Pita na Ananaias i Giaman​—Yumi Kisim Wanem Skul Long Dispela?

Olsem yu save, yu mekim tok giaman taim yu mekim wanpela tok em yu save olsem em i no tru. Olsem wanem? Yu bin giaman?—a Sampela man i bikpela pinis na ol i bin laikim God, ol tu i bin giaman. Ating yu save long stori bilong wanpela man long Baibel husat i bin giaman. Nem bilong em Pita, em wanpela bilong 12-pela aposel bilong Jisas. Orait nau yumi ken ritim stori long i gat wanem as na em i mekim sampela tok giaman.

Bihain long ol man i bin arestim Jisas, ol i kisim em i go long haus bilong hetpris. Em biknait pinis, na Pita i go long ples bung long haus bilong hetpris na i no gat man i luksave long em. Paia i lait na wokmeri bilong hetpris husat i opim geit long Pita i luksave long em. Em i tok: “Yu tu i bin stap wantaim dispela Jisas.” Pita i pret na i tok nogat.

Baibel i tok bihain “narapela meri i lukim em.” Dispela meri i tok: “Dispela man i bin stap wantaim Jisas.” Pita i tok nogat gen. Bihain liklik, ol narapela i kam long Pita na i tok: “Tru tumas, yu tu yu wanpela bilong ol.”

Pita i pret. Nau em namba 3 taim we em i giaman na tok: “Mi no save long dispela man!” Kakaruk i krai. Jisas i lukluk long Pita, na Pita i tingim tok Jisas i bin mekim inap sampela aua paslain long dispela, olsem: “Paslain long kakaruk i krai, inap 3-pela taim yu bai tok yu no save long mi.” Pita i krai nogut tru. Em i bel hevi tru long samting em i bin mekim!

Yu ting dispela samting inap kamap long yu?— Ating yu stap long skul na harim ol sumatin i stori long ol Witnes Bilong Jehova. Wanpela i tok: “Ol i no save salut long fleg.” Narapela i tok: “Ol i no save pait bilong helpim kantri bilong ol.” Na narapela i tok: “Ol i no Kristen tru, bikos ol i no save selebretim Krismas.” Orait nau wanpela i lukluk long yu na i tok: “Yu wanpela Witnes Bilong Jehova, a?” Bai yu tok wanem?—

Paslain long dispela kain samting i kamap, yu mas redi gut long givim gutpela bekim. Pita i no redi. Taim presa i kisim em, em i giaman! Tasol em i sori tru long samting em i bin mekim, na God i fogivim em.

Ananaias, em narapela disaipel bilong Jisas, em tu i giaman. Tasol God i no fogivim em na meri bilong em Safaira. Safaira i bin pasim tok wantaim man bilong em long mekim tok giaman. Orait nau yumi ken stori long as na God i no fogivim Ananaias na Safaira.

Inap 10-pela de bihain long Jisas i lusim ol aposel na go bek long God long heven, inap 3,000 manmeri i kisim baptais long Jerusalem. Planti i bin kam long ol longwe ples bilong tingim Bikpela De Bilong Pentikos, na taim ol i kamap disaipel bilong Jisas pinis, ol i laik stap liklik taim long Jerusalem na kisim sampela save moa long nupela bilip bilong ol. Olsem na sampela disaipel bilong Jisas i yusim mani bilong ol yet bilong lukautim ol dispela lain.

Ananaias na meri bilong em i salim hap graun bilong kisim mani bilong helpim ol manmeri i baptais nupela. Taim Ananaias i bringim mani i kam long ol aposel, em i tok em i bringim mani olgeta em i bin kisim long graun em i salim. Tasol dispela i no tru! Em i haitim sampela mani bilong em yet long yusim! God i kamapim dispela long Pita, olsem na Pita i tokim Ananaias olsem: “Yu no bin giamanim ol man, nogat, yu laik giamanim God.” Taim em i mekim dispela tok, Ananaias i pundaun na i dai! Inap 3-pela aua bihain, meri bilong em i kam. Em i no save long samting i bin painim man bilong em, na em tu i mekim tok giaman na em i pundaun na i dai.

Dispela i skulim yumi long wanpela bikpela samting: Em i bikpela samting long mekim tok tru! Yumi olgeta i mas tingim dispela! Tasol yumi olgeta i save popaia, na moa yet taim yumi yangpela. Olsem wanem? Yu amamas long Jehova i laikim yu na i redi long fogivim yu olsem em i bin fogivim Pita?—Tasol tingim, yumi mas tok tru. Na sapos yumi mekim bikpela popaia long tok giaman, yumi mas askim God long fogivim yumi. Pita i bin mekim olsem, na God i fogivim em. Sapos yumi wok strong long lusim pasin bilong giaman, God bai fogivim yumi tu!