Baibel i Tok Wanem?

Taim Ol Man i Dai Ol i Save Kamap Ensel?

WANPELA liklik meri nem bilong em Argyro em i dai taim em i gat 7-pela krismas tasol. Ol i pasim waitpela klos long em na putim em long kofin. Papamama i lukluk long em long kofin na bel bilong ol i bagarap stret. Bilong mekim gut bel bilong ol, pasto i tokim ol: “God i laikim wanpela ensel moa, na Em i kisim liklik Argyro bilong i stap wantaim em. Nau spirit bilong em i flai raunim sia king bilong Man i Gat Olgeta Strong.”

Planti man i bilip olsem ol ensel ol i spirit bilong man i dai pinis, tasol i no planti lotu i holim dispela tingting olsem wanpela bilip bilong ol. Dispela tingting i bin kamap bikpela long rot bilong televisen na ol muvi i stori long ol man i dai pinis ol i mekim sampela bikpela wok bilong helpim ol man i stap laip na nau ol i kamap ensel.

Olsem wanem? Tru yu ken bilip olsem ol famili bilong yu i dai pinis ol i kamap ensel? Baibel i tok wanem? Bilong bekim dispela askim, pastaim yumi ken skelim sampela tok bilong Baibel na bai yumi ken save ol ensel i husat na ol man i dai pinis i stap olsem wanem.

Ol Ensel​​—⁠God i Wokim Ol

Yumi no inap lukim ol ensel. Ol i stap long ples spirit na mekim wok bilong God. Ol i gat bikpela strong. I stap bilong ol i no samting ol man hia long graun inap bosim, nogat. Ol ensel ol i spirit em God i bin wokim ol. Baibel i tok: “Ol [ensel] i mas litimapim nem bilong Bikpela, long wanem, em yet i tok na ol i kamap na i stap.”​​—⁠Song 148:​2, 5.

Baibel i tok i gat planti milion gutpela ensel, sampela ol i serafim na sampela ol i serap, na ol i bihainim tok bilong God na mekim wok bilong em. (Song 103:​20, 21; Aisaia 6:​1-7; KTH 5:11) Olsem wanem? Ol man i bin i dai bambai God i ken mekim ol dispela ensel i kamap na i stap? Nogat. Ol ensel i no bin kamap long dispela rot. Bilong wanem?

Baibel i tok God i bin wokim ol ensel paslain tru long em i bin wokim ol man. Taim Jehova i wokim graun long ol manmeri i ken i stap long en, ol ensel​​—⁠em long tok piksa Baibel i kolim ol olsem sta​​—⁠“ol i amamas na singaut.” (Jop 38:​4-7) Olsem na taim ol man i no kamap yet long graun, ol ensel i stap longtaim pinis.

Na tu, ol ensel i narakain tru long ol man​—⁠ol i narakain long bodi bilong ol na long wok bilong ol insait long ol samting God i tingting pinis long mekim.a God i wokim man na putim em i “stap aninit long ol ensel,” olsem na ol ensel i save winim ol man long tingting na long strong bilong ol. (Hibru 2:⁠7) “Ples” bilong ol ensel em heven. (Jut 6) Pastaim tru, laik bilong God long ol manmeri i olsem: Em i laik bai ol i ken i stap oltaim oltaim long graun. (Stat 1:​28; 2:​17; Song 37:29) Sapos namba wan man na meri i bin bihainim tok bilong God, ol i no ken i dai. Olsem na kirap long bipo tru, ples bilong ol man na wok bilong ol insait long laik bilong God em i narakain tru long ol ensel.

Wanem Samting i Kamap Taim Man i Dai?

Sampela bikpela askim moa yumi mas skelim i olsem: Wanem samting i painim man i dai pinis? Ol i stap laip yet na i kamap ensel long ples spirit? Baibel i tok klia: “Ol man i gat laip . . . ol i save bai ol i dai. Tasol ol man i dai pinis, ol i no inap save long wanpela samting.” (Saveman 9:​4, 5) Em nau, ol man i dai pinis ol i no stap moa. Ol i no inap mekim wok, o pilim ol samting long bel, o save long wanpela samting.

Olsem wanem? Man i dai pinis inap stap laip gen? Yes! Baibel i tok klostu olgeta man i dai pinis ol bai kirap bek. Bikpela lain bai kirap bek na kisim laip gen long graun i kamap Paradais.​​—⁠Luk 23:​43, Nupela Testamen; Jon 5:​28.

Sampela man bai kirap bek na kisim laip long heven. Namba bilong ol i no planti​—⁠144,000 tasol. Tasol ol dispela 144,000 i narapela kain long ol ensel. Dispela lain 144,000 bai mekim wok king na pris wantaim Krais. Ol i holim namba olsem jas. (1 Korin 6:3; KTH 20:⁠6) Olsem wanem? Dispela lain 144,000 em ol bebi i dai pinis? Nogat. Ol i disaipel bilong Krais em ol i bin winim ol traim na stap gut long God!​​—⁠Luk 22:​28, 29.

Tingim tu olsem wanem ol man i dai pinis i narapela kain long ol ensel i stap laip. Ol man i dai pinis ol i “no save long wanpela samting,” tasol ol ensel i no olsem; ol i gat tingting na ol i pilim ol samting long bel na ol inap wokim disisen bilong ol yet. Ol inap makim wanem rot ol i laik bihainim. (Stat 6:​2, 4; Song 146:4; 2 Pita 2:⁠4) Baibel i tok ol man i dai pinis ol i no gat strong moa​—⁠dai i “daunim strong” bilong ol​—⁠tasol ol ensel i narapela kain, ol i gat “bikpela strong.” (Aisaia 26:14; Song 103:20) Ol lain tumbuna bilong Adam i save dai, long wanem, skin bilong ol i no gutpela olgeta na ol i gat sin, tasol ol ensel i stap aninit long God ol i gutpela olgeta, na Jehova i orait long ol.​​—⁠Matyu 18:⁠10.

Dispela tingting olsem ol ensel ol i spirit bilong ol man i dai pinis em samting ol muvi na televisen tasol i stori long en, tasol dispela tingting i no stret wantaim ol tok bilong Baibel. Ol tok i tru bilong Baibel yumi skelim pinis i helpim yumi long abrusim ol tingting kranki long ol famili bilong yumi i dai pinis i stap olsem wanem. Baibel i tok ol gutpela ensel​—⁠em God i bin wokim ol wan wan na ol i wokboi bilong God na ol i gat bikpela strong​—⁠ol i winim tru ol man na oltaim ol i redi long bihainim laik bilong Jehova. Em i gutpela samting tru olsem em laik bilong God long ol ensel i mas helpim na was long ol man husat i save daun long Jehova na i gat laik long mekim wok bilong em.​​—⁠Song 34:⁠7.

YU LAIK SAVE?

◼ Ol famili bilong yu i dai pinis, ol i bin kamap ensel na mekim wok bilong God long heven?​​—⁠Saveman 9:​5, 10.

◼ As na ol pikinini i dai, em long wanem God i laik kisim sampela ensel moa i stap wantaim em?​​—⁠Jop 34:⁠10.

◼ Ol man i dai pinis ol inap kam bek na lukautim ol famili bilong ol?​​—⁠Aisaia 26:⁠14.

[Futnot]

[Rait long pes 11]

“Ol [ensel] i mas litimapim nem bilong Bikpela, long wanem, em yet i tok na ol i kamap na i stap.”​​—⁠Song 148:​2, 5