Jisas i Skulim Yumi Long Beten

OLSEM WANEM? Yu save toktok long God Jehova?— Em i laik yu toktok long em. Taim yu toktok long God, dispela em pasin bilong beten. Planti taim Jisas i save toktok wantaim Papa bilong em long heven. Sampela taim em i laik stap wanpis taim em i toktok long God. Baibel i stori olsem wanpela taim, “em wanpela i go antap long maunten, bilong em i ken beten. Na long taim san i go daun, em wanpela tasol i stap long maunten.”—Matyu 14:23.

Yu inap i go we na bai yu stap wanpis na beten long Jehova?— Ating yu inap mekim olsem paslain long yu slip long nait. Jisas i tok: “Taim yu laik mekim prea, yu mas i go insait long rum bilong yu na pasim dua na beten long Papa bilong yu.” (Matyu 6:6) Yu save beten long Jehova long olgeta nait paslain long yu slip?— Yu mas mekim olsem.

Jisas i save beten tu taim ol narapela i stap wantaim em. Taim pren bilong em Lasarus i dai, Jisas i beten wantaim ol arapela long matmat bilong Lasarus. (Jon 11:​41, 42) Na Jisas i save beten tu taim em i mekim miting wantaim ol disaipel bilong em. Yu save go long ol miting ol i save beten long en?— Long ol miting wanpela man i bikpela pinis em i save beten. Yu mas putim gut yau long ol tok em i mekim, long wanem, em i kamapim ol tok ating yu gat laik long mekim long God. Olsem na bai yu inap tok “Amen.” Taim yu tok “Amen” long pinis bilong beten, yu save dispela i makim wanem samting?— Em i makim olsem yu laikim dispela beten. Yu wanbel long en na yu laik bai em i olsem beten bilong yu tu.

Jisas i save beten tu long taim bilong kaikai. Em i save tok tenkyu long Jehova long kaikai bilong em. Yu save beten oltaim paslain long yu kaikai?— I gutpela long yumi tok tenkyu long Jehova paslain long yumi kirap long kaikai. Ating narapela i beten taim yu kaikai wantaim famili samting. Tasol olsem wanem sapos yu wanpela i laik kaikai? O olsem wanem sapos yu kaikai wantaim ol man i no save tenkyu long Jehova?— Long ol kain taim olsem, yu yet mas mekim beten bilong yu.

Olsem wanem? Oltaim yu mas kolim beten long maus? O yu ting Jehova inap harim yu sapos yu beten long tingting?— Yumi inap painim bekim bilong dispela long samting i bin kamap long Nehemia. Em i man bilong lotuim Jehova na em i wok long haus king bilong King Artaserksis bilong Persia. Wanpela taim Nehemia i wari nogut tru, long wanem, em i harim olsem ol banis bilong Jerusalem—biktaun bilong lain bilong em—i bagarap.

Taim king i askim Nehemia long as na em i wari, pastaim Nehemia i mekim beten long tingting. Bihain Nehemia i tokim king long as na em i wari na em i askim king sapos em inap go long Jerusalem na wokim gen banis bilong en. Wanem samting i kamap?—

Yes, God i harim beten bilong Nehemia. King i orait long em i go! Na tu, king i givim planti diwai long Nehemia bilong wokim gen banis bilong taun. Olsem na tru tru God inap harim beten bilong yumi, maski yumi beten long tingting.—Nehemia 1:​2, 3; 2:​4-8.

Orait, tingim dispela samting. Yu ting yu mas daunim het taim yu beten? O brukim skru? Yu ting wanem?— Sampela taim Jisas i brukim skru taim em i beten. Sampela taim em i sanap. Na sampela taim em i apim het i go antap taim em i beten, olsem em i bin mekim taim em i beten askim God long helpim Lasarus.

Olsem na dispela i kamapim klia wanem samting?— Yes, dispela i soim olsem pasin man i mekim, olsem em i sanap o sindaun, dispela i no bikpela samting. Sampela taim i stret long daunim het na pasim ai. Ating long sampela taim bai yu laik brukim skru olsem Jisas i bin mekim. Yumi inap beten long God long wanem wanem taim yumi laik, long san o long nait, na em bai harim yumi. Bikpela samting long pasin bilong beten i olsem: Yumi bilip tru olsem Jehova i putim yau long yumi. Yu bilip olsem Jehova i harim beten bilong yu?—

Taim yumi beten long Jehova, yumi mas mekim wanem tok?— Tokim mi: Taim yu beten, yu save toktok long God long wanem samting?— Jehova i givim yumi planti gutpela samting, na i stret yumi tok tenkyu long em long ol dispela samting, a?— Yumi ken tok tenkyu long em long kaikai yumi kisim. Tasol olsem wanem? Yu bin tok tenkyu long em long blupela skai, ol grinpela diwai, na ol naispela plaua?— Em i bin wokim ol dispela samting tu.

Wanpela taim ol disaipel bilong Jisas i askim em long skulim ol long pasin bilong beten. Olsem na Bikpela Tisa i skulim ol, na em i soim ol long wanem ol samting i bikpela samting tru long beten long en. Yu save long ol dispela samting?— Kisim Baibel bilong yu, na opim long Matyu sapta 6. Long ves 9 i go inap long ves 13, yumi inap lukim beten em planti man i save kolim olsem Papa Bilong Mipela o Beten Bilong Bikpela. Yumi ken ritim wantaim.

Long dispela ves yumi kisim save olsem Jisas i tokim yumi long beten long nem bilong God. Em i tok yumi mas beten long nem bilong God i mas i stap holi. Nem bilong God em husat?— Yes, em Jehova, na yumi mas laikim tru dispela nem.

Namba tu samting: Jisas i skulim yumi long beten long Kingdom Bilong God i mas i kam. Dispela Kingdom em i bikpela samting, long wanem, em bai kamapim bel isi long graun na mekim graun i kamap wanpela paradais.

Namba tri samting: Bikpela Tisa i tok yumi mas beten long laik bilong God i ken kamap long graun olsem i kamap pinis long heven. Sapos yumi beten long dispela samting, orait yumi mas mekim ol samting God i laik yumi mas mekim.

Narapela samting: Jisas i skulim yumi long beten bilong kisim kaikai yumi mas kisim long wan wan de. Em i tok tu olsem yumi mas tok sori long God taim yumi mekim rong. Na yumi mas askim God long lusim tingting long rong bilong yumi. Tasol paslain long em i lusim rong bilong yumi, yumi mas lusim rong bilong ol arapela sapos ol i bin rongim yumi. Olsem wanem? Em i isi long yu mekim olsem?—

Na laspela samting: Jisas i tok yumi mas beten long God Jehova i ken lukautim yumi na bai dispela man nogut, Satan, i no ken bagarapim yumi. Olsem na olgeta dispela samting em ol gutpela samting yumi ken beten long God long en.

Yumi mas bilip olsem Jehova i save harim beten bilong yumi. Yumi ken askim em long helpim yumi, na tu, yumi mas wok long tok tenkyu long em. Em i save amamas taim yumi pilim tru ol tok yumi mekim long beten, na taim yumi askim em long ol samting i stret. Na em bai givim yumi ol dispela samting. Yu bilip olsem?—