Sapta 84

Man i Stap Disaipel Em i Gat Bikpela Wok

TAIM Jisas i lusim pinis haus bilong dispela bikpela Farisi, em i kirap wokabaut gen i go long Jerusalem. Bikpela lain moa yet ol i bihainim em. Tasol ol i gat wanem tingting na ol i bihainim em? Man i stap disaipel tru bilong Jisas, em i mas mekim wanem?

Ol i wokabaut i go na Jisas i tanim lukluk long dispela lain na em i givim wanpela tok long ol na ating ol i kirap nogut long en, em i tok: “Sapos man i kam long mi, tasol em i no birua long papa na mama na meri na ol pikinini na brata na susa bilong em, na long laip bilong em yet tu, orait em i no inap i stap disaipel bilong mi.”

Wanem insait bilong dispela tok bilong Jisas? Em i no laik tok, ol i mas birua tru long ol wanblut bilong ol. Nogat. Insait bilong dispela tok i olsem: Ol i no ken laikim ol tumas, winim Jisas​—ol i mas laikim Jisas moa yet. Baibel i tok, Jekop i laikim tru Resel, na em i no laikim tumas Lea. I no olsem Jekop i no laikim Lea, tasol em i laikim Resel moa yet.

Na Jisas i tok, sapos man i laik i stap disaipel bilong em, man i mas birua long laip bilong em tu. Disaipel tru i mas laikim Jisas moa yet, winim laip bilong em. Jisas i laik bai ol i save, taim man i kamap disaipel bilong em, dispela i bikpela samting tru na i gat bikpela wok bilong en. Olsem na man i mas tingim gut pastaim.

Taim man i stap disaipel bilong Jisas, em bai kisim pen na hevi, olsem Jisas i tok: “Man i no karim diwai . . . bilong en na bihainim mi, em i no inap i stap disaipel bilong mi.” Olsem na ol disaipel i mas redi long karim hevi long han bilong ol man olsem Jisas i bin karim, na ol i mas redi long ol birua bilong God i kilim ol i dai tu, olsem liklik taim bai ol i mekim long Jisas.

Jisas i laik bai dispela bikpela lain i save, sapos ol i laik kamap disaipel, ol i mas tingim gut pastaim. Olsem na em i mekim tok piksa, olsem: “Sapos wanpela bilong yupela i laik wokim wanpela haus . . . ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat? Sapos em i no mekim olsem pastaim, na em i putim simen na bihain em i no inap pinisim dispela haus, orait olgeta man i lukim, ol bai i tok bilas long em. Ol bai i tok, ‘Dispela man i statim dispela haus, tasol em i no pinisim.’ ”

Olsem na sapos ol i laik kamap disaipel bilong Jisas, ol i mas tingim na skelim gut pastaim bambai ol inap long mekim olgeta samting disaipel bilong em i mas mekim; i kain olsem man i laik wokim haus​—em i mas skelim gut mani bilong em pastaim bambai em inap pinisim haus. Orait Jisas i mekim narapela tok piksa, olsem:

‘Na sapos wanpela king i laik i go pait long narapela king, orait em bai i sindaun pastaim na tingting gut​—bai em inap pait long dispela narapela king na rausim em, o nogat? Na sapos em i ting em i no inap, orait taim birua i stap longwe yet, em bai i salim ol man i go long em na traim toktok bilong mekim pait i dai.’

Orait nau Jisas i kamapim as bilong dispela tok piksa, em i tok: “Olsem tasol, sapos wanpela bilong yupela i no givim baksait long olgeta samting bilong en, orait em i no inap i stap disaipel bilong mi.” Dispela bikpela lain i bihainim Jisas, na olgeta narapela man i kisim save long em, ol i mas redi long mekim olsem. Ol i mas redi long lusim olgeta samting bilong ol​—na laip bilong ol tu. Olsem wanem long yu? Yu redi long mekim olsem?

Jisas i tok moa olsem: “Sol em i gutpela samting.” Taim em i mekim bikpela tok bilong em long maunten, em i tok ol disaipel i olsem “sol bilong graun,” long wanem ol i save helpim ol man long i stap oltaim, olsem sol i save helpim kaikai na kaikai i save stap longtaim. “Tasol sapos pait bilong sol em i pinis, orait bai yumi mekim wanem na dispela sol i kamap gutpela gen?” Kain sol olsem em yumi no inap mekim wanpela wok long en. “Yumi save rausim nating tasol.” Na Jisas i tok: “Man i gat yau em i mas harim dispela tok.”

Jisas i kamapim klia olsem ol man i bin i stap disaipel bilong em inap longtaim, ol i mas strong long i stap yet long dispela wok. Sapos ol i no gat strong moa, em i no inap mekim wanpela wok long ol, na ol man bai i tok bilas long ol na dispela bai bagarapim nem bilong God, na God i no ken laikim ol moa. Dispela kain man i olsem sol i no gat pait moa na i nogut pinis​—ol bai tromoi em i go ausait​—olsem em bai bagarap na pinis olgeta. Luk 14:​25-35; Stat 29:​30-33; Matyu 5:13.

▪ Wanem insait bilong dispela tok olsem yumi mas “birua” long ol wanblut na long laip bilong yumi yet tu?

▪ Jisas i mekim wanem tupela tok piksa? Wanem insait bilong en?

▪ Wanem as bilong laspela tok Jisas i mekim bilong pinisim tok piksa bilong em long sol?