Kamapim Klia Olsem Tok Inap Helpim Man

MASKI yu mekim tok long wanpela man o long wanpela lain, yu no ken kisim tingting olsem ol bai laikim samting yu stori long en, long wanem, yu yet yu laikim dispela tok. Tok yu kamapim em i bikpela samting, tasol sapos yu no kamapim klia olsem dispela tok bai helpim ol, ating kwiktaim ol man bai les long harim.

Dispela tok i stret long ol man i bung long Haus Kingdom tu. Ating ol bai putim gut yau taim yu kamapim wanpela tok piksa o ekspiriens ol i no bin harim bipo. Tasol tingting bilong ol bai wokabaut taim yu stori long ol samting ol i save pinis long en, na ol bai mekim moa yet sapos yu no kamapim sampela save moa long ol dispela samting. Yu mas helpim ol long save bilong wanem na olsem wanem dispela tok i ken helpim ol.

Baibel i laik kirapim yumi long holim strong gutpela tingting na save. (Snd. 3:21) Jehova i bin mekim wok long Jon Bilong Baptais long stiaim ol man i go long “kisim gutpela tingting olsem bilong ol stretpela man.” (Lu. 1:17) As bilong dispela tingting em i pasin bilong pret long Jehova. (Sng. 111:10) Ol man i save tingim tru dispela gutpela tingting, ol i kisim helpim bilong karim ol hevi long dispela laip nau yumi stap long en na long laip yumi bai kisim long bihain, em laip i stap gut oltaim.​—1 Ti. 4:8; 6:19.

Tok i Helpim Tru Man. Bilong mekim tok i helpim man, yu mas tingting gut long ol tok yu bai kamapim na tu husat bai harim dispela tok. No ken tingim ol olsem wanpela lain tasol. Dispela lain i gat ol wan wan man na ol famili i insait long en. Ating i gat sampela pikinini, ol yangpela, ol man i bikpela pinis, na sampela lapun. Ating sampela ol i kirap laikim tok i tru nau tasol na sampela i bin kirap lotuim Jehova paslain long taim mama i karim yu. Sampela ol i strong long samting bilong spirit; sampela i larim yet tingting na pasin bilong graun i bosim ol. Askim yu yet olsem: ‘Olsem wanem tok mi laik kamapim inap helpim odiens bilong mi? Olsem wanem mi inap helpim ol long kisim gut as bilong tok mi mekim?’ Ating yu bai tingting long stori gut long wanpela o tupela bilong ol dispela lain yumi kolim hia. Tasol no ken lusim tingting olgeta long ol narapela.

Olsem wanem sapos ol i makim yu long mekim tok long wanpela as bilip bilong Baibel? Olsem wanem yu ken kamapim tok i helpim ol man em ol i bilip pinis long dispela as tok? Wok long strongim bilip bilong ol long dispela bilip. Bai yu mekim olsem wanem? Long rot bilong toktok gut long ol tok bilong Baibel i save helpim dispela bilip. Na tu yu inap helpim ol long tingim moa yet dispela bilip. Yu inap mekim olsem taim yu soim ol long olsem wanem dispela bilip i stret wantaim sampela narapela tok i tru bilong Baibel na i stret wantaim pasin bilong Jehova yet. Stori long ol samting tru tru i bin painim sampela man na i soim olsem wanem dispela bilip i bin helpim ol taim ol i save gut long en na i stiaim tingting bilong ol long ol samting bai kamap long bihain.

Ol tok yu mekim long olsem wanem man i ken bihainim wanpela tok bilong helpim em, no ken kamapim long pinis bilong tok tasol. Stat long kirap bilong tok, olgeta man i harim tok bilong yu ol i mas pilim olsem “mi yet mi insait long dispela.” Taim yu mekim pinis dispela samting, wok yet long soim odiens long olsem wanem ol i ken bihainim, na mekim olsem insait long ol wan wan bikpela tok na long pinis bilong tok tu.

Taim yu stori long olsem wanem man i ken bihainim wanpela tok yu bin kamapim, mekim long pasin i stret wantaim ol stiatok bilong Baibel. Yu mas mekim olsem wanem? Mekim long pasin sori na pilim tru hevi bilong narapela. (1 Pi. 3:8; 1 Jo. 4:8) Maski aposel Pol i mas stretim sampela bikpela hevi long Tesalonaika, em i strong long stori long ol gutpela wok ol brata i bin mekim bilong kamap strong long samting bilong spirit. Em i tokim ol, em i bilip tru olsem ol bai i gat laik long mekim ol samting i stret long tok em i bin givim long ol. (1 Te. 4:​1-12) Dispela em i gutpela piksa yumi ken bihainim!

Olsem wanem? Tok bilong yu em bilong kirapim ol brata long mekim wok autim tok na skulim ol man long gutnius? Kirapim ol long laikim na tingim tru dispela wok. Tasol taim yu mekim olsem, no ken lusim tingting olsem olgeta i no inap mekim wankain wok, olsem Baibel i soim yumi. (Mt. 13:23) Yu no ken mekim tok i kirapim ol brata long pilim olsem ol i gat asua. Hibru 10:24 i tokim yumi long “painim rot bilong kirapim ol long laikim ol arapela na mekim ol gutpela pasin long ol.” Sapos yumi kirapim ol long laikim ol narapela, orait bel bilong ol bai kirapim ol long mekim ol gutpela wok. Yumi no laik bosim ol samting ol i mekim. Yumi mas luksave olsem Jehova i laik bai yumi kirapim ol long “bilip long em na mekim ol pasin em i laikim.” (Ro. 16:26) Yumi tingim dispela samting na yumi laik strongim bilip​—bilong yumi yet na bilong ol brata bilong yumi tu.

Helpim Ol Long Kisim Gut As Bilong Tok. Taim yu autim tok long ol man, yu mas kamapim gut olsem wanem gutnius inap helpim ol. Bilong mekim olsem yu mas save long tingting bilong ol man i stap long teritori. Bai yu save olsem wanem? Putim yau long ol nius i save kamap long redio o TV. Skelim namba wan pes bilong niuspepa. Na tu, toktok wantaim ol man, na putim gut yau long ol tok ol i mekim. Ating bai yu kisim save olsem ol i hatwok long karim ol bikpela hevi​—wok mani i lus, baim haus, sik, wanblut i dai, hevi bilong pasin raskol, man i gat namba i no mekim stretpela pasin long ol, marit i bruk, hatwok long bosim gut ol pikinini, na ol kain samting olsem. Olsem wanem? Baibel inap helpim ol? Tru tumas, em inap.

Taim yu kirap toktok wantaim wanpela man, ating yu save pinis long wanpela samting yu laik stori long en. Tasol sapos man i kamapim olsem em i laik stori long samting em i tingting long en, orait gutpela yu toktok long dispela samting sapos yu inap, o tokim em olsem yu laik kam bek na kamapim sampela tok inap helpim em. Yumi no laik toktok long ol samting ‘i no samting bilong yumi,’ tasol yumi amamas long kamapim ol gutpela tok em Baibel i kamapim bilong stretim tingting bilong man. (2 Te. 3:11) Yumi save, samting ol man bai laikim moa em ol gutpela tok bilong Baibel i save helpim i stap bilong ol yet.

Sapos ol man i no inap luksave long olsem wanem tok bilong yumi inap helpim ol, ating kwiktaim ol bai i no laik toktok moa wantaim yumi. Maski ol i larim yumi i toktok, sapos yumi no soim ol long olsem wanem dispela tok inap helpim ol, tok yumi kamapim i no inap mekim wanpela samting long laip bilong ol. Tasol sapos yumi kamapim klia olsem wanem dispela tok inap helpim ol, dispela tok yumi mekim inap kirapim ol long mekim bikpela senis long laip bilong ol.

Taim yu mekim Baibel-stadi wantaim ol man, kamapim klia olsem wanem dispela tok inap helpim ol. (Snd. 4:7) Helpim ol sumatin long save gut long ol tok kaunsel bilong Baibel, ol stiatok, na ol samting i stap olsem piksa i soim ol long rot bilong bihainim ol pasin bilong Jehova. Kamapim strong ol gutpela samting ol bai kisim taim ol i mekim olsem. (Ais. 48:​17, 18) Dispela bai kirapim ol long mekim ol senis ol i mas mekim long i stap bilong ol. Kirapim ol long laikim tru Jehova na kisim laik bilong amamasim em, na larim tingting bilong bel i kirapim ol long bihainim ol tok kaunsel bilong Baibel.