Wanpela Rot Bilong Helpim Bel Long Stap Isi
“Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.”—MATYU 11:28.
1, 2. (a) Baibel i kamapim wanem ol tok bilong helpim yumi long daunim hevi na bel i ken stap isi? (b) Ol tok Jisas i bin skulim ol man long en i bin helpim ol olsem wanem?
SAPOS planti taim bel i no stap isi, dispela inap nogutim yumi, a? Baibel i tok hevi i daunim olgeta manmeri God i bin wokim, olsem na planti man i wetim wanpela taim i kamap na ol i no gat hevi moa. (Rom 8:20-22) Tasol Baibel i tok tu long samting yumi ken mekim bilong daunim hevi nau long dispela taim. Yumi inap mekim olsem long rot bilong bihainim tok na pasin bilong wanpela yangpela man i bin stap 2,000 yia i go pinis. Em i wanpela kamda, tasol em i laikim tru ol manmeri, winim wok kamda bilong em. Tok bilong em i mekim wok long bel bilong ol man i harim—em i tingim ol hevi samting bilong ol man na em i helpim ol man i no strong na ol man i bel hevi. Na tu, em i helpim planti man long kamap strong long ol samting bilong spirit inap tru long skel bilong ol. Dispela ol samting i bin helpim ol long daunim hevi na bel i stap isi, na inap helpim yumi tu.—Luk 4:16-21; 19:47, 48; Jon 7:46.
2 Dispela man, Jisas bilong Nasaret, em i no larim ol save bilong dispela graun em sampela man i wok long painim long Rom, Atens, Aleksandria, i stiaim em, nogat. Tasol ol man long olgeta hap i save litimapim ol tok bilong em. Ol dispela tok i gat wanpela as tok: wanpela gavman God bai kamapim bilong bosim gut graun. Na Jisas i bin kamapim ol tok bilong stiaim wokabaut bilong man, na ol dispela tok i gutpela tru long nau tu. Taim ol man i kisim save long ol dispela tok na bihainim, ol i kisim helpim nau long dispela taim stret long daunim hevi na bel i stap isi. Yumi gat laik long kisim kain helpim olsem, a?
3. Jisas i singautim ol man long mekim wanem?
3 Tasol ating yu gat tupela tingting: ‘Tru wanpela man i bin stap long bipo yet inap helpim i stap bilong mi long nau?’ Orait putim yau long dispela gutpela tok bilong Jisas: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.” (Matyu 11:28-30) Wanem insait bilong dispela tok? Orait nau yumi ken skelim ol dispela tok na kisim save long rot bilong daunim hevi na bel i ken stap isi.
4. Jisas i toktok wantaim husat? I gat wanem as na planti man i harim tok bilong em ol i hatwok long mekim ol samting ol hetman Juda i tokim ol long mekim?
4 Jisas i toktok wantaim planti man em ol i wok strong long mekim ol samting i stret wantaim lo, tasol ol i “karim ol bikpela hevi,” long wanem, ol hetman Juda i mekim na lotu i givim hevi long ol. (Matyu 23:4) Ol dispela hetman i strong long ol man i mas bihainim ol kain kain lo i bosim olgeta liklik liklik samting long i stap bilong ol. Sapos olgeta taim yu harim man i tok, “yu no ken” mekim olsem olsem, ating bel bilong yu i no inap stap isi, a? Tasol Jisas i no save mekim olsem. Em i singautim ol man long harim tok bilong em na bai em i ken bringim ol long tok i tru na stretpela pasin na helpim i stap bilong ol i kamap gutpela moa. Yes, sapos man i laik kisim save long trupela God, em i mas putim yau long tok bilong Jisas Krais, long wanem, long rot bilong Jisas, em inap save Jehova i wanem kain man. Jisas i tok: “Man i lukim mi, em i lukim Papa.”—Jon 14:9.
Bel Bilong Yu i No Stap Isi?
5, 6. Olsem wanem long ol aua na pe bilong wok long taim bilong Jisas na long taim bilong yumi long nau?
5 Dispela em samting bilong tingim sapos wok mani bilong yu o wanpela hevi insait long famili i mekim na bel i no stap isi. O ating i gat narapela samting i daunim yu. Sapos olsem, orait yu olsem ol man i gat gutpela bel em Jisas i bungim na helpim ol. Tingim: Planti man long nau i save wok hat tru bilong lukautim ol yet wantaim famili, na planti man long taim bilong Jisas ol tu i bin hatwok olsem.
6 Long dispela taim bipo, ol man i wok leba ol i save wok hat tru inap 12-pela aua long olgeta de, inap 6-pela de long olgeta wik, na ol i save kisim pe olsem wan kina tasol long wanpela de. (Matyu 20:2-10) Taim yu skelim dispela pe wantaim pe yu yet o ol pren bilong yu i kisim long nau, dispela pe i olsem wanem? I hatwok long skelim pe bilong bipo wantaim pe ol man i kisim long nau. Wanpela rot bilong skelim, em yumi ken tingim samting dispela mani inap baim. Wanpela saveman i tok, long taim bilong Jisas, pe bilong baim wanpela bret ol i wokim long 4-pela kap plaua em inap olsem pe bilong man i wok inap wanpela aua. Narapela saveman i tok, pe bilong baim wanpela kap gutpela wain em inap olsem pe bilong man i wok inap tupela aua. Dispela i helpim yumi long save, ol man long dispela taim bipo, ol i save wok hat tru inap planti aua long olgeta de bambai ol inap lukautim ol yet wantaim famili. Olsem na ol i mas i gat helpim bilong givim malolo na nupela strong long ol, wankain olsem yumi tu i mas i gat. Sapos yu holim wanpela wok mani, ating oltaim yu pilim olsem yu mas mekim hariap ol wok na yu no gat hap taim bilong skelim gut ol samting yu mas mekim. Ating yu gat bikpela laik long kisim malolo.
7. Dispela singaut bilong Jisas i bin mekim wanem long ol manmeri?
7 Dispela singaut Jisas i bin givim long ol man em ol i ‘hatwok tru na karim bikpela hevi,’ em i bin mekim gut bel bilong planti man long dispela taim bipo. (Matyu 4:25; Mak 3:7, 8) Na Jisas i tok promis: “Bai mi givim malolo long yupela.” Dispela tok promis i save mekim wok long nau tu. Olsem na sapos yumi ‘hatwok tru na karim bikpela hevi,’ orait i gat rot na yumi inap kisim malolo. Na famili bilong yumi ating ol i gat wankain hevi, ol tu inap kisim dispela malolo.
8. Pasin bilong mekim bikpela long ol pikinini na go lapun, olsem wanem dispela inap mekim na bel i no stap isi?
8 I gat sampela samting moa i givim hevi long ol man. I hatwok tru long mekim bikpela long ol pikinini. Na ol pikinini yet i gat hatwok. Planti man bilong kain kain krismas i gat sik bilong skin na sik bilong tingting. Tru, ol man long nau ol i save stap planti yia, winim ol lain bilong bipo, tasol i gat kain kain bikpela hevi i save painim ol lapun, maski i gat ol nupela marasin samting bilong helpim ol.—Saveman 12:1.
Plang Yumi Karim
9, 10. Long bipo yet plang i makim wanem samting? Bilong wanem Jisas i singautim ol man long kisim plang em i laik givim long ol?
9 Long Matyu 11:28, 29, Jisas i tok: “Kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau.” Long taim bilong Jisas, ating man nating i pilim olsem em i karim wanpela plang, olsem wanpela hevipela samting. Kirap long bipo yet plang i bin makim olsem man i stap wokboi nating bilong narapela na mekim wok kalabus. (Stat 27:40, NW; Wok Pris 26:13, NW; Lo 28:48, NW ) Planti wokman Jisas i bungim, em bos i baim ol long ol wan wan de tasol, ol i save karim wanpela plang tru tru long sol bilong ol, na ol i karim ol hevipela samting. Sampela plang i save sindaun gut long nek na sol na i isi long karim, tasol sampela i save skrapim skin. Jisas em i wanpela kamda, na ating em i bin wokim ol plang bilong putim long nek bilong bulmakau. Em i save long pasin bilong wokim plang i “isi long karim.” Ating em i save pasim hap laplap samting long hap bilong plang i sindaun long nek na bai plang i no ken skrapim skin.
10 Taim Jisas i tok, “Yupela [mas] . . . aninit long tok bilong mi, olsem yupela i kisim plang ol i save putim long nek bilong ol bulmakau,” ating em i laik stori long em yet olsem wanpela man bilong wokim ol gutpela plang i save sindaun gut long nek na sol bilong wokman na i “isi long karim.” Olsem na Jisas i tok: “Samting mi givim yupela bilong karim, em i no hevi.” Dispela i makim olsem plang bilong putim long sol i no hatwok long karim, na wok i no givim bikpela hevi long ol. Tru, taim Jisas i tokim ol man long kisim plang bilong em, dispela i no makim olsem long dispela taim stret ol bai stap fri long olgeta hevi i daunim ol, nogat. Tasol dispela tok em i kamapim em i narapela kain, na em bai givim malolo, olsem nupela strong, long ol. Taim ol i stretim sampela samting long i stap bilong ol na sampela pasin bilong ol long mekim ol samting, dispela tu bai helpim ol. Tasol bikpela samting moa bilong helpim bel i stap isi, em pasin bilong bilip tru na wetim gutpela samting i kamap bihain.
Yu Inap Kisim Malolo
11. Bilong wanem tok bilong Jisas i no makim olsem man bai lusim wanpela plang na kisim narapela?
11 Tasol tok bilong Jisas i no makim olsem ol man bai lusim wanpela plang na kisim narapela plang, nogat. Gavman Rom bai bosim yet kantri, wankain olsem ol gavman long nau i bosim ol kantri ol Kristen i sindaun long en. Gavman Rom bai wok yet long singaut long takis. Sik, hevi bilong mani, sin na pasin kranki bilong ol man, ol dispela hevi bai stap yet. Tasol ol inap kisim malolo sapos ol i bihainim ol tok bilong Jisas, na yumi long nau inap kisim kain malolo olsem.
12, 13. Jisas i tok wanem samting bai givim nupela strong long ol? Sampela i mekim wanem?
12 Bikpela samting bilong tok piksa bilong Jisas long plang em i makim wok bilong kamapim ol disaipel. Nambawan bikpela wok bilong Jisas i bilong lainim ol narapela, na em i lainim gut ol long Kingdom bilong God. (Matyu 4:23) Olsem na taim em i tok, “Yupela [mas] . . . aninit long tok bilong mi, olsem yupela i kisim plang ol i save putim long nek bilong ol bulmakau,” dispela i makim olsem ol i mas bihainim em na mekim wankain wok. Gutnius 4-pela aposel i bin raitim i soim olsem ol tok bilong Jisas i bin kirapim ol man i gat gutpela bel long senisim wok bilong ol—wok em i wanpela bikpela samting long i stap bilong planti man. Jisas i bin singautim Pita, Andru, Jems, na Jon: “Yupela kam bihainim mi, na bai mi lainim yupela long pasin bilong kisim ol manmeri.” (Mak 1:16-20) Em i helpim ol dispela man bilong kisim pis long save olsem, sapos ol i mekim dispela wok em yet i putim i stap namba wan long laip bilong em na ol i larim em i stiaim na helpim ol, orait ol bai stap bel gut tru.
13 Sampela Juda ol i kisim gut dispela tok bilong Jisas na ol i bihainim. Long tingting bilong yu, tingim ol samting i bin kamap long nambis olsem Luk 5:1-11 i stori long en. Fopela man bilong kisim pis ol i bin wok hat tru long nait olgeta, tasol ol i no bin kisim wanpela pis. Tasol nau, wantu tasol, ol i kisim bikpela lain pis! Dispela i no kamap nating, nogat; Jisas yet i as bilong dispela. Taim ol i lukluk i go long nambis, ol i lukim planti manmeri em ol i gat bikpela laik long harim tok bilong Jisas. Dispela i helpim ol fopela long kisim gut dispela tok bilong Jisas: “Nau yu wok long kisim pis, tasol bihain bai yu wok long kisim ol manmeri i kam long mi.” Orait ol i mekim wanem? “Ol i pul i go sua, na ol i lusim olgeta samting bilong ol, na ol i bihainim Jisas.”
14. (a) Olsem wanem yumi inap kisim nupela strong long nau? (b) Jisas i autim wanem gutnius i givim malolo long ol man?
14 Yumi tu inap mekim kain samting olsem. Wok bilong skulim ol man long ol tok i tru bilong Baibel, dispela wok i stap yet. Inap 6 milion Witnes Bilong Jehova long olgeta hap bilong graun i bin bihainim singaut bilong Jisas long kisim “plang” bilong em—ol i kamap man bilong “kisim ol manmeri.” (Matyu 4:19) Sampela i mekim dispela wok fultaim, na sampela i wok haptaim inap long skel bilong ol. Olgeta i kisim nupela strong long dispela wok, na dispela i helpim bel long stap isi. Ol i mekim samting ol i amamas long mekim—ol i tokim ol narapela long wanpela gutpela tok, em “gutnius bilong kingdom bilong God.” (Matyu 4:23) Yumi save amamas tru long tokim ol man long sampela gutpela tok, na yumi amamas moa long tokim ol long dispela gutnius. Baibel i gat ol bikpela tok yumi mas kisim bilong helpim ol man long save olsem i gat rot bilong lusim sampela hevi na bel i ken i stap isi.—2 Timoti 3:16, 17.
15. Ol tok Jisas i skulim ol man long en long ol pasin ol i mas bihainim, dispela inap helpim yu olsem wanem?
15 Maski nau tasol sampela man i kirap na kisim save long Kingdom bilong God, ol tok bilong Jisas i helpim wokabaut bilong ol. Tru tumas, planti man inap tok olsem ol tok bilong Jisas i bin givim nupela strong long ol na i bin helpim ol long senisim tru i stap bilong ol. Yu inap save dispela samting em i tru long rot bilong skelim sampela tok bilong stiaim wokabaut bilong ol man, em yu ken lukim long ol stori bilong i stap na wok bilong Jisas long 3-pela Gutnius em Matyu, Mak, na Luk i raitim.
Rot Bilong Kisim Malolo
16, 17. (a) Yumi ken painim we sampela bikpela tok Jisas i bin skulim ol man long en? (b) Yumi mas mekim wanem na bai ol tok Jisas i skulim ol man long en i ken givim malolo long yumi?
16 Long 31 C.E., Jisas i stap antap long wanpela maunten na mekim wanpela longpela tok na i kam inap long nau tu planti man long olgeta hap i litimapim ol dispela tok bilong em. Dispela tok i stap long Matyu sapta 5-7, na Luk sapta 6, na i kamapim planti bikpela tok em i bin skulim ol man long en. Sampela tok moa Jisas i skulim ol man long en ol i stap long ol narapela hap bilong ol Gutnius. Planti tok em i mekim i no hatwok long kisim gut, tasol ating i hatwok liklik long bihainim. I gutpela sapos yumi ritim ol dispela sapta na tingim gut, a? Na larim ol dispela tok i stiaim tingting bilong yu.
17 Yumi ken putim ol bikpela tok bilong Jisas long wanpela lista na long olgeta wan wan de bilong mun i gat wanpela tok yu ken wok long bihainim. Yu ken mekim olsem wanem? Orait no ken ritim hariap. Tingim yangpela maniman i gat namba em i bin askim Jisas Krais: “Gutpela tisa, bai mi mekim wanem na mi ken kisim laip i stap gut oltaim oltaim?” Jisas i kolim ol bikpela samting bilong Lo bilong God, na man i tok em i save bihainim. Tasol em i save i gat sampela samting moa em i mas mekim. Jisas i tokim em long wok strong moa long bihainim ol lo bilong God bilong stiaim tingting, na mekim ol wok ol disaipel i save mekim. Tasol man ya i no laik mekim bikpela wok olsem. (Luk 18:18-23) Olsem na ol man i laik kisim save long ol tok bilong Jisas na helpim bel long stap isi, ol i mas save olsem pasin bilong wanbel long ol tok bilong Jisas, dispela i narapela kain long pasin bilong bihainim.
18. Stori long olsem wanem yu ken mekim gutpela wok long ol tok i stap long blok.
18 Bilong helpim yumi long skelim na bihainim ol tok bilong Jisas, pastaim lukim namba wan samting long lista i stap long blok. Em Matyu 5:3-9. Tru, yumi inap lusim bikpela hap taim long tingim ol gutpela tok i stap long ol dispela ves. Tasol taim yu tingim olgeta dispela ves wantaim, yu ting i gutpela long kisim wanem kain tingting? Sapos tru tru yu laik stap isi long bel, wanem samting bai helpim gut yu? Sapos yu lusim sampela hap taim moa long tingim ol samting bilong spirit, na yu wok long tingim tingim, olsem wanem dispela inap helpim yu? I gat sampela samting long i stap bilong yu em yu no ken tingim tumas na bai yu gat hap taim moa bilong tingim ol samting bilong spirit? Sapos yu mekim olsem, dispela bai helpim yu long stap amamas long nau yet.
19. Yu ken mekim wanem bilong helpim yu long kisim gut as bilong ol tok?
19 Orait nau yu ken mekim narapela samting. Toktok wantaim narapela wokboi bilong God, olsem poroman marit, wanpela wanblut, wanpela pren, long ol dispela tok. (Sindaun 18:24; 20:5) Tingim: Maniman i gat namba i bin toktok wantaim narapela—em Jisas—long samting em i laik save long en. Tok Jisas i bin kamapim inap helpim em long kisim bikpela amamas moa na laip i stap oltaim. Tru, wanbilip yu toktok wantaim em long ol dispela ves, em i no gat bikpela save olsem Jisas, tasol taim yutupela i toktok long ol dispela tok bilong Jisas, dispela bai helpim yutupela wantaim. Traim long mekim nau tasol—no ken larim bikpela hap taim i lus.
20, 21. Yu ken bihainim wanem program bilong helpim yu long kisim save long ol tok bilong Jisas? Olsem wanem yu ken skelim wok bilong yu, em i kamap gutpela o nogat?
20 Lukim gen blok, “Ol Tok Bilong Helpim Yu.” Ol i bin stretim ol dispela tok na bai i gat wanpela tok yu ken tingim long ol wan wan de. Pastaim ritim ol tok bilong Jisas i stap long ol ves long lista. Orait nau tingim gut ol dispela tok. Tingim olsem wanem yu inap bihainim long i stap bilong yu. Sapos yu pilim olsem yu mekim pinis, orait wok long tingim wanem samting yu inap mekim bilong bihainim moa yet dispela tok bilong God. Wok long bihainim dispela tok long dispela de stret yu ritim. Sapos yu hatwok long kisim gut dispela tok o yu no save gut long olsem wanem yu inap bihainim, orait tingim gen long de bihain. Tasol sapos yu hatwok yet, orait lusim dispela tok na long narapela de tingim narapela tok long lista. Long pinis bilong wik, skelim wok yu bin mekim bilong bihainim 4-pela o 5-pela samting Jisas i bin skulim ol man long en. Long namba 2 wik, wok long tingim sampela tok moa long ol wan wan de. Sapos yu save yu bin pundaun long bihainim sampela tok, orait no ken bel hevi. Olgeta Kristen inap pundaun olsem. (2 Stori 6:36; Song 130:3; Saveman 7:20; Jems 3:8) Wok long bihainim ol dispela tok long namba 3 na namba 4 wik.
21 Long pinis bilong wanpela mun samting, ating yu inapim pinis olgeta dispela 31 hap bilong lista. Tasol maski yu inapim olgeta o nogat, bai yu pilim olsem wanem? Ating bai yu amamas na stap isi liklik, a? Maski yu kamap gutpela liklik tasol long dispela samting, ating bel bai stap isi liklik, o yu lain long samting yu ken mekim taim bel i no stap isi, na yu inap wok yet long bihainim dispela lista. No ken lusim tingting, i gat planti tok moa bilong Jisas i no stap long lista. I gutpela sapos yumi wok long painim, na bihainim, a?—Filipai 3:16.
22. Taim yumi bihainim ol tok bilong Jisas, wanem samting inap kamap long dispela? I gat wanem narapela samting yumi mas tingim?
22 Em nau, yumi ken save olsem plang bilong Jisas em i isi tru long karim. Tru, em i gat hevi bilong en, tasol em i no hevi tumas. Wok bilong i stap disaipel na bihainim ol tok bilong Jisas em i no givim hevi long yumi. Aposel Jon, em gutpela pren bilong Jisas, em i bin karim dispela plang inap 60 yia na em i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:3) Yu tu i ken bilip olsem. Taim yu bihainim ol tok bilong Jisas, bai yu save olsem, samting i givim hevi long planti man long nau em i no save givim bikpela hevi tumas long yu. Bai yu save olsem bel bilong yu i stap isi. (Song 34:8) Tasol taim Jisas i toktok long dispela plang em i isi long karim, em i kamapim narapela tok em yumi mas tingim tu. Em i tok em i “save mekim pasin isi long ol man na [em i] save daunim [em] yet.” Olsem wanem dispela samting inap helpim yumi long kisim skul long Jisas na bihainim pasin bilong em? Stori i kam bihain long dispela bai toktok long dispela askim.—Matyu 11:29.
Wanem Bekim Bilong Yu?
• Bilong wanem yumi mas lukluk i go long Jisas sapos yumi laik daunim hevi na bel i ken stap isi?
• Bipo, plang i makim wanem samting? Bilong wanem i olsem?
• Bilong wanem Jisas i singautim ol man long kisim plang bilong em?
• Olsem wanem yu inap kisim nupela strong long ol samting bilong spirit?
[Rait long pes 14]
Yia-teks bilong ol Witnes Bilong Jehova bilong 2002 i olsem: “Kam long mi na bai mi givim malolo long yupela.”—Matyu 11:28.
[Blok/Piksa long pes 12, 13]
Ol Tok Bilong Helpim Yu
Yu inap lukim wanem ol gutpela tok long Matyu sapta 5-7? Ol dispela sapta i kamapim ol tok em Bikpela Tisa Jisas i bin skulim ol man long en taim em i stap long wanpela maunten long Galili. Plis opim Baibel, na ritim ol ves i stap daunbilo na givim ol dispela askim long yu yet:
1. 5:3-9 Ol dispela ves i helpim mi long save mi gat wanem kain tingting? Mi ken mekim wanem na bai amamas bilong mi i ken go bikpela? Mi ken mekim wanem bilong lukautim gut mi yet long ol samting bilong spirit?
2. 5:25, 26 Wanem samting i winim pasin bilong tok pait?—Luk 12:58, 59.
3. 5:27-30 Jisas i tok wanem long pasin bilong tingting nabaut nating long ol samting bilong maritpasin? Sapos mi abrusim kain pasin olsem, olsem wanem dispela inap helpim mi long stap amamas na bel isi?
4. 5:38-42 I gat wanem as na mi mas wok strong long abrusim pasin bilong strong tumas long bosim narapela olsem planti man long nau i save mekim?
5. 5:43-48 Sapos mi save gut moa long ol wanwok samting em mi bin tingim ol olsem birua, olsem wanem dispela inap helpim mi? Olsem wanem dispela bai helpim bel long stap isi?
6. 6:14, 15 Sapos sampela taim mi no lusim tingting long rong bilong narapela, ating pasin bilong bel kaskas o bel nogut i as bilong dispela o olsem wanem? Olsem wanem mi ken stretim?
7. 6:16-18 Mi save wari tumas long ol man bai i gat wanem tingting long mi na mi no tingim tumas pasin tru bilong mi? Mi mas tingim moa yet wanem samting?
8. 6:19-32 Sapos mi tingim tumas mani kago samting, dispela inap mekim wanem long mi? Bilong helpim mi long bihainim stretpela tingting long dispela samting, mi mas tingting long wanem samting?
9. 7:1-5 Mi pilim olsem wanem taim mi stap namel long ol man i save skelim skelim pasin bilong ol narapela na oltaim ol i wok long painim popaia bilong ol? I gat wanem as na mi yet mi no ken mekim olsem?
10. 7:7-11 Taim mi beten askim God long wanpela samting, sapos i gutpela long askim askim planti taim na no ken les, orait olsem wanem long ol narapela samting bilong i stap bilong mi?—Luk 11:5-13.
11. 7:12 Planti taim mi mekim pasin long narapela olsem mi laik bai em i mekim long mi o olsem wanem?
12. 7:24-27 Mi gat wok long stiaim wokabaut bilong mi, olsem na mi ken mekim wanem na bai mi inap sanap strong taim planti hevi i kamap? Bilong wanem mi mas tingim dispela samting nau long dispela taim?—Luk 6:46-49.
Sampela tok moa mi ken tingim:
13. 8:2, 3 Olsem Jisas i bin mekim planti taim, mi ken mekim wanem bilong soim olsem mi sori long ol taranguman?
14. 9:9-38 Olsem wanem long pasin bilong marimari long narapela? Olsem wanem mi ken mekim moa yet dispela pasin?
15. 12:19 Tok profet ol i mekim long Jisas i bin skulim mi na olsem wanem? Mi wok strong long abrusim pasin bilong tok pait?
16. 12:20, 21 Wanem gutpela samting inap kamap sapos mi no larim pasin na toktok bilong mi i daunim narapela?
17. 12:34-37 Planti taim mi save toktok long wanem samting? Mi save olsem taim mi bengim muli, wara bilong muli i save kam ausait, olsem na i gat wanem as na mi mas tingim gut samting i stap insait long bel bilong mi?—Mak 7:20-23.
18. 15:4-6 Tok bilong Jisas long mekim pasin sori long ol lapun, dispela i givim wanem tingting long mi?
19. 19:13-15 Mi mas lusim hap taim long mekim wanem?
20. 20:25-28 Bilong wanem i no gutpela sapos mi strong tumas long bosim narapela na i no gat as tru long mekim olsem? Mi ken bihainim pasin bilong Jisas long dispela samting olsem wanem?
Sampela tok moa, olsem Mak i kamapim:
21. 4:24, 25 Pasin mi mekim long narapela, olsem wanem dispela i bikpela samting?
22. 9:50 Sapos toktok na pasin bilong mi i gutpela, wanem gutpela samting inap kamap long dispela?
Sampela tok Luk i kamapim:
23. 8:11, 14 Sapos mi larim pasin bilong tingting planti tumas, na mani kago, na amamas, i bosim olgeta samting mi mekim, wanem samting inap kamap?
24. 9:1-6 Jisas i gat strong long oraitim ol sikman, tasol em i putim wanem samting i go pas long dispela?
25. 9:52-56 Mi save bel hevi kwik long samting narapela i mekim? Mi save abrusim pasin bilong bekim rong?
26. 9:62 Mi mas ting olsem wanem long wok bilong mi bilong tokim ol narapela long Kingdom bilong God?
27. 10:29-37 Mi ken mekim wanem bilong kamapim klia olsem mi man bilong tingim narapela na helpim em na mi no man bilong givim baksait long narapela?
28. 11:33-36 Wanem sampela samting mi ken mekim na bai i no gat planti samting tumas i pulim bikpela hap taim bilong mi?
29. 12:15 Olsem wanem long laip na mani kago samting?
30. 14:28-30 Sapos mi lusim bikpela hap taim liklik bilong skelim gut ol samting mi mas mekim, ating mi inap abrusim wanem samting? Dispela inap helpim mi olsem wanem?
31. 16:10-12 Sapos mi stap gut long God, dispela inap helpim mi olsem wanem?
[Ol Piksa long pes 10]
Wok bilong karim plang bilong Jisas na helpim ol man long kisim laip, dispela i save givim malolo long yumi