vidio samting.

12, 13. (a) Ol famili i ken mekim wanem na bai taim bilong Famili Lotu i ken helpim ol? (b) Ol papamama i ken mekim wanem na bai Famili Lotu i ken givim nupela strong long famili?

¹² Na tu, wokboi i gat gutpela tingting i bin stretim rot bilong mekim Famili Lotu. Famili i makim wanpela apinun long olgeta wik bilong bung wantaim na mekim famili Baibel stadi. Famili Lotu i bin helpim planti famili long stap wanbel wantaim na laikim moa yet narapela narapela na strongim pasin bilong ol long pas gut wantaim Jehova. Tasol papamama i mas mekim wanem na bai Famili Lotu i ken givim nupela strong long famili?

¹³ Famili Lotu i no ken i stap olsem wanpela haptaim we i no gat amamas na famili i les. Yumi lotu long God bilong “amamas,” na em i laik bai yumi amamas long mekim lotu. (1 Ti. 1:​11; Fl. 4:4) Em i wanpela gutpela samting tru long yumi gat wanpela apinun bilong toktok wantaim long ol gutpela tok bilong Baibel. Ol papamama i ken wokim tingting na senisim senisim pasin bilong skulim famili. Olsem: Wanpela famili i bin larim Brandon, pikinini man bilong ol i gat 10-pela krismas, long kamapim wanpela ripot, nem bilong en “Bilong Wanem Jehova i Yusim Snek Bilong Makim Satan?” Brandon i bin tingting planti long dispela samting, long wanem, em i save laikim tru ol snek, na em i bel hevi long snek i makim Satan. Wan wan taim sampela famili i bin mekim ol Baibel drama we olgeta wan wan long famili i makim narapela narapela man insait long wanpela stori bilong Baibel, o ol i ritim na makim nek tasol bilong ol man insait long stori. Ol pikinini i save amamas long ol dispela kain pasin bilong lain we ol yet inap mekim sampela samting, na long dispela rot ol stiatok bilong Baibel i go daun long bel bilong ol.a

Abrusim Ol Samting Em Inap Daunim Yu

14, 15. (a) Nau long taim bilong las de, olsem wanem na planti man moa i save pilim presa na i no stap bel isi? (b) Wanem narapela kain hevi inap painim yumi?

¹⁴ Nau long taim bilong las de bilong pasin nogut bilong dispela graun, planti man moa i save pilim presa na i no stap bel isi. Planti milion manmeri i no gat wok o ol i sot long mani. Ol man i gat wok, planti bilong ol i pilim olsem mani ol i kisim i no inap lukautim gut famili, i olsem ol i putim mani long paus i gat hul. (Skelim Hagai 1:​4-6.) Ol lida i wok strong long pinisim pasin teroris na ol narapela kain pasin nogut, tasol ol i no inap. Planti manmeri i bel hevi na tingting planti long ol rong ol yet i bin mekim.​​—Sng. 38:4.

¹⁵ Ol Kristen tru, ol tu inap kisim ol hevi na presa em dispela graun bilong Satan i save kamapim. (1 Jo. 5:​19) Sampela disaipel bilong Krais ol i kisim narapela hevi moa taim ol i wok strong long i stap gut long Jehova. Jisas i tok: “Sapos ol i bin mekim nogut long mi, orait ol bai i mekim nogut long yupela tu.” (Jo. 15:20) Tasol maski sapos ol man i “mekim nogut” long yumi, “God i no save lusim” yumi. (2 Ko. 4:9) Bilong wanem dispela i olsem?

16. Wanem samting inap helpim yumi long holimpas amamas bilong yumi?

¹⁶ Jisas i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.” (Mt. 11:28) Taim yumi bilip tru long ofa bilong Krais bilong baim bek man, i olsem yumi putim yumi yet long han bilong Jehova. Long dispela rot, yumi kisim “bikpela strong.” (2 Ko. 4:7) Holi spirit bilong God em i wanpela ‘helpim’ na i save strongim tru bilip bilong yumi na bai yumi inap karim ol hevi na stap amamas yet.​​—Jo. 14:26; Jem. 1:​2-4.

17, 18. (a) Yumi mas was gut long wanem samting? (b) Wanem samting inap kamap sapos yumi larim ol amamas i kamap nambawan samting long yumi?

¹⁷ Ol Kristen tru long nau i mas was gut, nogut ol i kirap laikim ol amamas bilong dispela graun. (Ritim Efesus 2:​2-5.) Sapos yumi no was gut, “pasin bilong bel kirap na aigris na bikhet” inap pulim yumi. (1 Jo. 2:​16) O yumi inap kisim tingting kranki olsem pasin bilong bihainim ol laik bilong skin bai kamapim amamas. (Ro. 8:6) Olsem: Sampela manmeri i bin kirap na kisim drak, dring planti, lukim ponografi, insait long ol spot we ol inap i dai, o mekim sampela kain pasin nogut bilong amamasim ol yet. Ol “trik na giaman” bilong Satan i bilong giamanim ol man long ting olsem em ol rot bilong kisim amamas tru.​​—Ef. 6:​11.

¹⁸ Tru, taim yumi mekim long skel, i no gat rong long kaikai, dring, na insait long ol gutpela amamas. Tasol yumi no larim ol dispela samting i kamap nambawan samting long laip bilong yumi. Yumi stap long taim nogut, olsem na yumi mas mekim ol samting long skel na bosim gut skin. Sampela samting em yumi yet i laik mekim inap daunim yumi na nau ‘save yumi kisim long Jisas Krais i stap nating na yumi no karim planti kaikai.’​​—2 Pi. 1:8.

19, 20. Olsem wanem yumi inap kisim amamas tru na nupela strong?

¹⁹ Taim tingting bilong yumi i stret wantaim tok bilong Jehova, yumi luksave olsem ol amamas bilong dispela graun i bilong sotpela taim tasol. Moses i save long dispela samting, na yumi tu i save. (Hi. 11:25) Ol amamas tru i bilong i stap oltaim oltaim, dispela i save kam long rot bilong bihainim laik bilong Papa bilong yumi long heven.​​—Mt. 5:6.

²⁰ Gutpela sapos yumi wok yet long kisim nupela strong long rot bilong mekim ol wok bilong spirit. Taim yumi mekim olsem, yumi givim baksait long ‘olgeta laik nogut bilong dispela graun, na bilip strong na wetim dispela gutpela samting yumi bai amamas tru long lukim, na yumi wetim strongpela God na Man bilong kisim bek yumi, Krais Jisas, i kamap ples klia.’ (Ta. 2:​12, 13) Olsem na yumi mas tingting strong long stap aninit yet long tok bilong Jisas na larim em i soim rot long yumi. Long dispela rot bai yumi kisim amamas tru na nupela strong!

[Futnot]

Bai Yu Bekim Olsem Wanem?

• Olsem wanem ol manmeri bilong Jehova long nau i kisim nupela strong?

• Olsem wanem wok bilong autim tok i save givim nupela strong long yumi wantaim ol lain yumi autim tok long ol?

• Ol het bilong famili i ken mekim wanem na bai Famili Lotu i givim nupela strong long famili?

• Wanem ol samting inap daunim yumi long ol samting bilong spirit?

[Ol Piksa long pes 26]

Taim yumi stap aninit long tok bilong Jisas, yumi gat kain kain rot long kisim nupela strong