Samting Ol Pikinini i Mas Kisim Long Papamama

OLGETA papamama i insait long wanpela wok ol man i no kliagut tumas long en. Papa na mama i givim hap bilong bodi bilong ol, na nau samting i kamap insait long bel bilong mama em samting i gat laip. Olsem na taim wanpela bebi i kamap, yumi no kirap nogut long ol man i kolim dispela olsem wanpela “mirakel.”

Tasol wok bilong kamapim pikinini em kirap tasol bilong wok ol papamama i mas mekim. Pastaim, ol bebi i no inap lukautim ol yet long wanpela samting, tasol taim ol i wok long go bikpela, papamama i mas lukautim ol long ol arapela samting tu na i no long skin tasol. Ol i mas kisim helpim bilong kamap strong long tingting, bel, stretpela pasin, na long ol samting bilong spirit.

Bilong ol pikinini i ken kamap gutpela, ol papamama i mas laikim ol. Tru, em i bikpela samting long papamama i mas tokim pikinini olsem ol i laikim em, tasol pasin bilong ol i mas truim tok bilong ol. Yes, ol pikinini i mas i gat ol papamama i stap olsem gutpela piksa. Ol pikinini i mas i gat samting bilong stiaim ol long bihainim stretpela pasin, ol stiatok ol i ken bihainim long i stap bilong ol. Na ol i mas i gat ol dispela samting stat long taim ol i liklik yet. Ol bikpela hevi tru inap kamap na i save kamap taim ol pikinini i no kisim kwik helpim.

Ol nambawan gutpela stiatok i stap long Baibel. Ol tok bilong skulim man em Baibel i as bilong en i nambawan tru. Long rot bilong kain skul olsem, ol pikinini bai luksave olsem tok ol i harim em i no tok bilong wanpela man, nogat, em tok bilong Man Bilong Wokim ol, em Papa bilong ol long heven. Dispela i mekim na tok papamama i givim bilong skulim pikinini i nambawan gutpela tok i gat strong.

Baibel i kirapim ol papamama long wok strong long putim ol stretpela stiatok long tingting bilong ol pikinini. Tasol taim ol pikinini i go bikpela, planti papamama i save pilim hatwok long toktok wantaim ol long ol samting i bikpela samting tru. Dispela buk, Kisim Skul Long Bikpela Tisa, i bilong helpim ol papamama na bai kain samting olsem i no ken kamap. Dispela buk i kamapim ol tok bilong ol samting bilong spirit em yu na ol pikinini bilong yu i ken ritim wantaim. Tasol i no dispela samting tasol, buk bai kirapim ol pikinini na ol man i ritim dispela buk wantaim ol long toktok gut wantaim.

Bai yu lukim olsem dispela buk i gat ol hap i kirapim ol pikinini long toktok. Planti gutpela askim i stap long buk. Taim yu kamap long ol dispela askim, bai yu lukim wanpela des (—). Dispela bai helpim yu long tingim olsem yu mas malolo na kirapim pikinini long kamapim tingting bilong em. Ol pikinini i save amamas taim ol inap kamapim tingting bilong ol. Sapos nogat, kwiktaim ol bai les long putim yau.

Tasol bikpela samting moa, ol dispela askim bai helpim yu long kisim save long ol samting i stap long tingting bilong pikinini. Tru, ating pikinini inap kamapim ol bekim i no stret. Tasol ol tok i kamap bihain long wan wan askim i bilong helpim pikinini long kisim pasin bilong tingting stret.

Wanpela spesel samting bilong dispela buk em ol piksa i stap long en, em i gat winim 230 piksa. Planti piksa i gat ol sotpela tok bilong kirapim pikinini long kamapim tingting bilong em long ol samting em i lukim na i bin ritim long buk. Olsem na skelim gut ol piksa wantaim pikinini. Ol piksa i gutpela tul bilong skulim pikinini, ol inap kamapim klia ol bikpela tok.

Taim pikinini i lain long rit, kirapim em long ritim buk long yu na long em yet. Taim em i wok long ritim ritim planti taim, ol gutpela tok bilong buk bai pas long tingting na bel bilong em. Tasol bilong strongim pasin laikim na rispek namel long yu na pikinini bilong yu, yupela i mas ritim buk wantaim na mekim long olgeta taim.

Long nau ol pikinini inap lukim ol piksa na harim ol tok bilong pasin pamuk, ol samting bilong ol spirit nogut, na ol arapela pasin i nogut tru, em ol samting inap sampela yia i go pinis ol man i no ting em inap kamap. Olsem na i mas i gat samting bilong lukautim ol pikinini, na dispela buk inap mekim olsem. Long gutpela pasin buk i tokaut stret long ol samting. Tasol ol papamama i mas stiaim ol pikinini i go long Man i as bilong olgeta savetingting, em Papa bilong yumi long heven, God Jehova. Dispela em samting Jisas, Bikpela Tisa, i bin mekim oltaim. Mipela i laik bai dispela buk i ken helpim yu na famili bilong yu long stretim sindaun bilong yupela na bai Jehova i amamas long en, na yupela i ken kisim ol blesing inap oltaim oltaim.