Program Bilong Lain Long Pasin Bilong Mekim Tok na Mekim Wok Tisa
MASKI yu yangpela o lapun, man o meri, dispela kos inap helpim yu long kamapim gut tingting bilong yu na mekim gutpela wok moa long lainim ol man long Tok Bilong God.
Wasman skul bai givim ol asainmen long ol man i insait long Skul Tiokratik. Long pes 79 i go 81 bai yu lukim tok kaunsel fom bilong yu. Ol namba long han kais i makim namba bilong ol stadi i stap long ol pes i kamap bihain long dispela. Ol dispela stadi bai stori gut long olsem wanem yu inap mekim gut tru ol dispela samting bilong mekim tok na mekim wok tisa na bilong wanem olgeta wan wan bilong ol dispela stadi i bikpela samting. Na tu, bai yu kisim gutpela tok bilong helpim yu long mekim ol samting ol i toktok long en.
I gat ol narapela narapela kala i stap bilong makim wanem hap tok kaunsel i stret long ol asainmen (1) bilong ritim, (2) bilong mekim soim i gat tupela o sampela moa i insait long en, na (3) bilong mekim tok long kongrigesen. Wasman skul bai makim stadi yu bai wok long en. Em i gutpela long wok long wanpela stadi tasol taim yu mekim asainmen bilong yu. Taim yu mekim ol eksasais i stap long pinis bilong stadi, dispela bai helpim yu gut tru. Sapos tok yu mekim i kamapim klia olsem yu bin bihainim tok kaunsel i stap long dispela stadi ol i makim bilong yu, orait wasman bilong skul bai makim narapela stadi yu ken wok long en long bihain.
Sapos yu mas mekim asainmen bilong yu olsem wanpela soim, orait yu mas makim olsem yu mekim dispela tok we, na long husat, na bai yu mekim olsem wanem. I gat wanpela lista long pes 82 i kolim sampela pasin bilong mekim tok, tasol i no olsem yu mas bihainim dispela lista tasol. Ating wasman skul bai makim olsem yu ken mekim tok long we o yu ken mekim olsem wanem bilong helpim yu long kisim save long mekim tok long dispela kain taim na ples, o em inap larim yu yet long makim dispela.
Maski yu no gat wanpela asainmen bilong redim long skul, taim yu ritim dispela buk na mekim ol eksasais, dispela inap helpim wok bilong yu i kamap gutpela moa. Ating yu inap mekim wanpela stadi insait long olgeta wanpela o tupela wik samting.
Maski yu insait long skul o yu mekim wok autim tok longpela taim, wok bilong yu inap kamap gutpela moa. Skul yu kisim long Skul Tiokratik Bilong Autim Tok bai helpim yu gut tru.