Stadi 12

Wanem Samting i Painim Ol Man Taim Ol i Dai?

Dai em i narapela kain long laip. Taim man i dai i olsem em slip strong tru. ( Jon 11:​11-​14) Ol man i dai pinis ol i no inap harim wanpela samting; ol i no inap lukim wanpela samting; ol i no inap toktok; ol i no gat tingting. (Saveman 9:​5, 10) Lotu giaman i lainim ol man olsem taim ol i dai, ol i go long wanpela ples spirit bilong stap wantaim ol tumbuna bilong ol. Baibel i no lainim ol man olsem.

Ol man i dai pinis ol i no inap helpim yumi, na ol i no inap nogutim yumi. Planti man i save mekim ol kain kain pasin bilong ol tumbuna na ol i mekim ol ofa, na ol i bilip olsem dispela bai amamasim ol man i dai pinis. God i no amamas long dispela, long wanem, wanpela tok giaman bilong Satan i as bilong dispela tingting. Na tu, em i no inap amamasim ol man i dai pinis, long wanem, ol i no stap laip. Yumi no ken pret long ol man i dai pinis, na yumi no ken lotuim ol. Yumi mas lotu long God wanpela tasol.​—⁠Matyu 4:⁠10.

Ol man i dai pinis bai kirap bek. Jehova bai kirapim bek ol man i dai pinis na ol bai stap long Paradais long graun. Dispela samting bai i kamap bihain. ( Jon 5:​28, 29; Aposel 24:15) God inap kirapim bek ol man i dai pinis wankain olsem yu inap kirapim wanpela man i slip.​—⁠Mak 5:​22, 23, 41, 42.

Dispela tingting olsem yumi no save dai em i tingting giaman Satan i kamapim. Satan na ol spirit nogut ol i save mekim na ol man i ting olsem tewel bilong ol man i dai pinis i stap laip yet na em i save givim sik na ol narapela hevi long ol man. Sampela taim Satan i save giamanim ol man long rot bilong ol driman na long ol piksa olsem driman. Jehova i nolaik tru long ol man i laik toktok wantaim ol man i dai pinis.​—⁠Lo 18:​10-12.