Baibel i Tok Wanem?

I Stret Yumi Lotuim God Long Rot Bilong Ol Imis?

“Ol i bin skulim mi olsem ol imis bai mekim mi i stap klostu moa long God.”​​—⁠Mack.

“Ol imis i pulap long haus bilong mipela. Mipela i ting dispela i mekim na God bai amamas long haus bilong mipela.”​​—⁠Herta.

“Mipela i save brukim skru long sampela imis. Mipela i no tingim dispela i mekim wanem long tingting bilong God.”​​—⁠Sandra.

YU GAT wanem tingting long ol dispela tok i stap antap? Planti man i ting olsem ol imis i helpim ol long lotuim God. Yu ting dispela tingting i stret? Bikpela samting moa, God i gat wanem tingting long dispela? Skelim tok bilong em long Baibel Holi.

Tingting Bilong God Long Ol Imis

Olgeta samting ol man i mekim wok long en bilong lotu long en, dispela samting i olsem wanpela imis. Em ol samting olsem kruse, ol piksa, o ol narapela piksa ol i wokim long ol samting i stap long heven o long graun.a Ol fleg tu inap kamap olsem samting bilong lotu long en.

Pasin bilong lotuim ol imis i stap planti tausen yia pinis. Olsem na long 1513 B.C.E., taim God i givim Tenpela Lo long nupela lain Israel, em i kamapim klia tingting bilong em long ol imis. Em i tok: “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi. Nogat tru.”​—⁠Kisim Bek 20:​4, 5.

Tingim tupela samting insait long dispela tambu God i bin givim long ol: Namba wan samting, lain bilong God i no ken wokim ol imis bilong lotu, na namba tu samting, ol i “no ken brukim skru” long ol o lotuim ol. Bilong wanem Man Bilong Wokim yumi i tambuim pasin bilong wokim ol imis? Wanpela as na yumi no ken wokim imis bilong God em i olsem: “I no gat wanpela man i bin lukim God.” Jehova em i no gat bodi bilong graun olsem bilong yumi man, nogat, em i spirit na em i save stap long ples spirit. (Jon 1:18; 4:24) Narapela as na yumi no ken wokim ol imis bilong ol samting em long wanem God i “no inap larim wanpela giaman god i senisim [em],” yumi mas lotuim em wanpela tasol. Em i tok: “Yupela i mas givim biknem long mi wanpela tasol. Yupela i no ken litimapim nem bilong ol giaman god, em ol man yet i wokim.” (Aisaia 42:⁠8) Dispela em i as na i no stret long wokim ol imis bilong helpim yumi long lotu. Taim Aron, wanpela lida bilong lain Israel i mekim olsem, dispela i mekim Jehova i bel hevi tru.​​—⁠Kisim Bek 32:​4-​10.

Bilong Wanem Yu No Ken Brukim Skru Long Ol Imis?

Baibel i tok long ol imis olsem: “Ol giaman god i gat maus, tasol ol i no inap toktok. Ol i gat ai, tasol ol i no inap lukluk. Ol i gat yau, tasol ol i no inap harim toktok.” Na i tok moa olsem: “Ol man i wokim ol giaman god, ol i ken kamap wankain olsem ol giaman god ol i bin wokim.”​—⁠Song 115:​4-8.

Pasin bilong lotuim ol imis em pasin i no stret. Askim yu yet, ‘Bai mi pilim olsem wanem sapos mi givim wanpela gutpela presen tru long pikinini bilong mi na em i go tok tenkyu long narapela man o long wanpela samting i no gat laip?’ Dispela inap helpim yu long pilim tingting bilong Man Bilong Wokim yumi na Man Bilong Givim Laip long yumi taim ol narapela​—⁠na ol imis i no gat laip​—⁠i kisim biknem na rispek i stret long em tasol i kisim.​​—⁠KTH 4:⁠11.

Tingim, God i wokim ol manmeri i kamap olsem em yet, olsem na taim ol i lotuim samting i no gat laip, dispela i daunim tru ol yet! (Stat 1:27) Aisaia i stori long sampela manmeri i mekim kain pasin olsem, na i tok: “Ol i save mekim lotu long ol dispela samting ol i wokim long han bilong ol yet. Bikpela, yu bai daunim olgeta man na bai ol i sem nogut tru. Bikpela, yu no ken lusim sin bilong ol.”​—⁠Aisaia 2:​8, 9.

Samting i mekim na God i no laikim tru ol lotu giaman em ol i save lotuim ol spirit nogut​​—⁠em ol birua bilong God. Olsem Lo 32:17 i tok, taim lain Israel i lusim Jehova na lotuim ol imis “ol i mekim ol ofa long ol masalai” na i no long God.

Olsem wanem? Ol disaipel bilong Jisas Krais long pastaim ol i bin lotuim ol imis o yusim ol imis bilong helpim ol long lotu? Nogat tru! Aposel bilong Jisas, em Jon, i tok: “Ol liklik pikinini bilong mi, yupela i mas i stap longwe long olgeta giaman god.” (1 Jon 5:21) Buk Early Church History to the Death of Constantine i tok: “Pasin bilong lotuim imis em i wanpela samting nogut tru long tingting bilong ol disaipel bilong bipo.”

Stretpela Pasin Bilong Lotu

Jisas i tok: “Olgeta man i laik lotu tru bai ol i lotu long Papa long strong bilong Holi Spirit na long pasin i tru. Na Papa i laikim tumas bai ol kain man olsem i mas lotu long em.” (Jon 4:23) Yes, God i laik bai yumi mas save long em​—⁠ol samting em i laikim na i no laikim, ol lo bilong em, na ol samting em i laik mekim bilong helpim yumi. (Jon 17:⁠3) Dispela em as na em i kamapim ol tok bilong Baibel. (2 Timoti 3:​16) Na tu, God “i no i stap longwe long yumi olgeta wan wan,” olsem na yumi ken beten long em long kain kain taim na ples, na yumi no gat wok long kisim helpim long ol imis.​—⁠Aposel 17:⁠27.

Sandra, pastaim yumi kamapim sampela tok bilong em, i tok: “Taim mi go insait long Haus Kingdom bilong ol Witnes Bilong Jehova, mi no lukim ol imis bilong lotu. Ol Witnes i yusim Baibel bilong soim mi long ol pasin bilong God na ol samting em i laik yumi mas mekim. Na mi lain long beten long God na em i ken harim beten bilong mi. Nau mi pilim olsem mi save gut long Man Bilong Wokim yumi na mi pas gut wantaim em.” Sandra i lain olsem ol tok i tru bilong Baibel inap givim nupela strong na inap helpim yumi. (Jon 8:​32) Yu tu inap lain long dispela samting.

[Futnot]

YU LAIK SAVE?

◼ Bilong wanem yumi mas sakim pasin bilong lotuim ol imis?​​—⁠Song 115:​4-8; 1 Jon 5:​21.

◼ Yumi mas lotuim God tru long wanem kain pasin?​​—⁠Jon 4:​24.

◼ Olsem wanem yu inap lainim tok i tru bilong God? Na olsem wanem dispela inap helpim yu?​​—⁠Jon 8:​32; 17:⁠3.