Stadi 16

Kamapim Klia Olsem Yu Laikim God

Bilong narapela i ken stap yet olsem pren bilong yu, yu mas toktok wantaim em. Yu harim tok bilong em, na em i save harim tok bilong yu. Na tu, taim yu stori long ol narapela long pren bilong yu, yu save toktok long ol gutpela pasin bilong em. I wankain tu long man i kamap pren bilong God. Tingim tok Baibel i mekim long dispela samting, olsem:

Long olgeta taim toktok wantaim Jehova long rot bilong beten. “Yupela i mas beten long olgeta taim.”​—⁠Rom 12:⁠12.

Kaunim Tok Bilong God, em Baibel. “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi.”​—⁠2 Timoti 3:⁠16.

Skulim ol narapela long God. “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.”​—⁠Matyu 28:​19, 20.

Pas gut wantaim ol pren bilong God. “Sapos man i wokabaut wantaim man i gat gutpela tingting, orait em tu bai i kisim gutpela tingting.”​—⁠Sindaun 13:⁠20.

Go long ol miting long Haus Kingdom. “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin . . . na yumi wan wan i mas wok strong moa long strongim bel bilong ol arapela.”​—⁠Hibru 10:​24, 25.

Helpim wok bilong Kingdom. “Yupela olgeta wan wan i mas tingting gut pastaim na save gut long wanem samting yupela i laik givim. Nogut wanpela man i bel hevi long givim samting, na nogut em i ting ol man i strong tumas long em i mas givim. Dispela pasin bilong givim em i no gutpela. God i save laikim man i amamas na i givim samting long laik bilong em yet.”​—⁠2 Korin 9:⁠7.