Kisim Helpim Long Awake!
DISPELA STORI I KAM LONG BENIN
◼ Taim Noël, husat i gat 23 krismas, i tingting long lusim skul na mekim wok autim tok fultaim olsem wanpela Witnes Bilong Jehova, ol famili bilong em i tingting planti long olsem wanem em bai kisim inap mani bilong lukautim em yet. Em i bin hatwok long painim wanpela wok haptaim i stret long em. Olsem na taim nius Kirap! i kamapim stori “Faipela Rot Bilong Painim Wok,” Noël i ritim gut dispela stori inap sampela taim.a Olsem wanem? Dispela i bin helpim em? Yes, tasol i no long rot em i tingim.
Dairekta bilong wanpela skul i lukim Noël i autim tok long ol haus na em i askim Noël sapos em i wanpela Witnes Bilong Jehova. Dairekta i sot long wanpela tisa, na em i bin lukim olsem ol Witnes Bilong Jehova i save mekim gut wok tisa, olsem na em i askim Noël sapos em i save long wanpela Witnes husat i gat laik long mekim wok tisa. Taim Noël i tok nogat, dairekta i askim em, “Olsem wanem long yu?”
Noël i no bin mekim wok tisa bipo long wanpela skul, na tu, sampela taim maus bilong em i save guria taim em i kolim tok. Long Benin, dispela em wanpela hevi, bikos ol bikman bilong ediukesen i save givim eksem long ol tisa bilong skelim olsem maus i save guria long kolim tok o nogat. Dairekta i tok: “Kisim setifiket na bai yu ken kisim wok.”
Noël i bin mekim gut tok long Skul Tiokratik Bilong Autim Tok, em wanpela skul i save helpim ol man long mekim gut tok long ai bilong ol narapela na i save kamap olgeta wik long ol kongrigesen bilong ol Witnes Bilong Jehova. Na tu, em i save mekim ol pablik tok long kongrigesen em i stap long en. Maski i olsem, em i pret taim em i go mekim eksem.
Man bilong givim eksem i givim wanpela magasin long em na i askim em long ritim strong dispela paragraf ol i makim long retpela kala. Ai bilong Noël i op stret taim em i lukim stori “Faipela Rot Bilong Painim Wok.” Em i ritim gut tru paragraf na em i kisim setifiket.
Bihain, man bilong givim eksem i tok, olgeta taim em i save ritim ol magasin bilong ol Witnes Bilong Jehova, na em i tok: “Dispela ol magasin i gat ol gutpela stori na ol i raitim gut tru ol tok bilong en, olsem na planti taim mi save yusim ol long taim bilong eksem.”
Noël i kirap mekim wok tisa, na dairekta i laik em bai wok yet long yia antap, tasol Noël i gat tingting long mekim narapela samting. Ol i bin singautim Noël i kam wok long brens ofis bilong ol Witnes Bilong Jehova, em hap nau em i wok long en.
[Futnot]