Sapta 95
Tok Bilong Katim Marit na Laikim Ol Pikinini
JISAS wantaim ol disaipel i wokabaut i go long Jerusalem bilong lukim bung bilong Pasova bilong yia 33. Ol i brukim wara Jordan na bihainim rot i go long hap bilong Perea. Inap sampela wik bipo Jisas i bin i stap long Perea, tasol ol i bin singautim em i go long Judia, long wanem pren bilong em Lasarus i gat sik. Taim Jisas i stap yet long Perea, em i bin toktok wantaim ol Farisi long pasin bilong katim marit, na nau ol i kamapim gen dispela tok.
Ol Farisi i gat narapela narapela tingting long katim marit. Moses i bin tok, man inap katim marit sapos ‘em i painim wanpela rong long meri’ bilong em. Sampela i ting dispela tok i makim olsem meri i bin mekim pasin pamuk samting. Tasol sampela i ting, dispela ‘rong’ i makim olgeta liklik liklik pasin kranki tu. Olsem na ol Farisi i laik traim Jisas na ol i askim em: “Ating lo bilong yumi i orait long man i ken rausim meri long laik bilong em yet?” Ol i ting, maski Jisas i bekim wanem tok, dispela bai skrapim bel bilong sampela Farisi em ol i gat narapela tingting long dispela samting.
Taim Jisas i bekim dispela askim, em i kamapim stret tok bilong God long taim em i bin kamapim marit long pastaim tru. Jisas i tok: “Bipo tru taim God i wokim olgeta samting, em i wokim ol manmeri, na em i mekim ol i kamap man na meri. Na God i tok, ‘Olsem na man i save lusim papamama na pas wantaim meri bilong en, na tupela i kamap wanpela bodi tasol.’ . . . tupela i no i stap olsem tupela moa. Nogat. Tupela i kamap olsem wanpela bodi. Olsem na samting God i pasim pinis, em man i no ken katim.”
Olsem Jisas i tok, laik bilong God long pastaim, em i laik bai ol marit i mas pas gut wantaim na ol i no ken katim marit. Orait, ol Farisi i tok: “Olsem wanem Moses i givim lo long yumi na i tok man i ken raitim pepa bilong katim marit na givim long meri na rausim em i go?”
Jisas i tokim ol: “Yupela i man bilong bikhet, olsem na Moses i larim yupela i rausim meri. Tasol bipo tru i no gat dispela pasin.” Tru tumas, taim God i kamapim lo bilong marit long Iden, em i no tok long ol i ken katim marit.
Jisas i tok moa long ol Farisi olsem: “Sapos meri bilong wanpela man i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.” Em nau, Jisas i tokaut olsem dispela samting tasol (por·neiʹa, olsem olgeta kain pasin pamuk) i as na God i orait long man i ken katim marit.
Nau ol disaipel i save, i gat wanpela as tasol bilong katim marit, olsem na ol i tok: “Sapos man i mas bihainim dispela pasin na i stap wantaim meri bilong en, orait mobeta man i no marit.” Tru tumas, taim man i laik marit, em i mas tingim gut dispela samting—em i mas save, taim em i marit pinis, em i no ken katim nating marit.
Nau Jisas i toktok long pasin bilong i stap singel. Em i tok, i gat sampela man em bodi bilong ol i bagarap taim mama i karim ol, na ol i no inap marit. Na sampela, em ol man i bin katim ol na ol i no inap marit na kamapim pikinini. Na sampela i ting long mekim wok bilong Kingdom na ol i tambuim ol yet na ol i no marit. Na Jisas i tok, sapos man inap i stap singel, orait em i ken i stap olsem.
Long dispela taim ol manmeri i kirap bringim ol liklik pikinini bilong ol i kam long Jisas. Tasol ol disaipel i krosim ol pikinini na i laik pasim ol. Ating ol i tingim Jisas, em i gat planti wok tumas na nogut dispela i putim hevi gen long em. Tasol Jisas i tokim ol: “Yupela larim ol pikinini i kam long mi. Yupela i no ken pasim ol. Nogat. Kingdom bilong God em i bilong kain man olsem ol dispela pikinini. . . . sapos wanpela man i no kisim kingdom bilong God olsem ol liklik pikinini i save kisim, em i no inap i go insait long en.”
Dispela tok bilong Jisas i skulim gut yumi, a? Bilong kisim Kingdom bilong God, yumi mas bihainim pasin bilong ol liklik pikinini, ol i gat pasin daun na ol i larim man i skulim ol. Na pasin bilong Jisas i skulim gut yumi olsem ol papamama i mas larim ol pikinini bilong ol i kam long ol na toktok wantaim ol; na yumi olgeta i mas mekim olsem long ol pikinini. Orait nau Jisas i mekim wanpela samting na bai ol i ken save, em i laikim tru ol liklik pikinini—em i holim ol na blesim ol. Matyu 19:1-15; Lo 24:1; Luk 16:18; Mak 10:1-16; Luk 18:15-17.
▪ Ol Farisi i gat wanem ol narapela narapela tingting long katim marit? Olsem na ol i tok wanem bilong traim Jisas?
▪ Tasol Jisas i bekim wanem tok long ol? Em i kolim wanem as tasol bilong katim marit?
▪ Bilong wanem ol disaipel i tok, mobeta man i no ken marit? Jisas i givim wanem gutpela tok long ol long dispela?
▪ Pasin Jisas i mekim long ol liklik pikinini i skulim yumi long wanem samting?