Jisas Inap Lukautim Yumi

TAIM Jisas i kamap bikpela na em i kisim save long olsem wanem Jehova i bin lukautim em taim em i liklik, yu ting em i bin beten long Jehova na tok tenkyu long em?— Yu ting bihain Jisas i bin tok wanem long Maria na Josep taim em i kisim save olsem ol i bin helpim em long abrusim bagarap taim ol i kisim em i go long Isip?—

Long nau Jisas i no wanpela bebi moa. Em i no stap moa long graun olsem bipo em i bin stap. Tasol olsem wanem? Yu lukim olsem long nau sampela man i tingim Jisas olsem bebi i slip long bokis kaikai bilong ol bulmakau?— Dispela samting i save kamap klia long taim bilong Krismas, em long planti hap yu inap lukim ol piksa bilong Jisas i wanpela bebi.

Maski Jisas i no stap moa long graun, yu ting em i stap laip?— Yes, God i bin kirapim em bek long matmat, na nau em i stap strongpela King long heven. Yu ting em inap mekim wanem bilong lukautim ol man i mekim wok bilong em?— Taim Jisas i bin stap long graun, em i soim olsem wanem em inap lukautim ol man i laikim em. Yumi ken stori long olsem wanem em i bin soim klia dispela samting taim em i stap long bot wantaim ol disaipel bilong em.

Em apinun pinis na klostu tudak i laik kamap. Inap de olgeta Jisas i bin skulim ol man klostu long raunwara Galili, em wanpela traipela raunwara em longpela bilong en inap 20 kilomita na braitpela bilong en inap 12 kilomita. Nau em i tokim ol disaipel bilong em: “Yumi go long hapsait bilong raunwara.” Olsem na ol i kalap long bot na i go. Skin bilong Jisas i les olgeta, olsem na em i go long baksait bilong bot na putim het antap long pilo. I no longtaim na em i slip i dai olgeta.

Ol disaipel i was i stap bilong stiaim bot. Inap sotpela taim olgeta samting i wok gut, tasol bihain wanpela strongpela win i kirap. Win i kamap strong moa yet, na biksi i wok long kamap bikpela moa. Wara i stat long go insait na pulimapim bot.

Ol disaipel i pret, nogut bot bai go daun long raunwara. Tasol Jisas i no pret. Em i slip yet long baksait bilong bot. Ol disaipel i kirapim em na tok: ‘Tisa, Tisa, helpim mipela; yumi laik lus nau.’ Jisas i kirap na em i toktok long win na biksi. Em i tok: “Inap nau. Yu pinis! Yu dai nau!”

Wantu tasol win i stop na wara i stap isi. Ol disaipel i kirap nogut. Ol i no bin lukim kain samting olsem long bipo. Ol i kirap toktok namel long ol yet olsem: “Dispela man em i husat tru? Em i tok strong long win wantaim wara, na tupela i harim tok bilong em”?—Luk 8:22-25; Mak 4:35-41.

Yu save Jisas em i husat?— Yu save em i kisim we bikpela strong bilong em?— I no gat wok long ol disaipel i pret taim Jisas i stap wantaim ol, long wanem, Jisas i no wanpela man nating bilong graun. Em inap mekim ol narakain gutpela samting ol narapela man i no inap mekim. Mi laik stori long yu long narapela samting em i bin mekim long taim i gat bikpela win long raunwara.

Dispela samting i bin kamap bihain, long wanpela narapela de. Taim nait i kamap, Jisas i tokim ol disaipel bilong em long kalap long bot na go paslain long em long hapsait bilong raunwara. Jisas wanpela i go antap long maunten. Dispela hap i no gat nois na em inap beten long Papa bilong em long heven, God Jehova.

Ol disaipel i kalap long bot na i go long hapsait bilong raunwara. Tasol i no longtaim na win i kirap. Win i kamap strong moa. Nait i kamap pinis. Ol disaipel i rausim sel bilong bot na ol i pul i go. Tasol ol i no inap go longwe tumas, long wanem, strongpela win i wok long sakim ol. Ol biksi i wok long sakim bot i go i kam, na wara i go insait long bot. Ol disaipel i pul strong long go kamap long nambis, tasol ol i no inap.

Jisas i stap wanpis yet long maunten. Em i bin stap longpela taim long hap. Tasol nau em i luksave olsem hevi i laik painim ol disaipel bilong em. Olsem na em i lusim maunten na i go daun long nambis. Jisas i laik helpim ol disaipel bilong em, olsem na em i kirap wokabaut antap long raunwara na i go long ol!

Wanem samting bai kamap sapos yu laik wokabaut antap long wara?— Yu bai go daun long wara, na ating yu bai dring wara na i dai. Tasol Jisas i narapela kain. Em i gat narakain strong. Jisas i mas wokabaut longpela hap bilong kamap long bot. Olsem na em tulait taim ol disaipel i lukim Jisas i wokabaut antap long wara na i kam long ol. Ol i kirap nogut long samting ol i lukim. Ol i pret nogut tru, na ol i singaut. Jisas i toktok long ol: “Yupela stap strong. Em mi tasol. Yupela i no ken pret.”

Taim Jisas i kalap i go antap long bot, kwiktaim win i stop na raunwara i stap isi. Ol disaipel i kirap nogut. Ol i brukim skru long Jisas na tok: “Tru tumas, yu Pikinini Bilong God.”—Matyu 14:22-33; Jon 6:16-21.

Em bai gutpela tru sapos yumi bin stap long dispela taim bipo na lukim Jisas i wokim ol kain mirakel olsem, a?— Yu save bilong wanem Jisas i bin wokim ol dispela mirakel?— Em i mekim olsem, long wanem, em i laikim ol disaipel bilong em na em i laik helpim ol. Tasol em i wokim tu ol dispela mirakel bilong soim bikpela strong bilong em na em bai yusim dispela strong taim em i stap King long Kingdom Bilong God.

Long nau tu, Jisas i save yusim strong bilong em long lukautim ol disaipel bilong em na bai Satan i no ken pasim ol long tokim ol narapela long Kingdom Bilong God. Tasol Jisas i no yusim strong bilong em long helpim ol disaipel long abrusim sik o oraitim ol taim ol i sik, nogat. Olgeta aposel bilong Jisas tu ol i bin i dai. Ol man i bin kilim i dai brata bilong Jon, em Jems, ol i bin putim Jon long kalabus.—Aposel 12:2; KTH 1:9.

Long nau tu i wankain. Maski ol man i mekim wok bilong Jehova o nogat, olgeta i save kisim sik na i dai. Tasol klostu nau, taim Jisas i mekim wok olsem King long gavman bilong God na bosim graun, ol samting bai senis. Long dispela taim, bai i no gat as na ol man i pret, long wanem, Jisas bai yusim strong bilong em long helpim olgeta man i bihainim tok bilong em.—Aisaia 9:6, 7.