Mekim Gutpela Wok Long Ol Piksa Samting

BILONG wanem yu laik yusim ol piksa samting taim yu mekim wok tisa? Long wanem, dispela i ken mekim wok tisa bilong yu i kamap gutpela moa. God Jehova na Jisas Krais i bin yusim ol piksa samting, na yumi ken kisim skul long tupela. Taim yumi toktok wantaim ol man na yumi yusim ol piksa samting, ol man i kisim save long tupela rot​—rot bilong lukim samting na rot bilong harim toktok. Ating dispela bai helpim odiens long putim gut tingting long tok na i strongim tok yu kamapim. Olsem wanem yu ken yusim ol piksa samting taim yu autim gutnius long ol man? Olsem wanem yu ken save olsem yu mekim gutpela wok long ol piksa samting?

Pasin Bilong Ol Bikpela Tisa Long Yusim Ol Piksa Samting. Jehova i bin mekim wok long ol samting man inap lukim bilong lainim ol man long ol bikpela samting, na ol i no inap lusim tingting long ol dispela samting. Long wanpela nait em i kisim Abraham i go ausait na i tokim em: “Yu lukluk i go antap long skai na yu lukim ol sta. Ating yu inap kaunim ol, a? Ol tumbuna pikinini bilong yu bai i kamap planti tru, olsem ol sta.” (Stt. 15:5) Maski long ai bilong ol man i luk olsem dispela i no inap kamap tru, Abraham i pilim tru dispela tok na em i bilip long Jehova. Long narapela taim, Jehova i salim Jeremaia i go long haus bilong man i wokim sospen graun bilong lukim em i wokim sospen. Man! Jeremaia i kisim skul em i no inap lusim tingting long en, olsem Man bilong wokim yumi i gat namba bilong bosim ol man! (Jer. 18:​1-6) Na Jona i no inap lusim tingting long pasin marimari Jehova i skulim em long en long rot bilong wanpela bus rop, a? (Jna. 4:​6-11) Na Jehova i tokim sampela profet bilong em long yusim ol kain samting olsem ol klos, o tul, o brik samting na mekim liklik soim long dispela bilong kamapim ol tok profet. (1 Kin. 11:​29-32; Jer. 27:​1-8; Ese. 4:​1-17) Ol samting bilong haus lotu sel na tempel i makim ol samting bilong heven na i helpim yumi long save long ol samting tru tru bilong heven. (Hi. 9:​9, 23, 24) Na tu, God i bin mekim wok long ol driman samting bilong kamapim ol bikpela tok ol man i mas save long en.​—Ese. 1:​4-28; 8:​2-18; Ap. 10:​9-16; 16:​9, 10; KTH 1:1.

Olsem wanem Jisas i bin mekim wok long ol samting man inap lukim? Taim ol Farisi na lain bilong Herot i laik trikim em, Jisas i askim ol long soim em wanpela mani na em i soim ol olsem piksa bilong Sisar i stap long dispela mani. Orait nau em i tok ol samting bilong Sisar ol i mas givim long Sisar, tasol ol samting bilong God ol i mas givim long God. (Mt. 22:​19-21) Bilong lainim ol disaipel long yusim olgeta samting bilong ol long givim biknem long God, Jisas i tokim ol long lukim wanpela rabismeri i putim tupela liklik mani long bokis mani bilong tempel, em olgeta mani em i holim bilong lukautim em yet. (Lu. 21:​1-4) Long narapela taim em i sanapim wanpela pikinini namel long ol, bilong makim gutpela piksa bilong pasin daun na no gat tingting long kisim biknem samting. (Mt. 18:​2-6) Na em yet i bin kamapim pasin daun taim em i wasim lek bilong ol disaipel.​—Jo. 13:14.

Pasin Bilong Yusim Ol Piksa Samting. Yumi no inap toktok wantaim ol narapela long rot bilong ol driman samting olsem Jehova i bin mekim. Tasol i gat planti piksa i stap long ol buk samting bilong ol Witnes Bilong Jehova i save kirapim tingting bilong ol man. Mekim wok long ol dispela piksa bilong helpim ol man long lukim long ai bilong tingting dispela Paradais Baibel i tok promis long en. Taim yu mekim Baibel-stadi wantaim man, tokim em long lukim wanpela piksa i stret long samting yupela i stadi long en na askim em long tokim yu long ol samting em i lukim. Tingim, taim profet Amos i bin kisim sampela driman, Jehova i askim em: “Yu lukim wanem samting?” (Amo. 7:​7, 8; 8:​1, 2) Yu inap kamapim kain askim olsem taim yu tokim ol man long lukim ol piksa em wok bilong ol i bilong skulim ol man.

Sapos yu raitim ol namba yu bungim o yu mekim wok long wanpela sat i makim ol yia ol bikpela samting i bin kamap, dispela inap helpim ol man long kisim save hariap liklik long ol kain tok profet olsem tok profet bilong “7-pela yia” i stap long Daniel 4:16 na “70 taims 7-pela yia” i stap long Daniel 9:24. Kain sat olsem i stap long sampela buk bilong yumi bilong stadi.

Long famili-stadi, taim yu stori long ol samting olsem haus lotu sel, tempel long Jerusalem, na tempel Esekiel i lukim long driman, bai i no hatwok tumas long kisim save long ol dispela samting sapos yu lukim wanpela piksa samting. Yu ken lukim ol dispela piksa long buk Insight on the Scriptures, na hap i stap long baksait bilong Baibel New World Translation of the Holy Scriptures​—With References, na sampela Wastaua.

Taim yu ritim Baibel wantaim famili, mekim gutpela wok long ol mep. Bihainim rot Abraham i bihainim taim em i lusim Ur i go long Haran na i go moa long Betel. Skelim rot lain Israel i bihainim taim ol i lusim Isip na ol i go long Graun Bilong Promis. Painim ol wan wan hap graun ol wan wan lain bilong Israel i bin kisim. Lukim hap graun Solomon i bin bosim, i bikpela olsem wanem. Bihainim rot Elaija i bihainim taim Jesebel i tok long kilim em i dai na em i ranawe lusim Jesril i go olgeta long ples drai i stap hapsait long Berseba. (1 Kin. 18:46–19:4) Painim ol taun Jisas i bin autim tok long en. Bihainim ol raun bilong Pol, olsem Buk Aposel i stori long en.

Ol piksa samting ol i gutpela samting bilong mekim wok long en taim yu laik skulim Baibel-stadi bilong yu long ol wok bilong kongrigesen. Yu ken soim em long program bilong wanpela kibung na stori long ol kain tok yumi save harim long ol kibung. Planti ol i bin kirap nogut taim ol i raun lukim Haus Kingdom o wanpela brens-ofis bilong ol Witnes Bilong Jehova. Dispela em i gutpela rot long rausim ol tingting kranki sampela i gat long ol wok bilong yumi na long as na yumi mekim dispela wok. Taim yu soim Haus Kingdom long man, stori long olsem wanem em i narapela kain long ol narapela haus lotu. Kamapim olsem i no gat planti bilas samting bilong pulim ai bilong ol man na em i gutpela hap bilong kisim skul. Kolim na soim ol samting i save helpim yumi long autim tok​—hap bilong kisim ol buk samting, ol mep bilong teritori, na ol bokis kontribiusen (olsem no gat ol plet samting bilong salim i go bilong kisim ol kontribiusen).

Long hap i gat ol video ol i bin redim aninit long wok bos bilong Gavening Bodi, soim ol dispela video long ol bilong strongim bilip bilong ol long Baibel, na bilong lainim ol Baibel-stadi long wok bilong ol Witnes Bilong Jehova, na bilong kirapim ol man i lukim video long bihainim ol stiatok bilong Baibel long laip bilong ol.

Yusim Ol Piksa Samting Taim Yu Toktok Wantaim Ol Bikpela Lain. Ol piksa samting inap lainim gut ol bikpela lain sapos yu redim gut na kamapim gut. Wokboi i gat gutpela tingting i save givim kain kain piksa samting long yumi bilong skulim ol man.

Ol hap bilong stadi insait long Wastaua i gat ol piksa na brata i lukautim stadi i ken yusim ol dispela piksa bilong strongim ol bikpela tok. Na tu, ol buk yumi save stadi long en long ol Buk-Stadi Bilong Kongrigesen i gat ol piksa long en.

I luk olsem i stret long yusim ol piksa bilong strongim sampela bikpela tok bilong sampela autlain bilong ol pablik-tok. Tasol em bai helpim ol man moa sapos yu kirapim ol long tingim ol tok i stap long Baibel, em samting klostu olgeta long odiens bai holim i stap. Sapos wan wan taim yu mas i gat wanpela piksa o yu mas raitim long blakbot wanpela sotpela autlain i gat ol bikpela tok long en bilong kamapim wanpela o sampela bikpela tok, orait sekim gut pastaim olsem ol man i sindaun long baksait bilong haus bung inap lukim gut dispela piksa o ritim dispela tok o nogat. Kain piksa o rait olsem, yu mas yusim wan wan taim tasol.

Taim yumi mekim tok na skulim ol man yumi no yusim ol piksa samting bilong amamasim ol. Nogat. Wok bilong ol kain samting olsem em bilong strongim ol bikpela tok o tingting, na ol i mekim gutpela wok taim ol i kamapim klia ol tok bilong yumi, o taim ol i kamapim as na tok yu mekim em i tru. Sapos yu mekim gutpela wok long ol piksa samting, ating ol dispela piksa bai pas strong long tingting bilong ol man na bai ol i tingim dispela piksa samting na bikpela tok yu kamapim inap planti yia bihain.

Taim man i harim tok na em i lukim samting long ai, dispela i bikpela samting bilong helpim man long kisim save. Tingim olsem wanem tupela bikpela Tisa, em Jehova na Jisas, i bin mekim wok long dispela tupela samting, na wok strong long bihainim pasin bilong ol long skulim ol man.