Namba 2 Hap
No Gat Hevi Moa Long Graun
1, 2. Planti man i gat wanem narapela tingting?
TASOL planti milion manmeri long olgeta hap i gat narapela tingting—ol i ting gutpela samting bai kamap long bihain. Ol i tok, klostu nau bai nupela taim i kamap na bai i no gat pasin nogut o hevi moa long graun. Ol i bilip tru olsem olgeta samting nogut bai pinis na bai nupela taim tru i kamap. Na ol i tok, lain bilong dispela nupela taim i wok long kamap long nau!
2 Ol dispela manmeri i bilip olsem, long dispela nupela taim bai i no gat pait, o hatpela pasin, o pasin raskol, o pasin i no stret, na bai ol man i no ken i stap rabis. Na bai i no gat sik, o bel hevi, o krai, na ol man i no ken i dai moa. Skin na tingting bilong ol manmeri bai wok long kamap gutpela olgeta, na bai ol inap i stap amamas oltaim long paradais long graun. Ol man i dai pinis bai kirap bek, na bai i gat rot bilong ol i ken i stap oltaim!
3, 4. Bilong wanem ol i bilip tru olsem dispela tingting bilong ol i stret?
3 Olsem wanem? Dispela tingting bilong ol i no gat as bilong en na ol gutpela samting ol i ting bai kamap i no inap kamap tru? Nogat. Bilip i gat strongpela as i givim dispela tingting long ol na ol i bilip tru olsem Paradais i mas kamap. (Hibru 11:1) Ol inap bilip tru olsem, long wanem, Bikpela Man Antap i gat olgeta strong na em i bin wokim olgeta samting, em yet i tok promis long en.
4 Long ol tok promis bilong God, Baibel i tok: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” “God i no save giaman olsem yumi man. . . . Sapos em i promis long mekim wanpela samting, orait em i save mekim. Em i save tok tasol na dispela samting i kamap.” “Bikpela I Gat Olgeta Strong i mekim wanpela strongpela tok olsem, ‘Tru tumas, samting mi tingting pinis long mekim, em bai mi mekim.’ ”—Josua 23:14; Namba 23:19; Aisaia 14:24.
5. I gat wanem ol askim yumi mas save long bekim bilong en?
5 Tasol sapos em laik bilong God long kamapim paradais long graun, no gat hevi, orait bilong wanem em i bin larim ol samting nogut i kamap? Bilong wanem em i wet inap 6,000 yia i kam inap long nau bilong stretim ol hevi? Long ol dispela planti tausen yia i go pinis ol man i bin karim hevi na ating dispela i makim olsem God i no save tingim yumi? O ating i no gat God?