Wanpela King Inap Kontrolim Wara na Win

Jisas i wokim mirakel na givim kaikai long planti tausen manmeri, dispela i mekim na ol i kirap nogut. Ol i tok: “Tru tumas, em i dispela profet i mas i kam long ol manmeri bilong dispela graun,” em i dispela Mesaia na em bai stap gutpela king na bosim yumi. (Jon 6:14; Lo 18:18) Olsem na ol manmeri i laik makim Jisas long kamap king bilong ol.

Tasol Jisas i save pinis long tingting bilong ol manmeri. Em i salim ol i go na em i tokim ol disaipel long kalap long bot. Ol i laik go we? Ol i laik go long Betsaida, na bihain long Kaperneam. Jisas i lusim ol na i go antap long maunten na bai em i ken beten long nait olgeta.

Klostu tulait na mun i lait yet, na Jisas i lukim strongpela win i kamap na raunwara i sakim wanpela bot i stap longwe. Em i lukim ol disaipel i “taitim bun tru long pul strong, long wanem, win i wok long sakim ol.” (Mak 6:48) Jisas i lusim maunten na i go daun long nambis na em i wokabaut antap long wara bilong i go long ol. Tasol nau “ol i pul inap 5-pela kilomita pinis.” (Jon 6:19) Ol disaipel i lukim Jisas i kamap long ol na em i laik abrusim ol na i go. Olsem na ol i pret na tok: “Em samting tru o driman tasol?”—Mak 6:49.

Jisas i mekim gut bel bilong ol na tok: “Yupela strongim bel! Em mi tasol, no ken pret.” Na Pita i tokim em: “Bikpela, sapos em yu tasol, orait tokim mi long wokabaut antap long wara na kam long yu.” Jisas i tok: “Yu kam!” Orait, Pita i lusim bot na i wokabaut antap long wara na i go long Jisas. Tasol Pita i lukim strongpela win na em i pret, olsem na em i stat long sink. Na em i singaut: “Bikpela, seivim mi!” Kwiktaim Jisas i putim han i go na i holim Pita, na em i tok: “Bilip bilong yu i liklik, bilong wanem yu gat tupela tingting?”—Matyu 14:27-31.

Pita na Jisas i kalap long bot, na win i dai. Taim ol disaipel i lukim dispela ol i kirap nogut. Sampela aua i go pinis Jisas i wokim mirakel na givim kaikai long planti tausen manmeri, tasol ol i no kliagut long “mining bilong bret em i bin tilim,” olsem na ol i kirap nogut taim ol i lukim em i wokabaut antap long wara na mekim i dai win. Ol i brukim skru long Jisas na tok: “Tru tumas, yu Pikinini Bilong God.”—Mak 6:52; Matyu 14:33.

I no longtaim na ol i kamap long Genesaret, em naispela ples daun i stap long hap saut bilong Kaperneam. Na ol i tromoi anka i go daun na ol i lusim bot na kam long nambis. Ol manmeri i luksave long Jisas, olsem na ol i go long ol ples i stap klostu na bringim ol sikman i kam long Jisas. Taim ol sikman i holim ol bilas long arere long klos bilong Jisas, ol i kamap orait.

Orait dispela bikpela lain i bin lukim Jisas i wokim mirakel na givim kaikai long planti tausen manmeri i luksave olsem em i lusim dispela ples. Olsem na taim ol liklik bot bilong Taiberias i kam kamap, ol i kalap long ol dispela bot na i go long Kaperneam bilong painim Jisas. Taim ol i lukim em, ol i askim em olsem: “Rabai, wanem taim yu kam long hia?” (Jon 6:25) Tasol Jisas i krosim ol, bihain bai yumi stori moa long risen na em i mekim olsem.