Jisas i Wokabaut Antap Long Wara

Jisas i oraitim ol sikman na kirapim bek ol man i dai pinis, na tu, em i kontrolim win na ren. Long maunten, taim Jisas i beten pinis, em lukluk i go daun long Raunwara Galili na lukim bikpela win. Ol aposel i stap long bot na taitim bun long pul bilong sakim win. Jisas i kam daun na kirap long wokabaut antap long wara i go long bot bilong ol. Taim ol aposel i lukim wanpela man i wokabaut antap long wara, ol i pret. Tasol Jisas i tokim ol: ‘Em mi tasol. No ken pret.’

Pita i tok: ‘Bikpela, sapos em yu, tokim mi long kam long yu.’ Jisas i tokim Pita: ‘Kam long mi.’ So taim bikpela win i stap yet, Pita i lusim bot na wokabaut antap long wara i go long Jisas. Tasol taim Pita i go klostu long Jisas, em i lukim bikpela win na em i pret. Em i pilim olsem em i stat long sink. Pita i singaut: ‘Bikpela, seivim mi!’ Jisas i holim han bilong em, na tok: ‘Bilong wanem yu gat tupela tingting? We stap bilip bilong yu?’

Jisas na Pita i go antap long bot, na kwiktaim bikpela win i stop. Yu inap piksaim hau ol aposel i pilim? Ol i tok: “Tru tumas, yu Pikinini Bilong God.”

Em i no namba 1 taim Jisas i kontrolim weda. Long narapela taim bipo, Jisas na ol aposel i seil i go long narapela sait bilong solwara, na Jisas i go slip long baksait bilong bot. Taim em i slip i stap, bikpela win nogut tru i kamap. Weiv i bruk i kam insait long bot, na bot i pulap long wara. Ol aposel i kirapim Jisas, na singaut: ‘Tisa, yumi bai i dai! Helpim yumi!’ Jisas i kirap na tokim solwara: “No ken pairap!” Wantu, win na solwara i stap isi. Jisas i tok long ol aposel: ‘We stap bilip bilong yupela?’ Ol i toktok namel long ol yet: “Win na raunwara tu i harim tok bilong em.” Ol aposel i kisim skul olsem sapos ol i trastim Jisas long bel olgeta, i no gat wok long pret long wanpela samting.