Stadi 2
God Em i Husat?
Trupela God em i husat, na nem bilong em husat? (1, 2)
Em i gat wanem kain bodi? (3)
Wanem ol bikpela pasin bilong em? (4)
Yumi ken mekim wok long ol imis na piksa samting taim yumi lotu long em? (5)
I gat wanem tupela rot bilong kisim save long God? (6)
1. Ol man i save lotu long planti samting. Tasol Baibel i tokim yumi olsem i gat wanpela TRUPELA God tasol. Em i bin wokim olgeta samting long heven na long graun. Em i givim laip long yumi, olsem na yumi mas lotu long em wanpela tasol.—1 Korin 8:5, 6; KTH 4:11.
2. God i gat planti biknem, tasol em i gat wanpela nem tasol. Dispela nem em JEHOVA. Long planti Baibel ol man i bin rausim nem bilong God na raitim BIKPELA o GOD. Tasol taim ol i raitim Baibel long pastaim, dispela nem Jehova i stap 7,000 taim long en!—Lukim sta long Kisim Bek 3:15; Song 83:18, NW.
3. Jehova i gat bodi, tasol i no wankain olsem bilong yumi. Baibel i tok, “God em i Spirit.” (Jon 4:24) Ol spirit i winim yumi. No gat wanpela man i bin lukim God. Jehova i stap long heven, tasol em inap lukim olgeta samting. (Song 11:4, 5; Jon 1:18) Tasol holi spirit em i wanem samting? Em i no wanpela man olsem God. Em i strong bilong God.—Luk 24:49.
4. Baibel i kamapim klia ol pasin bilong Jehova. Em i tok ol bikpela pasin bilong God em pasin laikim, stretpela pasin, savetingting, na bikpela strong. (Lo 32:4; Jop 12:13; Aisaia 40:26; 1 Jon 4:8) Na tu, Baibel i tokim yumi olsem God i gat pasin marimari, pasin helpim, em i save lusim rong bilong man, em i save givim planti samting long ol man, na em i no les kwik long man. Yumi, olsem ol gutpela pikinini bilong em, i laik bihainim ol pasin bilong em.—Efesus 5:1, 2.
5. Olsem wanem? Taim yumi lotuim God, yumi ken brukim skru long ol imis o piksa samting? Nogat! (Kisim Bek 20:4, 5) Jehova i tok yumi mas lotuim em wanpela tasol. Em i no laik wanpela man o wanpela samting i kisim biknem olsem em. Ol imis i no gat strong long helpim yumi.—Song 115:4-8; Aisaia 42:8.
6. Olsem wanem yumi ken save moa long God? Wanpela rot i olsem: Yumi ken lukim ol samting em i bin wokim na tingim gut olsem wanem ol dispela samting i lainim yumi long ol pasin bilong em. Ol samting God i bin wokim i soim yumi olsem em i gat bikpela strong na savetingting. Olgeta samting em i bin wokim i kamapim klia pasin laikim bilong em. (Song 19:1-6; Rom 1:20) Narapela rot bilong kisim save long God i olsem: Yumi ken stadi long Baibel. Long Baibel em i tokim yumi olsem em i wanem kain God. Em i tokim yumi long laik bilong em na ol samting em i laik yumi mas mekim.—Amos 3:7; 2 Timoti 3:16, 17.
[Ol Piksa long pes 5]
Yumi ken kisim save long God long rot bilong ol samting em i bin wokim na long rot bilong Baibel