Stadi 12

Tingim Gut Laip na Blut

Yumi mas i gat wanem tingting long laip? (1) rausim bel? (1)

Olsem wanem ol Kristen i kamapim klia olsem ol i tingim seifti bilong ol man? (2)

I gat rong long kilim ol animal? (3)

Wanem sampela pasin i makim olsem man i no tingim gut laip? (4)

God i givim wanem lo long blut? (5)

Dispela lo i makim tu blut ol i givim long man long haus sik? (6)

1. Jehova em i As bilong laip. Olgeta samting i stap laip, long wanem, God i bin givim laip long ol. (Song 36:⁠9) God i ting laip em i samting i holi. Laip bilong pikinini i stap yet long bel bilong mama, em tu i gutpela samting long ai bilong Jehova. Man i kilim i dai bebi i wok long kamap long bel, em i mekim pasin nogut long ai bilong God.​—⁠Kisim Bek 21:​22, 23, NW; Song 127:⁠3.

2. Ol trupela Kristen i tingim gut seifti bilong ol man. Ol i was gut, nogut ka o samting long haus bilong ol i bagarapim man. (Lo 22:⁠8) Ol man i mekim wok bilong God ol i no insait long sampela kain amamas em inap bagarapim laip bilong man. Olsem na ol i no insait long ol spot i save bagarapim ol narapela. Ol i abrusim ol amamas i kirapim man long pait samting.​—⁠Song 11:⁠5, NW; Jon 13:⁠35.

3. Laip bilong ol animal em tu i samting holi long God. Kristen i ken kilim ol animal bilong kisim kaikai o klos o bilong lukautim em na bai em i no ken kisim bagarap o sik. (Stat 3:21; 9:3; Kisim Bek 21:28) Tasol i no stret long mekim nogut long ol animal o kilim ol bilong painim amamas o mekim olsem spot.​—⁠Sindaun 12:⁠10.

4. Ol Kristen i no save smok, o kaikai buai, o kisim drak. Ol dispela pasin i no stret, long wanem, (1) ol i kalabusim yumi, (2) ol i bagarapim skin bilong yumi, (3) ol i no klin. (Rom 6:19; 12:1; 2 Korin 7:⁠1) Em i hatwok tru long lusim ol dispela pasin. Tasol yumi mas mekim olsem bilong i stap gut long ai bilong Jehova.

5. Blut tu em i samting i holi long ai bilong God. God i tok laip i stap long blut. Olsem na i no stret yumi kaikai blut. Na tu i no stret yumi kaikai mit bilong animal ol i no rausim blut bilong en pastaim. Sapos ol man i pasim nek bilong wanpela animal o animal i dai long trap, yumi no ken kaikai. Sapos ol i sutim long spia o gan ol i mas rausim blut hariap bambai yumi ken kaikai mit bilong en.​—⁠Stat 9:​3, 4; Wok Pris 17:​13, 14; Aposel 15:​28, 29.

6. Olsem wanem? I stret yumi ken kisim blut long haus sik? Tingim: Jehova i tok yumi mas abrusim blut. Olsem na yumi no ken kisim blut bilong narapela na putim i go insait long bodi bilong yumi o mekim olsem long blut bilong yumi yet em ol i bin rausim pastaim na putim i stap. (Aposel 21:​25) Yes, ol trupela Kristen i no ken orait long kisim blut. Ol i orait long kisim ol narapela samting olsem marasin i no gat blut long en. Ol i laik i stap laip, tasol ol i no laik brukim lo bilong God bilong abrusim bagarap.​—⁠Matyu 16:⁠25.

[Ol Piksa long pes 25]

Bilong stap gut long ai bilong God, yumi no ken kisim blut, o mekim pasin i no klin o ol samting em inap bagarapim man