Ol Ensel—Ol i Husat?
BIKPELA king i kirap nogut tru long samting em i lukim. Ol i tromoi tripela man i go insait long bikpela paia bilong kilim ol i dai, tasol ol i no bagarap! Husat i bin kisim bek ol long dispela bikpela paia? King yet i tokim 3-pela man: “Yumi olgeta i mas litimapim nem bilong God bilong [yupela]. Em i salim ensel bilong en na i helpim dispela tripela man i save lotu na bilip long em.” (Daniel 3:28) Dispela king bilong Babilon i bin stap inap 2 tausen yia samting i go pinis, em i bin lukim ensel i kisim bek 3-pela long paia. Planti milion manmeri bilong bipo ol i bilip long ol ensel. Long nau tu planti man i save bilip olsem i gat ol ensel i stap, na ol i pilim olsem ol ensel i save mekim sampela samting long i stap bilong ol. Ol ensel ol i husat? Ol i bin kamap olsem wanem?
Baibel i tok ol ensel ol i spirit, olsem God em i wanpela Spirit. (Hibru 1:14; Jon 4:24) Lain ensel i bikpela tru, inap planti milion. (KTH 5:11) Na olgeta wantaim ol “i gat bikpela strong.” (Song 103:20) Tru, sampela samting bilong ol ensel i wankain olsem yumi man—ol i gat ol pasin bilong ol yet, na ol yet inap makim wanem rot ol i laik bihainim. Tasol ol i no bin stap man long graun pastaim na bihain kamap ensel, nogat. God i bin wokim ol ensel paslain tru long em i bin wokim ol man—na paslain tru long em i bin wokim graun. Baibel i tok, taim God i “wokim na strongim as bilong dispela graun,” long dispela taim “ol ensel [“ol pikinini bilong God,” NW] i amamas na singaut.” (Jop 38:4, 7) God i bin wokim ol ensel, olsem na Baibel i kolim ol olsem ol pikinini bilong God.
I gat wanem as na God i bin wokim ol ensel? Ol i bin insait long ol samting ol man i bin mekim long graun o nogat? Long nau ol i save mekim sampela samting long yumi o nogat? Ol ensel i stap fri long makim rot ol i laik bihainim, olsem na yumi laik save, sampela ensel i bin bihainim pasin bilong Satan na ol i kamap birua bilong God o olsem wanem? Baibel i kamapim ol stretpela bekim bilong ol dispela askim.