Stadi 2

God Em i Nambawan Gutpela Pren Yu Inap Kisim

Taim yu kamap pren bilong God, dispela em i nambawan gutpela samting tru em inap kamap long yu. God bai skulim yu long rot bilong stap amamas na stap bel isi; em bai mekim yu i stap fri long planti bilip giaman na ol pasin inap nogutim yu. Em bai harim ol beten bilong yu. Em bai helpim yu long kisim bel isi na bai yu bilip long em. (Song 71:5; 73:28) God bai helpim yu long taim bilong hevi. (Song 18:18) Na God i laik givim presen bilong em long yu, em laip i stap oltaim.​—⁠Rom 6:⁠23.

Taim yu go klostu long God, yu bai go klostu long ol pren bilong God. Ol bai kamap pren bilong yu tu. Ol bai kamap olsem brata na sista bilong yu. Ol bai amamas long lainim yu long God, na ol bai helpim yu na strongim yu.

Yumi no wankain olsem God. Taim yu laik stap pren bilong God, yu mas save long wanpela bikpela samting. Taim yu stap pren bilong God yu no stap pren bilong wanpela man i wankain olsem yu, nogat. Em i bilong bipo yet na em i gat gutpela tingting na save na em i gat bikpela strong winim tru yumi. I stret em i stap Bos bilong yumi. Olsem na sapos yumi laik stap pren bilong em, yumi mas harim tok bilong em na mekim ol samting em i tokim yumi long mekim. Taim yumi mekim olsem, oltaim dispela bai helpim yumi.​—⁠Aisaia 48:18.