Stadi 3

Yu Mas Kisim Save Long God

Bilong kamap pren bilong God, yu mas kisim save long em. Olsem wanem? Ol pren bilong yu i save long nem bilong yu na ol i save kolim? Ol i save mekim, a? God tu i laik bai yu save long nem bilong em na yu kolim. Nem bilong God em Jehova. (Song 83:​18, NW; Matyu 6:⁠9) Na tu, yu mas lain long ol samting em i save laikim na ol samting em i no save laikim. Yu mas save long husat ol i pren bilong em na husat ol i birua bilong em. Yu mas lusim bikpela hap taim na bai yu inap kisim save long wanpela man. Baibel i tok taim man i makim hap taim bilong kisim save long Jehova em i bihainim gutpela tingting.​—⁠Efesus 5:​15, 16.

Ol pren bilong God i save mekim ol samting em i amamas long en. Tingim ol pren bilong yu. Sapos yu mekim nogut long ol na yu mekim ol samting ol i nolaik tru long en, yu ting ol bai stap yet olsem pren bilong yu? Nogat tru! Olsem tasol, sapos yu laik stap yet olsem pren bilong God, yu mas mekim ol samting em i amamas long en.​—⁠Jon 4:⁠24.

I no olgeta lotu i helpim man long kamap pren bilong God. Jisas, em i nambawan gutpela pren bilong God, em i tok i gat tupela rot. Wanpela rot i bikpela na i gat planti manmeri long en. Dispela rot i go long ples bilong lus. Narapela rot em i liklik na wan wan manmeri tasol i wokabaut long en. Dispela rot i go long ples bilong kisim laip. Dispela i makim olsem sapos yu laik kamap pren bilong God, yu mas lain long stretpela rot bilong lotuim em.​—⁠Matyu 7:​13, 14.