Ol Samting God i Mekim Bilong Lukautim Jisas

SAMPELA taim Jehova i save mekim ol samting long narapela kain rot bilong lukautim ol pikinini na ol man em ol i no inap lukautim ol yet. Sapos yu go wokabaut long ples i gat bus long en, ating yu inap lukim wanpela rot em Jehova i save mekim olsem. Tasol ating pastaim yu no inap kliagut long ol samting i kamap.

Yu lukim wanpela pisin i flai i kam na sanap long graun klostu long yu. I luk olsem em i kisim bagarap. Em i pulim wanpela wing bilong en long graun na surik i go longwe long yu taim yu go klostu long en. Taim yu wok long bihainim pisin, em i wok long i go longwe. Tasol i no longtaim na em i kirap wantu tasol na flai i go. Wing bilong en i no bagarap! Yu save dispela pisin i mekim wanem?—

Klostu long hap pisin i bin kam sanap long en, em i bin haitim ol pikinini bilong en long bus. Mama pisin i pret, nogut yu lukim ol na bagarapim ol. Olsem na em i giaman olsem em i bin kisim bagarap na em i pulim yu i go longwe long ol pikinini. Yu save husat inap lukautim yumi, olsem mama pisin i save mekim long ol pikinini bilong en?— Baibel i tok Jehova i olsem wanpela pisin ol i kolim tarangau, em i save helpim ol pikinini bilong en.—Lo 32:11, 12.

Nambawan gutpela Pikinini bilong Jehova, em Jisas. Taim Jisas i stap long heven, em i wanpela strongpela spirit olsem Papa bilong em. Em inap lukautim em yet. Tasol taim mama i karim Jisas olsem bebi long graun, em i no inap lukautim em yet. I mas i gat man i lukautim em.

Bilong inapim samting God i laik em i mas mekim long graun, Jisas i mas i go bikpela na kamap man i gutpela olgeta. Tasol Satan i laik kilim i dai Jisas paslain long dispela. Ol samting Satan i mekim bilong kilim i dai Jisas taim em i pikinini yet, na ol samting Jehova i mekim bilong lukautim Jisas i wanpela gutpela stori. Yu laik harim dispela stori?—

Sotpela taim bihain long mama i karim Jisas, Satan i mekim na wanpela samting olsem sta i kamap long skai long hap bilong Is. Ol saveman bilong ol sta i bihainim dispela sta i go planti handet kilomita long Jerusalem. Long Jerusalem, ol i askim long wanem hap mama bai karim dispela pikinini em bai kamap king bilong ol Juda. Taim ol i askim ol man i gat save long tok bilong Baibel long dispela samting, ol i tok: “Em bai i kamap long taun Betlehem.”—Matyu 2:1-6.

Taim Herot, king nogut long Jerusalem, i harim tok long dispela nupela king nau tasol mama i bin karim em long taun Betlehem, em i tokim ol dispela saveman: ‘Yupela go painim dispela pikinini, na kam bek tokim mi long em i stap we.’ Yu save bilong wanem Herot i laik save long wanem hap Jisas i stap long en?— Long wanem, Herot i jeles na em i laik kilim Jisas i dai!

God i bin lukautim Pikinini bilong em long wanem rot?— Taim ol saveman i painim Jisas, ol i givim ol presen long em. Bihain, long driman God i givim tok lukaut long ol saveman olsem ol i no ken go bek long Herot. Olsem na ol i bihainim narapela rot i go long ples bilong ol, na ol i no go bek long Jerusalem. Taim Herot i painimaut olsem ol saveman i go pinis, em i kros nogut tru. Bilong kilim i dai Jisas, Herot i tokim ol man long kilim i dai olgeta pikinini man long Betlehem em ol i aninit long 2-pela krismas! Tasol long taim dispela samting i kamap, Jisas i bin lusim pinis dispela hap.

Yu save olsem wanem Jisas i bin lusim dispela hap?— Taim ol saveman i go pinis, Jehova i givim tok lukaut long man bilong Maria, Josep, long ol i mas ranawe i go longwe long Isip. Long Isip, Jisas i stap gut na man nogut Herot i no ken bagarapim em. Sampela yia bihain, taim Maria na Josep i lusim Isip wantaim Jisas, God i givim narapela tok lukaut long Josep. Long driman God i tokim em long i go sindaun long Nasaret we bagarap i no ken painim Jisas.—Matyu 2:7-23.

Olsem wanem? Yu save nau long olsem wanem Jehova i bin lukautim Pikinini bilong em?— Yu ting husat i kain olsem ol dispela liklik pisin mama i bin haitim ol insait long bus o olsem Jisas taim em i liklik yet? Yu olsem ol, a?— I gat ol man i laik bagarapim yu tu. Yu save ol i husat?—

Baibel i tok Satan i olsem wanpela laion i singaut strong na i laik kaikai yumi. Ol laion i save makim ol liklik animal bilong kaikai, na olsem tasol Satan na ol spirit nogut bilong en i save makim ol pikinini bilong bagarapim ol. (1 Pita 5:8) Tasol Jehova i gat bikpela strong moa winim Satan. Jehova inap lukautim ol pikinini bilong em o stretim bek ol samting nogut Satan i mekim long ol.

Yu inap tingim yet wanem ol samting Satan na ol spirit nogut bilong en i laik kirapim yumi long mekim, olsem Sapta 10 bilong dispela buk i stori long en?— Yes, ol i laik kirapim yumi long mekim maritpasin em God i tok i no stret long mekim. Husat tasol inap mekim dispela pasin?— Yes, man na meri i bikpela pinis na tupela i marit wantaim.

Tasol sori tru, sampela bikpela manmeri i save laik slip wantaim ol pikinini. Taim ol i mekim olsem, ol pikinini inap mekim ol pasin i doti em ol i bin lainim long ol dispela bikpela manmeri. Na tu, ol inap kirap long mekim wok nogut long sem bilong ol. Dispela pasin i bin kamap bipo tru long taun Sodom. Baibel i tok ol manmeri long dispela taun, “ol yangpela wantaim ol lapun,” ol i laik slip wantaim ol man i bin kam long lukim Lot.—Stat 19:4, 5.

Jisas i mas i gat man bilong lukautim em, na olsem tasol yu tu i mas i gat man bilong lukautim yu na bai ol bikpela manmeri—na ol narapela pikinini tu—em ol i laik slip wantaim yu, ol i no ken bagarapim yu. Ol dispela kain lain bai giaman olsem ol i pren bilong yu. Ating ol bai tok long givim wanpela samting long yu sapos yu promis olsem yu no inap tokim ol narapela long samting ol i laik mekim wantaim yu. Tasol ol dispela manmeri i tingim ol yet tasol, olsem Satan na ol spirit nogut bilong en, na ol i laik amamasim ol yet. Ol i laik mekim olsem long rot bilong slip wantaim ol pikinini. Dispela pasin i rong tru!

Yu save ol inap mekim wanem bilong kisim amamas?— Ating ol bai laik rapim sem bilong yu. O ating ol i laik rapim sem bilong ol long sem bilong yu. Tasol yu no ken tru larim wanpela man i pilai long sem bilong yu. Maski em brata, susa, papa, o mama bilong yu.

Yu ken mekim wanem bilong lukautim yu yet na bai ol man i save mekim ol kain pasin nogut olsem i no ken bagarapim yu?— Namba wan samting, no ken larim wanpela man i pilai long sem bilong yu. Sapos wanpela man i laik mekim olsem, tok strong olsem: “No ken mekim! Mi bai tokaut long samting yu mekim!” Na sapos dispela man i tok em asua bilong yu na dispela samting i kamap, no ken bilipim tok bilong em. Dispela i no tru. Yu mas tokaut long dispela samting maski dispela man i husat! Yu mas tokaut long dispela samting maski em i tok samting yutupela i mekim em namel long yutupela yet. Maski dispela man i tok promis long givim yu ol naispela presen o em i mekim sampela tok bilong pretim yu, yu mas lusim em na go tokaut long samting em i mekim.

Yu no gat wok long pret, tasol yu mas was gut. Taim papamama bilong yu i givim tok lukaut long yu long sampela man o sampela hap em bagarap inap painim yu long en, yu mas harim tok bilong ol. Sapos yu mekim olsem, yu no givim rot long ol man nogut i bagarapim yu.