Bilong Wanem Yumi No Ken Giaman?

TINGIM wanpela pikinini meri i tokim mama bilong em olsem: “Yes, mi bai kam hariap long haus taim skul i pinis.” Tasol taim skul i pinis em i stap na pilai wantaim ol pren bilong em na bihain em i tokim mama bilong em olsem: “Tisa bilong mi i tokim mi long stap bek long skul.” Yu ting i stret long mekim kain tok olsem?—

O ating wanpela mangi i tokim papa bilong em olsem: “Nogat, mi no bin kikim bal insait long haus.” Tasol olsem wanem sapos tru tru em i bin mekim dispela samting? Yu ting i stret long tok olsem em i no bin mekim?—

Bikpela Tisa i soim yumi long stretpela pasin yumi mas bihainim. Em i tok: “Taim yupela i tok Yes, yupela i mas truim dispela tok Yes, na taim yupela i tok Nogat, yupela i mas truim dispela tok Nogat; long wanem, ol tok yupela i skruim long en i kam long dispela man nogut.” (Matyu 5:​37, NW) Wanem mining bilong dispela tok bilong Jisas?— Yumi mas bihainim tok yumi bin mekim.

I gat wanpela stori long Baibel i soim olsem em i bikpela samting long mekim tok tru tasol. Em stori bilong wanpela man na meri em ol i tok ol i disaipel bilong Jisas. Yumi ken skelim samting i bin kamap.

Klostu 2-pela mun bihain long taim Jisas i dai, planti man bilong ol longwe ples ol i kam long Jerusalem bilong mekim Pentikos, em wanpela bikpela bung bilong ol Juda. Aposel Pita i mekim wanpela gutpela tok i stori long Jisas, em Jehova i bin kirapim em long matmat. Dispela em i namba wan taim bilong planti manmeri i kam long Jerusalem long harim tok long Jisas. Nau ol i laik kisim sampela save moa. Olsem na bai ol i mekim wanem?

Ol i stap sampela taim moa long Jerusalem. Tasol bihain liklik, sampela bilong ol i sot long mani, na ol arapela i mas helpim ol long baim kaikai. Ol disaipel long Jerusalem i laik helpim ol dispela manmeri i bin kam long ol narapela hap. Olsem na planti bilong ol i salim ol samting bilong ol yet na bringim mani i go long ol aposel bilong Jisas. Na ol aposel i givim dispela mani long ol man i sot.

Ananaias na meri bilong em, Safaira, em ol i insait long kongrigesen Kristen long Jerusalem, ol i salim wanpela hap graun bilong ol. I no gat man i tokim ol long salim dispela graun, nogat, ol i mekim long laik bilong ol yet. Tasol i no olsem ol i laikim ol dispela nupela disaipel bilong Jisas na ol i mekim dispela samting, nogat. Ananaias na Safaira i laik bai ol man i ting tupela i gutpela moa. Olsem na ol i pasim tok olsem ol bai tok ol i givim olgeta mani i go bilong helpim ol arapela. Tasol tru tru ol i laik givim hap mani tasol na tok olsem ol i givim olgeta mani. Yu ting wanem long dispela pasin?—

Ananaias i go lukim ol aposel na em i givim mani long ol. Tasol God i save olsem em i no givim olgeta mani. Olsem na God i kamapim klia long aposel Pita olsem Ananaias i no mekim tok tru.

Orait Pita i tok: ‘Ananaias, bilong wanem yu larim Satan i kirapim yu long mekim dispela pasin? Dispela hap graun i bilong yu. I no olsem yu mas salim. Na taim yu salim pinis, em samting bilong yu long skelim wanem samting yu laik mekim long mani yu kisim. Tasol bilong wanem yu giaman olsem yu givim olgeta mani, tasol tru tru yu givim hap tasol? Long dispela rot yu no giamanim mipela tasol, nogat, yu giamanim God tu.’

Dispela em bikpela rong tru. Ananaias i mekim tok giaman! Em i no mekim samting em i tok em i mekim. Em i giaman olsem em i mekim dispela samting. Baibel i tokim yumi long samting i bin kamap. Em i tok: ‘Ananaias i harim tok bilong Pita na em i pundaun na i dai.’ God i kilim i dai Ananaias! Bihain, ol i kisim bodi bilong em i go ausait na planim.

Tripela aua bihain, Safaira i kam. Em i no save long samting i bin kamap long man bilong em. Olsem na Pita i askim em: ‘Mani yutupela i givim long mipela em tasol mani yutupela i bin kisim long graun bilong yutupela, a?’

Safaira i tok: ‘Em i stret, mitupela i kisim dispela mani tasol long graun mitupela i bin salim.’ Tasol dispela i tok giaman! Ol i holim hap mani ol i kisim taim ol i salim graun. Olsem na God i kilim i dai Safaira tu.—Aposel 5:​1-​11.

Samting i painim Ananaias na Safaira i skulim yumi long wanem samting?— Em i skulim yumi olsem God i no save laikim ol man bilong mekim tok giaman. Oltaim em i laik bai yumi mekim tok tru tasol. Tasol planti man i tok i no gat rong long giaman. Yu ting tok bilong ol dispela man i stret?— Olsem wanem? Yu bin save olsem tok giaman i as na olgeta kain sik, pen, na indai i kamap long graun?—

Tingim, Satan i bin tok giaman long namba wan meri, Iv. Em i tokim Iv olsem em i no inap dai sapos em i sakim tok bilong God na kaikai prut God i bin tambuim em long kaikai. Iv i bilipim tok bilong Satan na em i kaikai dispela prut. Em i pulim Adam tu long kaikai dispela prut. Ol i kamap sinman, na olgeta pikinini bilong ol bai i gat sin. Olgeta pikinini bilong Adam i gat sin, olsem na olgeta i karim pen na hevi na ol i dai. Olgeta dispela hevi i bin kirap olsem wanem?— Long rot bilong wanpela tok giaman.

Olsem na yumi no kirap nogut long Jisas i tok Satan i “man bilong tok giaman, na em i papa tru bilong pasin bilong tok giaman”! Em i namba wan man bilong mekim tok giaman. Taim wanpela man i giaman, em i mekim samting Satan i bin mekim pastaim. Yumi mas tingim dispela samting sapos sampela taim yumi gat laik long mekim tok giaman.—Jon 8:​44.

Long wanem kain taim laik bilong mekim tok giaman inap kamap long yu?— Ating em long taim yu mekim samting i no stret, a?— Maski yu no bin tingting long mekim, ating yu brukim wanpela samting. Sapos ol i askim yu long dispela samting, yu ting i stret long yu tok olsem brata o susa bilong yu i bin mekim? O i stret yu mekim olsem yu no save long olsem wanem dispela samting i bruk?—

Olsem wanem sapos yu mas mekim homwok bilong yu, tasol yu mekim hap tasol? Yu ting i stret long yu tok olsem yu bin mekim olgeta, maski yu no bin mekim?— Yumi mas tingim Ananaias na Safaira. Ol i no bin tokaut tru long olgeta samting i bin kamap. Na God i soim olsem dispela pasin i nogut tru taim em i kilim i dai tupela.

Olsem na maski yumi mekim wanem wanem samting, bikpela hevi moa bai kamap sapos yumi mekim tok giaman long dispela samting, na yumi no ken kamapim hap tok tru tasol. Baibel i tok: “Mekim tok tru tasol.” Em i tok tu olsem: “No ken giamanim ol arapela.” Oltaim Jehova i save mekim tok tru tasol, na em i laik bai yumi tu i mas mekim olsem.—Efesus 4:​25; Kolosi 3:9.