Bilong Mekim Gut Bel Bilong Man i Stap Bel Hevi
“Olgeta samting . . . i pilim pen olsem meri i laik karim pikinini. Na olgeta i krai nogut i stap, i kam inap long nau.” (Rom 8:22) Taim ol i bin raitim dispela tok 1,900 yia samting bipo, ol man i bin karim planti pen na hevi. Planti ol i stap bel hevi tru. Olsem na aposel Pol i tokim ol Kristen: “Strongim bel bilong ol man i [bel hevi].”—1 Tesalonaika 5:14.
Long nau i gat planti hevi moa yet i painim ol man, na planti man tru ol i stap bel hevi. Tasol yumi no ken kirap nogut long dispela, long wanem, Baibel i makim dispela taim bilong yumi em “taim bilong las de,” i gat “planti hevi nogut tru bai i kamap” long dispela taim. (2 Timoti 3:1-5) Jisas i tok profet olsem: Long taim bilong las de ol man bai lukim “ol kain kain samting bilong mekim [ol] i pret nogut tru.” —Luk 21:7-11; Matyu 24:3-14.
Planti man, taim sampela kain hevi i painim ol, olsem wanpela long famili i dai, o marit bilong ol i bruk, o bos i pinisim ol long wok, o ol i gat wanpela bikpela sik, dispela i save mekim na ol i bel hevi. Na sampela man i lukim ol wok bilong ol i no kamap gutpela na ol i ting poroman o famili i no amamas long ol, na dispela i mekim na ol i bel hevi. Yumi save, hevi inap painim olgeta man, tasol taim man i pilim olsem em i no gat rot tru bilong stretim dispela hevi, dispela inap mekim na em bai stap bel hevi nogut tru.
Long bipo tu ol man i bin kisim bikpela bel hevi olsem. Bikpela sik na planti hevi i bin painim Jop, na em i ting God i lusim em. Olsem na em i les long i stap laip. (Jop 10:1; 29:2, 4, 5) Jekop i ting pikinini bilong em i dai pinis na em i bel hevi nogut tru long dispela. Sampela i laik mekim gut bel bilong em, tasol ol i no inap—em i bel hevi nogut tru na em i laik bai em i dai. (Stat 37:33-35) King Devit i bin mekim bikpela rong na bel bilong em i gat tok long dispela, na em i tok: “Bel bilong mi i gat bikpela hevi tru, na mi bagarap.”—Song 38:6, 8; 2 Korin 7:5, 6.
Long nau planti man i bel hevi, long wanem, i gat planti wok tumas ol i mas mekim long olgeta de, na ol i mas subim skin bilong ol long inapim ol dispela wok. Taim man i tingting planti oltaim long ol samting, dispela inap nogutim skin bilong em, na tu, wanpela marasin insait long kru i no wok gut, na dispela i mekim em i bel hevi.—Skelim wantaim Sindaun 14:30.
Samting Bilong Helpim Ol
Baibel i stori long wanpela Kristen bilong Filipai, em Epafroditus, em “i save, [ol poroman] i harim tok long em i gat sik, na dispela i mekim em i bel hevi.” Ol poroman i laik salim sampela kaikai samting i go long Pol long Rom, na ol i salim long han bilong Epafroditus. Tasol bihain sik i painim em na ating em i sem na i ting, ol poroman bai ting em i no bin mekim gut dispela wok. (Filipai 2:25-27; 4:18) Orait, Pol i mekim wanem bilong helpim em?
Em i givim wanpela pas long Epafroditus na salim em i go bek long Filipai bilong givim dispela pas long ol poroman bilong em. Pas i tok: “Yupela i mas amamas tru long kisim Epafroditus . . . Yupela i mas givim biknem long ol dispela kain man.” (Filipai 2:28-30) Pol i litimapim nem bilong Epafroditus, na ol brata long Filipai i amamas long kisim em, na ating dispela i mekim gut bel bilong em.
Olsem na tok bilong Baibel long yumi mas “strongim bel bilong ol man i [bel hevi],” em i gutpela tok tru. Wanpela meri em i bin i stap bel hevi, na em i tok, “Yumi mas save, sampela man i save tingim yumi. Yumi laik bai wanpela i tokim yumi, ‘Mi save yu bel hevi, tasol bai yu orait.’ ”
Taim man i stap bel hevi, em i mas kamapim dispela bel hevi long wanpela man i gat pasin sori na i save putim gut yau long tok bilong man na i no save les kwik. Taim em i harim pinis hevi bilong man, em i no ken toktok strong long em olsem, ‘Yu no ken bel hevi olsem,’ o ‘Tingting bilong yu i kranki.’ Taim man i bel hevi, kain tok olsem bai bagarapim bel bilong em, na em bai bel hevi moa yet.
Sampela man, taim ol i stap bel hevi ol i ting ol i nogut tasol. (Jona 4:3) Samting man i mas tingim, em olsem: God i ting olsem wanem long em; dispela i bikpela samting tru. Tingim Jisas: Ol man i “rabisim em na ol i . . . lukim em olsem man nating.” Tasol God i laikim em tru. (Aisaia 53:3) Orait, olsem tasol God i laikim yu tu.—Jon 3:16.
Jisas i sori long ol man i stap bel hevi na em i laik helpim ol bambai ol i ken save, ol i no samting nating tasol. (Matyu 9:36; 11:28-30; 14:14) Em i stori long ol liklik pisin na em i tok: “God i no save lusim tingting long wanpela bilong ol dispela liklik pisin.” Tasol God i tingim moa yet ol man i laik mekim wok bilong em! Jisas i tok: “God i kaunim pinis olgeta gras long het bilong yupela.”—Luk 12:6, 7.
Tru, taim man i stap bel hevi nogut tru, i hatwok long em i bilip olsem God i save tingim em. Ating dispela man i ting em i no gutpela man na bai God i ken laikim em na tingim em. Baibel i tok, sampela taim “bel bilong yumi i kotim yumi,” tasol God i save, ol man i gat sin na sampela taim ol i ting ol i no gutpela man, na bel bilong ol i save kotim ol. Tasol God i save long bel bilong yumi. Baibel i tok: “God em i save long olgeta samting.”—1 Jon 3:19, 20.
Em nau, gutpela Papa bilong yumi i no save lukim tasol ol sin na popaia bilong yumi. Em i save long olgeta hevi bilong yumi na i stap bilong yumi, na olgeta tingting i stap long bel bilong yumi. Em i save yumi bin kisim sin na sik na dai long namba wan tumbuna papamama, olsem na yumi no inap tru long mekim olgeta samting i stret tasol. Tasol taim yumi bel hevi tru long ol popaia samting bilong yumi, dispela i kamapim klia olsem yumi no laik mekim rong. Olsem Baibel i tok, yumi “stap nogut,” tasol dispela i no kamap long laik bilong yumi. Olsem na taim yumi popaia, God i save marimari long yumi.—Rom 5:12; 8:20.
Baibel i tok: “Bikpela i save . . . marimari long yumi. Hap bilong sankamap em i no klostu long hap bilong san i go daun. Em i longwe tru. Olsem tasol God i save tekewe sin bilong yumi na sin i stap longwe tumas. Em i save olsem em i bin kisim graun na wokim yumi na . . . yumi i olsem das tasol.” (Song 103:8, 12, 14) Tru tumas, Jehova em i “God bilong mekim isi bel bilong olgeta man i gat hevi.”—2 Korin 1:3, 4.
Ol man i stap bel hevi ol i mas i go klostu long dispela God bilong marimari na bihainim tok bilong em long ‘putim olgeta hevi bilong ol i go long em.’ Em inap tru long “strongim bel bilong ol na mekim laip bilong ol i kamap gutpela gen.” (Song 55:22; Aisaia 57:15) Olsem na bilong kirapim yumi long beten, Baibel i tok: “God [Jehova] i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:7) Em nau, beten em i rot bilong i go klostu long God na bai yumi ken kisim ‘bel isi bilong God.’—Filipai 4:6, 7; Song 16:8, 9.
Na man i stap bel hevi, ating em i mas stretim sampela samting long sindaun bilong em, olsem: Em i mas eksasais, na kisim ol gutpela kaikai i save strongim skin, na kisim gutpela slip, na em i no ken lukim televisen oltaim. Wanpela meri i bin tokim sampela manmeri i gat bel hevi, ol i mas wokabaut strong i go longwe liklik, na dispela i bin helpim ol. Wanpela meri i stap bel hevi em i tok: “Mi no laik wokabaut.” Tasol dispela meri i strong na i tok, “Yu mas mekim.” Orait, tupela i wokabaut inap olsem 6-pela kilomita, na taim ol i go bek long haus skin bilong em i les, tasol bel bilong em i gutpela. Olsem meri i tok, eksasais i gutpela samting bilong helpim ol man i stap bel hevi.
Tasol sampela taim dispela i no inap daunim bel hevi olgeta, maski man i traim olgeta samting, na marasin tu. Wanpela meri i tok: “Mi traim pinis olgeta samting, tasol bel hevi bilong mi i stap yet.” Na i olsem tu long sampela man aipas, na yaupas, na ol lek nogut samting—i no inap oraitim ol. Tasol ol man i stap bel hevi, sapos ol i kaunim Baibel, dispela inap mekim gut bel bilong ol na ol inap wetim gutpela samting Baibel i tok bai kamap bihain, olsem olgeta kain sik bilong yumi bai pinis olgeta.—Rom 12:12; 15:4.
Bihain Ol Man i No Ken Bel Hevi Moa
Taim Jisas i stori long ol samting nogut bai kamap long taim bilong las de, em i tok: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.” (Luk 21:28) Jisas i toktok long God bai kisim yumi i go insait long nupela taim em bai kamapim long graun, na long dispela taim “God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru.”—Rom 8:21.
Long dispela taim bihain, olgeta hevi bipo ol man i bin karim ol bai pinis. Na long olgeta de, taim ol i kirap long moningtaim tingting bilong ol bai klia na ol bai amamas long kirap na mekim ol wok bilong dispela de! Bel hevi i no inap daunim moa ol man. God i tok promis olsem: “Ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:3, 4.
Ol tok bilong Baibel long dispela nius mipela i kisim long Buk Baibel.