Sapta 98
Klostu Bai Jisas i Dai na Ol Disaipel i Tok Pait
JISAS wantaim ol disaipel i stap long distrik Perea na ol i laik brukim wara Jordan na i kam long distrik Judia. Planti man i wokabaut wantaim ol i go long bung bilong Pasova bilong yia 33 em bai kamap wanpela wik samting bihain.
Ol disaipel i kirap nogut long Jisas i strong long i go long Jerusalem na em i no pret. Taim Lasarus i dai inap sampela wik bipo na Jisas i laik i kam long Judia, Tomas i bin tokim ol: “Yumi olgeta i go na i dai wantaim em.” Na taim Jisas i kirapim bek Lasarus, ol kaunsil i bin wokim toktok bilong kilim i dai Jisas. Olsem na i gat as tru na ol disaipel i pret taim ol i kam bek long Judia.
Jisas i laik bai ol 12-pela aposel i ken save long ol samting bai painim em, olsem na em i kisim ol tasol i go long wanpela hap na em i tokim ol: “Harim. Nau yumi go long Jerusalem, na ol bai i givim Pikinini Bilong Man long han bilong ol bikpris na ol saveman bilong lo. Na bai ol i mekim kot long em na pasim tok long kilim em i dai. Na bai ol i givim em long ol man bilong ol arapela lain. Na ol dispela man bai i tok bilas long em na spetim em na wipim em na kilim em i dai. Na long de namba 3 bai em i kirap bek.”
Insait long sampela mun i go pinis, dispela em i namba 3 taim Jisas i bin tokim ol disaipel long em bai i dai na kirap bek, tasol ol i no klia long dispela tok. Ating ol i bilip yet olsem Jisas bai kamapim gen kingdom bilong Israel, na ol i wet long kisim biknem na namba insait long wanpela kingdom bilong Krais Jisas long graun.
Wanpela meri nem bilong em Salome, em mama bilong tupela aposel, em Jems na Jon, em tu i wokabaut i go wantaim ol long Pasova. Jisas i bin kolim tupela olsem “ol man i olsem klaut i pairap.” Ating Jisas i bin kolim ol olsem, long wanem bel bilong ol i save kirap kwik long kros samting, olsem pairap. Inap longtaim liklik, tupela i gat tingting long kisim biknem insait long Kingdom bilong Krais, na ol i bin kamapim dispela tingting long mama bilong ol. Orait nau mama i laik helpim tupela na em i kam brukim skru na i tokim Jisas em i laik askim Jisas long wanpela samting.
Jisas i askim em: “Yu laikim wanem samting?”
Meri i tok: “Mi laik bai yu tok olsem dispela tupela pikinini bilong mi i ken sindaun klostu long yu long kingdom bilong yu, narapela long han sut na narapela long han kais.”
Jisas i save husat i bin givim tingting long meri na em i mekim dispela tok, olsem na Jisas i tokim Jems na Jon: “Ating yutupela inap dring long dispela kap mi bai dring long en?”
Tupela i tok: “Mitupela inap.” Nau tasol Jisas i bin tokim ol olsem ol man bai mekim nogut tru long em na kilim em i dai, tasol ating tupela i no pilim as bilong dispela tok olsem em bai dring long wanpela “kap”—ol i no save dispela i makim dai bilong em.
Tasol Jisas i tok: “Tru, yutupela bai i dring long kap bilong mi. Tasol husat bai i sindaun long han sut na long han kais bilong mi, dispela em i no samting bilong mi long makim. Nogat. Dispela ol sia ol i bilong ol man Papa bilong mi i redim pinis bilong ol.”
Taim ol narapela 10-pela aposel i harim tok bilong samting Jems na Jon i askim Jisas long en, ol i kros. Bipo tu ol aposel i bin tok pait long husat i stap namba wan, na ating Jems na Jon i go pas long dispela tok pait. Jisas i bin givim tok long ol bilong stretim tingting bilong ol, tasol dispela samting nau tupela i askim Jisas long en i kamapim klia olsem tupela i no bihainim tok bilong Jisas. Tupela i strong yet long i stap namba wan.
Orait, Jisas i laik stretim tok bilong tupela na em i laik stretim kros em dispela tok i bin kamapim, olsem na em i singautim ol 12-pela i kam long em, na long pasin sori em i tokim ol: “Yupela i save, ol king bilong ol arapela lain i save bosim tru ol lain bilong ol. Na ol bikman bilong ol i save strong tumas long ol manmeri i mas bihainim tok bilong ol. Tasol dispela pasin i no ken i stap namel long yupela. Nogat. Man i laik i stap bikman namel long yupela, em i mas i stap wokman bilong yupela.”
Jisas i stap olsem gutpela piksa ol disaipel i mas bihainim. Em i tok: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” Em i bin wok long helpim ol man, na nau em bai i dai tu bilong helpim ol! Ol disaipel i mas bihainim pasin bilong Jisas na ol i mas laik long mekim wok bilong helpim ol narapela—nogut ol i laik bai ol man i mas mekim wok bilong helpim ol. Na ol i mas i stap olsem man i liklik—nogut ol i laik i stap bikman bilong ol narapela. Matyu 20:17-28; Mak 3:17; 9:33-37; 10:32-45; Luk 18:31-34; Jon 11:16.
▪ Bilong wanem ol disaipel i pret?
▪ Jisas i mekim wanem bilong helpim ol disaipel long save long samting bai painim em?
▪ Tupela aposel i askim Jisas long wanem samting? Ol narapela aposel i ting olsem wanem long dispela?
▪ Jisas i mekim wanem bilong stretim dispela hevi i kamap namel long ol aposel?