Yu Ting Ol Piksa Inap Helpim Yu Long Lotuim God?
PLANTI piksa bilong lotu bilong ol Isip na Babilon na Grik ol i pulap long ol haus tumbuna long nau. Ol piksa, em bipo ol man i bin givim biknem long ol, nau ol i stap nating olsem bilas nating bilong bipo. Ol man i lotuim ol dispela kain piksa ol i ting ol piksa i gat strong, tasol nogat; ol i piksa nating tasol. Taim ol lain i bin givim biknem long ol dispela piksa i pinis, nau ol man i no bilip moa olsem ol dispela piksa i gat strong. Samting i kamap ples klia em olsem: Ol dispela piksa i no gat strong—ol i piksa nating ol man i bin wokim long diwai na ston na ain—ol i no gat laip.
Tasol olsem wanem long ol piksa ol man bilong nau i givim biknem long ol na lotuim ol? Yu ting ol dispela piksa i gat bikpela strong, winim strong bilong ol piksa bilong ol Isip na Babilon na Grik bilong bipo? Yu ting ol i bin helpim ol man long lotuim God?
Ol manmeri i save dai na nupela lain i save kamap na senisim ol, na ol dispela nupela lain long nau i wok long lusim God. Na ol piksa bilong lotu long olgeta hap ol inap mekim wanem long dispela? Sapos man i no lukautim ol, das i save karamapim ol na isi isi ol i wok long ros o bagarap. Ol piksa i no inap lukautim ol yet, na ol i no inap mekim wanpela samting bilong helpim ol manmeri. Tasol bikpela samting em olsem: Baibel i tok wanem long dispela samting?
I Gat Bikpela Pe, na Planti Bilas, Tasol Ol i No Inap Helpim Man
Baibel i kamapim klia olsem ol piksa bilong lotu ol i no inap mekim wanpela samting na ol i no inap tru long helpim man long lotuim God. Planti piksa bilong lotu, olsem ol god giaman, ol i gat bikpela pe na planti bilas, tasol Baibel i sutim tok stret long ol olsem: “Ol arapela lain i bin wokim ol giaman god bilong ol long gol na silva. Ol man tasol i bin wokim ol. Ol giaman god i gat maus, tasol ol i no inap toktok. Ol i gat ai, tasol ol i no inap lukluk. Ol i gat yau, tasol ol i no inap harim toktok. Ol i gat nus, tasol ol i no inap smelim samting. Ol i gat han, tasol ol i no inap holim samting. Na ol i gat lek, tasol ol i no inap wokabaut. Na ol i no inap mekim wanpela singaut na wanpela krai. Ol man i wokim ol giaman god, ol i ken kamap wankain olsem ol giaman god ol i bin wokim. Na ol manmeri i save bilip long ol giaman god, ol tu i ken kamap olsem.”—Buk Song 115:4-8.
Baibel i kamapim klia olsem ol piksa, olsem god giaman, ol i no inap mekim wanpela samting, na tu, Baibel i tokaut strong olsem pasin bilong wokim na lotuim ol piksa, olsem god giaman, i no stret. Baibel i tok: “Ol dispela god i samting nating, olsem ol piksa bilong man, ol papa bilong gaden i save putim long gaden bilong pretim ol pisin. Ol dispela god i no inap toktok. Na ol i no inap wokabaut, olsem na ol man i mas karim ol. Yupela i no ken pret long ol, long wanem, ol i no inap mekim wanpela samting nogut. Na tu ol i no inap mekim gutpela pasin. Ol man i . . . longlong na i no gat save. Ol man bilong wokim ol giaman god long gol, ol bai i sem long ol dispela samting ol i bin wokim. Ol dispela god i no samting tru. Ol i no gat laip. Ol i samting nating tasol, na ol man i ken tok bilas long ol. Bai ol dispela god i bagarap na i pinis olgeta.”—Jeremaia 10:5, 14, 15.
Tingting Bilong Ol Katolik
Planti man, em ol i save brukim skru long ol piksa bilong lotu, na beten na laitim kandel na givim kis long ol dispela kain piksa, ol i no ting olsem ol i man bilong lotuim god giaman, nogat. Olsem: Ol Katolik i tok, ol piksa bilong Krais na Maria i makim tupela na long dispela as ol i givim biknem long ol—ol i no ting olsem ol piksa yet i olsem Krais na Maria na lotuim olsem wanpela god. Nogat. Wanpela buk (The World Book Encyclopedia) i tok, ‘long Misin Katolik, ol man i givim biknem long ol piksa, olsem mak tasol bilong ol man em ol piksa i makim.’ Ol pris Katolik i bin tokim ol man i stret long ol i givim biknem long ol piksa sapos dispela biknem i no winim biknem ol i mas givim long God yet.
Tru tumas, ol i save givim biknem long ol dispela kain piksa. Wanpela buk bilong lotu (New Catholic Encyclopedia) i tokaut olsem dispela pasin bilong givim biknem long piksa bilong lotu i olsem ‘pasin bilong lotuim’ piksa. Tasol Krais Jisas i daunim pasin bilong lotuim God long rot bilong ol piksa, na em i tok: “I no gat wanpela man inap i kam long Papa long narapela rot. Nogat. Long mi tasol.” (Jon 14:6) Olsem na yumi no ken kirap nogut long ol Kristen bilong pastaim i bin sakim pasin bilong lotuim God long rot bilong ol piksa bilong lotu.
Tasol ol misin i holim nating nem Kristen ol i gat planti planti piksa bilong lotu, winim ol narapela lotu. Planti piksa bilong lotu bilong bipo, ol i bagarap pinis o nau ol i stap nating long ol haus tumbuna, olsem na ol man i givim biknem long ol, ol i mekim longlong pasin, na Baibel tu i makim olsem ol i mekim pasin longlong. Tasol long olgeta hap ol man i tok ol i Kristen ol i wok yet long brukim skru na beten long ol piksa, olsem rot bilong lotuim God. Bilong wanem ol i mekim olsem?
Wanpela Birua i Paulim Tingting Bilong Ol
Profet Aisaia i tok ol man long taim bilong em ol i lotuim ol piksa, olsem god giaman, ol i no save ol i mekim longlong pasin, long wanem “i olsem wanpela samting i pasim ai bilong ol na ol i no inap lukluk. Na i olsem wanpela samting i paulim tingting bilong ol na ol i mekim dispela longlong pasin.” (Aisaia 44:18) Yu ting husat i gat bikpela strong olsem bilong paulim tingting bilong ol man? Ol lain i bung long 754 (C.E.) bilong toktok long bagarapim ol piksa bilong lotu, olsem god giaman, ol i tokaut olsem Satan i bin kamapim dispela pasin bilong givim biknem long ol piksa, bilong paulim tingting bilong ol man na bai ol i lusim God tru. Yu ting dispela tokaut i stret?
Yes, i stret, long wanem, Baibel tu i tokaut olsem. Planti handet yia paslain long tokaut bilong dispela bung, Baibel i bin tok nambawan birua bilong God, em Satan, “em i bin pasim tingting bilong ol dispela man i no bilip” na bai lait bilong tok i tru i “no inap i go insait long bel bilong ol.” (2 Korin 4:4) Olsem na taim man i givim biknem long piksa bilong lotu, dispela i no helpim em long lotuim God. Nogat. Em i lotuim ol spirit nogut.—1 Korin 10:19, 20.
Rot Bilong Lotuim God
Ol piksa i no inap helpim yumi long lotuim God. Nogat. Man bilong wokim yumi, em God Jehova, i nolaik tru long pasin bilong givim biknem long ol piksa bilong lotu, olsem god giaman. (Lo 7:25) “[Jehova] tasol em i God, na em bai i no inap larim ol manmeri i lotuim ol giaman god.” (Nahum 1:2) Em i tok: “[Jehova], em nem bilong mi, na yupela i mas givim biknem long mi wanpela tasol. Yupela i no ken litimapim nem bilong ol giaman god, em ol man yet i wokim.” (Aisaia 42:8) Olsem na Baibel i tokaut olsem ol man i givim biknem long ol piksa bilong lotu “ol bai i no inap i go insait long kingdom bilong God.”—Galesia 5:19-21.
Tasol Jehova em i God bilong marimari na em i save lusim tingting long ol rong bilong man. Baibel i stori long sampela man ol i lusim god giaman bilong ol na ol i tanim bel i go long God, na taim ol i lusim pinis pasin bilong lotuim god giaman, orait, nau God i kolim ol stretpela man. (1 Korin 6:9-11; 1 Tesalonaika 1:9) Ol i bihainim tok bilong Jisas, em i tok: “God em i Spirit. Na ol man i lotu long em, ol i mas lotu long . . . pasin i tru.”—Jon 4:24.
Sapos yumi skelim gut ol tok bilong Baibel, bai yumi kisim save olsem i no hatwok long i go klostu long God. (Aposel 17:26-28) Em i man bilong pasin sori na yumi no ken pret long i go klostu long em long rot bilong beten, na em i laik bai yumi kamap wanbel wantaim na wok long kamap gutpela pren bilong em.—Aisaia 1:18.
Ol Witnes Bilong Jehova i laik bai yu kisim save long Papa bilong yumi i stap long heven, em i Bikpela Man bilong antap, na yu kisim save long nem bilong em, em Jehova, na ol pasin bilong em, na ol samting em i bin mekim long ol man. Long rot bilong Baibel, em Tok bilong em, bai yu kisim save olsem ol piksa samting i no rot bilong helpim yu long lotuim em. Nogat. Tasol sapos yu i “go klostu tru long God,” orait “em bai i kam klostu tru long [yu].”—Jems 4:8.
[Blok long pes 6]
Ol Man Bilong Raitim Stori Bilong Bipo i Tok . . .
◻ ‘Ol man i save, lotu Buda i bin kamap long yia 550 samting paslain long Krais, tasol i no gat wanpela piksa ol i wokim bilong man i as bilong dispela lotu i go inap yia 50 samting (C.E.).’
‘Inap planti handet yia lotu Hindu i no gat ol piksa bilong lotu.’
‘Pastaim lotu Hindu na lotu Buda i no gat ol piksa bilong lotu, tasol bihain, isi isi ol i wok long kisim. Ol misin i gat nem Kristen ol tu i bin mekim olsem.’—The Encyclopedia of Religion bilong Mircea Eliade.
◻ ‘Ol stori bilong Baibel i kamapim klia olsem ol man i lotu tru long God ol i no bin mekim wok long ol piksa bilong lotu. Nupela Testamen tu i tambuim pasin bilong lotuim ol narapela god na ol piksa, olsem god giaman.’—New Catholic Encyclopedia.
◻ ‘Ol Kristen bilong pastaim ol i no mekim wok long ol piksa bilong lotuim God.’—Cyclopedia of Biblical, Theological, and Ecclesiastical Literature, bilong McClintock na Strong.
◻ ‘Long Nupela Testamen na ol stori ol man i bin raitim long taim bilong ol Kristen bilong pastaim, i no gat liklik hap tok olsem ol man i bin lotuim God long rot bilong ol piksa long ples klia o long ples hait. Nogat.’—A Concise Cyclopedia of Religious Knowledge, bilong Elias Benjamin Sanford.
◻ ‘Sapos ol Kristen bilong pastaim i harim tok olsem ol man i laik putim ol piksa bilong lotu insait long ol haus lotu, ol i mas kirap nogut. Ol i ting pasin bilong brukim skru o beten long ol dispela kain piksa i olsem pasin bilong lotuim god giaman.’—History of the Christian Church, bilong John Fletcher Hurst.
◻ ‘Ol Kristen bilong pastaim ol i wok long birua long pasin bilong wokim ol piksa bilong Krais na ol santu na pasin bilong givim biknem long ol.’—The New Encyclopædia Britannica.
◻ ‘Ol Kristen bilong pastaim ol i no sakim ol piksa nating bilong bilas, tasol ol i no gat ol piksa bilong Krais.’—Schaff-Herzog Encyclopedia of Religious Knowledge.
[Piksa long pes 7]
Jisas i tokaut strong olsem God i wok long painim ol man i “lotu long em . . . long pasin i tru”