Helpim i Kam Long “God Bilong Mekim Isi Bel”
KING DEVIT i save bel hevi na i gat ol samting i save mekim em i tingting planti. Tasol em i bilip tru olsem Man Bilong Wokim yumi em i save tru long yumi. Em i tok: “Bikpela, yu skelim pinis bel bilong mi, na yu save tru long mi. Yu save long olgeta samting mi save mekim. Yu stap longwe, tasol yu save long olgeta tingting bilong mi. Na sapos mi laik mekim wanpela tok, yu save pinis long dispela tok.”—Song 139:1, 2, 4, 23.
Yumi tu i ken bilip tru olsem Man Bilong Wokim yumi em i save gut long yumi, na long ol samting nogut sik bilong bel hevi inap mekim long tingting na bodi bilong yumi. Em i save long samting i kamapim sik bilong bel hevi na em i save long samting we inap helpim gut man long karim dispela hevi. Na tu, em i bin tokaut long samting em bai mekim bilong pinisim sik bilong bel hevi. I no gat narapela man inap helpim yumi wankain olsem dispela “God i save mekim isi bel bilong ol manmeri i stap bel hevi.”—2 Korin 7:6.
Tasol ol man husat i gat sik bilong bel hevi, ating ol i laik save long olsem wanem God inap helpim ol taim bel na tingting bilong ol i bagarap.
◼ Olsem wanem? Ol man i bel hevi ol inap i go klostu long God?
God i stap klostu tru long ol wokman bilong em husat i gat sik bilong bel hevi, i olsem em i stap wantaim ol. Em i “save strongim bel bilong ol na mekim laip bilong ol i kamap gutpela gen.” (Aisaia 57:15) Em i gutpela samting tru long save olsem “God i save stap klostu long ol manmeri i gat hevi”!—Song 34:18.
◼ Long wanem rot God inap mekim gut bel bilong ol?
Long olgeta kain taim long olgeta de, ol man i lotuim God ol inap toktok wantaim Man bilong “harim beten,” na em inap helpim yumi taim yumi bel hevi. (Song 65:2) Baibel i kirapim yumi long autim olgeta tingting i stap long bel bilong yumi: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.”—Filipai 4:6, 7.
◼ Olsem wanem sapos yumi pilim olsem yumi no gutpela tumas na God i no harim beten bilong yumi?
Sik bilong bel hevi inap mekim na yumi pilim olsem yumi no inapim olgeta samting yumi mas mekim bilong amamasim God. Tasol Papa bilong yumi long heven, “em i tingim yumi i olsem das tasol,” olsem na em i kliagut long as bilong ol tingting i stap long bel bilong yumi. (Song 103:14) “Maski sapos bel bilong yumi i kotim yumi long wanpela samting,” yumi inap bilip olsem “God em i save long olgeta samting, na save bilong en i winim tru save i stap long bel bilong yumi.” (1 Jon 3:19, 20) Olsem na long beten bilong yu, yu inap kolim ol hap tok i kam long ol kain skripsa olsem Song 9:9, 10; 10:12, 14, 17; na 25:17.
◼ Olsem wanem sapos bel hevi i mekim na yumi pilim hatwok long kamapim tingting i stap long bel?
Taim bel bilong yumi i bagarap olgeta na i hatwok long yumi mekim wanpela tok, orait no ken givap! Wok yet long i go klostu long “Papa bilong yumi, . . . em i as bilong olgeta pasin marimari na pasin sori” na em i save “mekim isi bel bilong olgeta man i gat hevi,” na yumi mas save olsem em i kliagut long tingting bilong yumi na ol samting yumi sot long en. (2 Korin 1:3) Maria, em yumi bin stori long em long pastaim, em i tok: “Sampela taim tingting bilong mi i save paul olgeta na mi no save long samting mi mas beten long en. Tasol mi save olsem God i kliagut long tingting bilong mi na em i save helpim mi.”
◼ God i harim beten na helpim yumi olsem wanem?
Baibel i no tok olsem God i save tekewe olgeta hevi bilong yumi long nau. Tasol God i save strongim yumi long karim hevi bilong “olgeta samting”—dispela i makim tu sik bilong bel hevi. (Filipai 4:13) Martina i tok: “Taim mi kisim sik bilong bel hevi long namba wan taim, mi beten long Jehova i ken oraitim mi hariap, long wanem, mi ting olsem mi no inap long karim dispela hevi. Tasol long nau, mi belgut olsem long olgeta wan wan de mi inap beten askim Jehova long strongim mi.”
Ol tok bilong Baibel i olsem nambawan rot bilong God long strongim ol man i gat sik bilong bel hevi. Sarah i gat sik bilong bel hevi—dispela sik i stap winim 35 yia—na em i bin kisim bikpela helpim long pasin bilong ritim Baibel long olgeta de. Em i tok: “Mi tenkyu tru long ol samting ol dokta i bin mekim bilong helpim mi. Tasol bikpela samting moa, mi luksave olsem pasin bilong ritim Tok Bilong God i save helpim man long ol samting bilong spirit na bilong skin. Nau pasin bilong ritim Baibel i kamap olsem pasin bilong mi.”
Sik Bilong Bel Hevi Bai Pinis Olgeta!
Taim Jisas Krais i bin i stap long graun, em i yusim strong God i bin givim long em bilong oraitim sik bilong ol man. Jisas i laik tru long helpim ol man i gat ol bikpela sik. Na tu, em yet i bin pilim dispela pen bilong bel hevi. Long nait paslain long ol i givim pen long em na kilim em i dai, ‘em i mekim prea na beten long God, em i save, God inap long kisim bek em, na em i no mas i dai, olsem na em i beten strong long God, na em i singaut strong na i krai planti.’ (Hibru 5:7) Maski Jisas i bin pilim hevi nogut tru, dispela i helpim yumi long nau. Em “inap long helpim ol manmeri long taim ol traim i kamap long ol.”—Hibru 2:18; 1 Jon 2:1, 2.
Baibel i kamapim klia olsem God i tingting pinis long tekewe olgeta samting we i save kamapim sik bilong bel hevi. Em i tok promis olsem: “Mi wokim nupela skai na nupela graun. Na ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.” (Aisaia 65:17, 18) Dispela “nupela skai,” Kingdom Bilong God, bai kamapim bek “nupela graun,” em wanpela lain manmeri long graun em ol i bihainim stretpela pasin, na ol bai i kamap gutpela olgeta long skin, na long bel na tingting, na long ol samting bilong spirit. Olgeta kain sik bai pinis olgeta.
[Rait long pes 9]
“Bikpela, mi stap nogut tru na i olsem mi bin stap long ples bilong ol man i dai pinis. Na mi singaut long yu long helpim mi. Mi bin singaut olsem, ‘Plis Bikpela, yu ken harim krai bilong mi. Yu no ken pasim yau.’ Na yu bin harim dispela singaut bilong mi. Na yu bin kam klostu long mi na yu tok long mi no ken pret.”—Krai 3:55-57
[Blok/Piksa long pes 7]
‘MEKIM GUT BEL BILONG OL MAN I BEL HEVI’
Barbara i gat sik bilong bel hevi na em i save pilim olsem em i samting nating tasol. Taim ol dispela samting i daunim em olgeta, em na man bilong em i save ringim Gerard, em i pren bilong tupela na em i wanpela elda Kristen. Em i no save les long putim yau taim Barbara i krai planti na mekim ol wankain tok olsem em i bin mekim bipo bilong kamapim bel hevi bilong em.
Gerard i lain pinis long putim gut yau na em i no skelim skelim, o tok pait, o tokim Barbara olsem pasin bilong em i no stret, nogat. (Jems 1:19) Olsem Baibel i tok, em i bin lain long “strongim bel bilong ol man i save pret [“bel hevi,” NW ].” (1 Tesalonaika 5:14) Em i strongim bel bilong Barbara na tokim em olsem em i dia tumas long ai bilong God Jehova, long famili, na long ol pren bilong em. Em i save ritim wanpela o tupela skripsa bilong Baibel bilong mekim gut bel bilong Barbara, maski bipo em i bin ritim pinis sampela bilong ol dispela skripsa long em. Na em i save askim sapos em inap beten wantaim Barbara na man bilong em long rot bilong telefon; tupela i pilim olsem oltaim dispela i save mekim gut bel bilong tupela.—Jems 5:14, 15.
Gerard i save olsem em i no wanpela dokta, na em i no save mekim olsem em i laik kisim wok bilong dokta. Tasol em i save mekim samting em planti dokta i no mekim—kamapim ol skripsa na mekim ol beten bilong mekim gut bel bilong Barbara.
Bilong ‘mekim gut bel bilong ol man i bel hevi’
Yu ken tok: “Mi laik tokim yu olsem mi wok long tingting long yu. Mi save olsem sampela taim yu no save pilim gutpela tumas. Long nau yu pilim olsem wanem?”
Tingim: Krai bilong nek i mas soim olsem yu pilim tru tok yu mekim, na putim gut yau na pilim hevi bilong em taim em i toktok, maski sapos em i mekim ol wankain tok olsem em i bin mekim bipo.
Yu ken tok: “Mi kirap nogut long ol wok yu mekim (o “Mi kirap nogut long ol gutpela pasin Kristen yu save mekim” ) maski helt bilong yu i no gutpela tumas. Maski sapos yu pilim olsem yu no mekim planti wok tumas, Jehova i laikim yu tumas na em i amamas long yu, na mipela tu i laikim yu tumas na amamas long yu.”
Tingim: Sori long em na mekim gut long em.
Yu ken tok: “Mi lukim dispela naispela skripsa.” O “Mi tingim yu taim mi ritim dispela ves bilong Baibel em mi save laikim tumas.” Orait nau ritim o kolim dispela ves.
Tingim: Krai bilong nek i no ken makim olsem yu laik givim skultok long em.
[Blok long pes 9]
Ol Tok Bilong Baibel i Mekim Gut Bel
Lorraine i kisim strong long tok promis bilong Jehova long Aisaia 41:10: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.”
Álvaro i tok Song 34:4, 6 i save mekim gut bel bilong em: “Mi bin beten long Bikpela bai em i helpim mi, na em i harim prea bilong mi. Em i rausim olgeta pret long bel bilong mi, na nau mi stap bel isi. Ol rabisman i prea long Bikpela na em i harim prea bilong ol, na i helpim ol long olgeta hevi bilong ol.”
Naoya i tok taim em i ritim Song 40:1, 2, dispela i save mekim gut bel bilong em: “Mi sindaun isi na mi wetim Bikpela i helpim mi. Na em i marimari long mi na i harim prea bilong mi . . . na mi wokabaut strong gen.”
Song 147:3 i strongim Naoko olsem Jehova “i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.”
Ol tok bilong Jisas long Luk 12:6, 7 i helpim Eliz long bilip olsem Jehova i tingim em: “Ol man i save baim 5-pela liklik pisin long 2 toea tasol. Na God i no save lusim tingting long wanpela bilong ol dispela liklik pisin. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.”
Sampela ves moa bilong Baibel:
Song 39:12: “Bikpela, harim prea bilong mi. Putim gut yau long singaut bilong mi. Yu no ken pasim yau long taim mi singaut long yu.”
2 Korin 7:6: “God i save mekim isi bel bilong ol manmeri i stap bel hevi.”
1 Pita 5:7: “God i save wari long yupela. Olsem na olgeta hevi yupela i karim, yupela i mas putim long han bilong en.”