“Dispela Em i Pikinini Bilong Mi”

TAIM ol pikinini i mekim ol gutpela samting, ol man i lukautim ol i save amamas. Taim pikinini meri o pikinini man i mekim gut wanpela samting, papa i amamas long em inap tokim ol arapela olsem: “Dispela em i pikinini bilong mi.”

Oltaim Jisas i save bihainim pasin Papa bilong em i laikim. Olsem na Papa bilong em i amamas tru long em. Yu tingim samting Papa bilong Jisas i bin mekim taim Jisas i stap wantaim tripela disaipel bilong em?— Yes, God i stap long heven na i tokim ol olsem: “Dispela em i Pikinini bilong mi, mi laikim em tumas, na mi amamas long em.”—Matyu 17:5.

Oltaim Jisas i save amamas long mekim ol samting Papa bilong em i laikim. Yu save long as bilong dispela? Em i mekim olsem, long wanem, em i laikim tumas Papa bilong em. Sapos man i mekim ol samting, long wanem, em i mas mekim, ating em bai pilim olsem i hatwok long mekim. Tasol taim em i amamas long mekim, em bai i no hatwok long mekim. Yu save long mining bilong dispela tok olsem, amamas long mekim ol samting?— Em i makim olsem man i gat laik tru long mekim wanpela samting.

Paslain yet long Jisas i kam long graun, em i save amamas long mekim olgeta samting Papa bilong em i askim em long mekim. Em i mekim olsem, long wanem, em i laikim tumas Papa bilong em, God Jehova. Jisas i stap long gutpela ples tru long heven wantaim Papa bilong em. Tasol God i laik bai Jisas i mekim wanpela bikpela wok. Bilong mekim dispela wok, Jisas i mas lusim heven. Em i mas kamap pikinini long graun. Jisas i amamas long mekim olsem, long wanem, Jehova i laik bai em i mekim.

Bilong kamap pikinini long graun, Jisas i mas i gat mama. Yu save long husat i mama bilong em?— Nem bilong em Maria. Jehova i salim ensel Gebriel long heven i go toktok wantaim Maria. Gebriel i tokim Maria olsem em bai karim wanpela pikinini man. Ol i mas givim nem Jisas long em. Na husat i papa bilong dispela pikinini?— Ensel i tok God Jehova em i Papa bilong em. Long dispela as, ol bai kolim Jisas olsem Pikinini Bilong God.

Yu ting Maria i gat wanem tingting long dispela?— Yu ting em i tok, “Mi no laik kamap mama bilong Jisas”? Nogat. Maria i redi long mekim laik bilong God. Tasol olsem wanem bai Pikinini Bilong God long heven i kamap pikinini long graun? Olsem wanem na rot Jisas i kamap long en i narapela kain long rot ol arapela pikinini i save kamap long en? Yu save?—

Taim God i wokim namba wan papamama bilong yumi, Adam na Iv, em i wokim ol na bai ol inap pas wantaim long wanpela gutpela rot. Bihain, pikinini inap kamap insait long bel bilong mama. Ol man i tok dispela i wanpela mirakel! Ating yu wanbel long dispela tok, a?

Orait God i mekim wanpela mirakel i bikpela moa. Em i kisim laip bilong Pikinini bilong em long heven na putim long bel bilong Maria. God i no bin mekim dispela samting long bipo, na em i no bin mekim olsem long bihain. Long rot bilong dispela mirakel, Jisas i kamap insait long bel bilong Maria long wankain pasin olsem ol arapela bebi i save kamap insait long bel bilong mama bilong ol. Bihain, Maria i maritim Josep.

Taim i kamap long mama i karim Jisas, na long dispela taim Maria na Josep i go long taun Betlehem. Tasol dispela taun i pulap tru long ol manmeri. I no gat ples slip bilong Maria na Josep, olsem na ol i go stap long ples ol i save putim ol animal long en. Maria i karim Jisas long dispela hap, na ol i putim Jisas long bokis kaikai bilong ol animal, olsem yu ken lukim long piksa hia.

Ol kain kain gutpela samting i bin kamap long dispela nait mama i karim Jisas. Klostu long Betlehem, wanpela ensel i kamap long sampela wasman bilong sipsip. Ensel i tokim ol olsem Jisas i wanpela bikman. Ensel i tok: ‘Harim! Mi bringim gutnius bilong mekim ol man i amamas tru. Nau wanpela meri i karim pikinini, na dispela pikinini bai kisim bek ol man.’—Luk 2:​10, 11.

Ensel i tokim ol wasman bilong sipsip olsem ol inap painim Jisas long Betlehem, em i slip i stap long bokis kaikai bilong ol animal. Orait, kwiktaim tasol, ol arapela ensel long heven i bung wantaim dispela ensel na ol i litimapim nem bilong God. Ol ensel i singsing olsem ‘litimapim nem bilong God, na long graun ol manmeri i ken stap bel isi.’—Luk 2:​12-14.

Taim ol ensel i go pinis, ol wasman bilong sipsip i go long Betlehem na ol i lukim Jisas. Ol i tokim Josep na Maria long olgeta gutpela tok ol i bin harim. Ating Maria i bin amamas tru long em i bin orait long kamap mama bilong Jisas, a?

Bihain, Josep na Maria i kisim Jisas i go long taun Nasaret. Jisas i go bikpela long dispela hap. Taim em i kamap bikpela pinis, em i kirapim bikpela wok tisa bilong em. Dispela em wanpela hap bilong wok God Jehova i bin salim Pikinini bilong em long mekim long graun. Jisas i amamas long mekim dispela wok, long wanem, em i laikim tumas Papa bilong em long heven.

Paslain long Jisas i kirapim wok bilong em olsem Bikpela Tisa, Jon Bilong Baptais i baptaisim em long wara Jordan. Long dispela taim, wanpela narapela kain samting i kamap! Taim Jisas i lusim wara na i kam antap, Jehova i stap long heven na i tok olsem: “Dispela em i Pikinini bilong mi. Mi laikim em tumas. Bel bilong mi em i amamas long em.” (Matyu 3:17) Olsem wanem? Yu save amamas taim papamama bilong yu i tokim yu olsem ol i laikim yu?— Yumi ken save olsem Jisas tu i bin amamas.

Long olgeta taim Jisas i bihainim stretpela pasin tasol. Em i no giaman na tokim ol man olsem em i God, nogat. Ensel Gebriel i bin tokim Maria olsem ol bai kolim Jisas olsem Pikinini Bilong God. Jisas yet i tok em i Pikinini Bilong God. Na em i no tokim ol man olsem save bilong em i winim save bilong Papa bilong em, nogat. Em i tok: “Papa i stap namba wan tru na i winim mi.”—Jon 14:28.

Long heven tu, taim Papa bilong Jisas i givim wok long em, Jisas i save mekim tasol. Em i no save tok olsem em bai mekim na bihain mekim narapela samting, nogat. Em i laikim tumas Papa bilong em. Olsem na em i save harim tok bilong Papa. Na taim Jisas i kam long graun, em i mekim ol samting Papa long heven i bin salim em long mekim. Em i no lusim taim long mekim ol narapela samting. Olsem na i gat as na Jehova i amamas tru long Pikinini bilong em!

Yumi tu i laik amamasim Jehova, a?— Sapos olsem, orait yumi mas soim olsem yumi harim tru tok bilong God, olsem Jisas i bin mekim. God i save toktok long yumi long rot bilong Baibel. Sapos yumi giaman tasol long harim tok bilong God, tasol yumi bilip na mekim ol samting i no stret wantaim tok bilong Baibel, dispela pasin i no stret, a?— Na tingim, bai yumi amamas long mekim ol samting Jehova i laikim, sapos yumi laikim em tru.