Stadi 9

Husat Ol i Pren Bilong God?

Krais Jisas em i Pikinini bilong Jehova, na em i gutpela pren tru bilong em. Taim em i no kam i stap yet long graun olsem man, em i bin stap long heven olsem wanpela strongpela spirit. ( Jon 17:⁠5) Bihain em i kam daun long graun bilong skulim ol manmeri long tok i tru bilong God. ( Jon 18:37) Na tu, em i bin givim laip bilong em bilong kisim bek ol gutpela manmeri long sin na indai. (Rom 6:23) Nau Jisas em King bilong Kingdom bilong God, em wanpela gavman bilong heven na em bai kamapim Paradais long dispela graun.​—⁠KTH 19:⁠16.

Ol ensel tu i pren bilong God. Ol ensel i no bin kamap man bilong graun na bihain ol i kamap ensel, nogat. God i bin wokim ol na putim ol long heven taim em i no wokim yet graun. ( Jop 38:​4-7) I gat planti milion ensel. (KTH 5:​11) Ol dispela pren bilong God long heven ol i laik ol manmeri i mas lainim tok i tru bilong Jehova.​—⁠KTH 14:​6, 7.

God i gat ol pren bilong em hia long graun tu; em i kolim ol olsem ol witnes bilong em. Man i sanap long kot em i save tokaut long sampela samting bilong wanpela man em i save long en o samting em i lukim. Ol Witnes Bilong Jehova i save tokim ol narapela long ol save ol i bin kisim long Jehova na long ol samting em i laik mekim. (Aisaia 43:10) Olsem ol ensel, ol Witnes i laik helpim yu long kisim save long tok i tru bilong Jehova. Ol i laik bai yu tu i kamap pren bilong God.