Liklik Pikinini Bilong Yu ‘i Kamap Bikpela na Stap Gut Wantaim God’?

OLGETA papamama Kristen i laik bai pikinini bilong ol i kamap strongpela Kristen. Tasol sori tru, sampela taim dispela samting i no kamap. Tru, papamama i Kristen, tasol dispela samting yet i no mekim na bai pikinini tu i kamap Kristen. Bilong wanem i olsem?

Pita i kolim wanpela as bilong dispela samting, em i tok: “Yumi save, nupela pikinini em i laikim tumas susu. Olsem tasol yupela i mas laik tumas long kisim gutpela susu, ol i no bin abusim wantaim giaman samting. Em i dispela susu i save helpim spirit bilong yupela. Em i save mekim yupela i kamap bikpela na yupela i stap gut wantaim God.” (1 Pita 2:​2, 3) Em i tok, yumi mas “laik tumas” long kisim ol kaikai bilong spirit. Tasol sampela pikinini i no gat dispela laik. Yumi mas kirapim dispela laik long bel bilong ol. Olsem dispela tok bilong Baibel i makim, dispela inap helpim ol long i stap gut wantaim God na bai ol inap long kisim laip. Ol pikinini i mas lain long laikim ol kaikai em inap strongim skin bambai ol i ken kamap bikpela long skin na skin bilong ol i ken i stap gutpela. Na olsem tasol ol i mas lain long laikim ol kaikai bilong spirit bambai ol i ken kamap strong long spirit na “i stap gut wantaim God.”

Yupela ol papamama−sampela pikinini bilong yupela i liklik yet na i no winim yet 13 krismas? Wok yupela i mekim bilong lainim na skulim ol, em i kamap gutpela inap long nau? Sapos olsem, em i gutpela. Tasol taim pikinini i winim pinis 13 krismas, ating nau bai senis i kamap. Ol papamama i gat save pinis, ol i toksave olsem: Taim pikinini i winim pinis 13 krismas, nau bai sampela hevi i kamap. Ating i no planti hevi tumas, tasol olsem wanem? I gat sampela samting yu ken mekim nau taim pikinini i liklik yet na bai yu redi long ol dispela hevi ol inap kamap bihain? Yes, i gat sampela samting yu ken mekim. Olsem: Yumi mas helpim ol pikinini long save gut long Jehova bambai . . .

Ol i Stap Klostu long Jehova

Mama bilong Samuel, em Hana, em i beten askim God long mekim gut long em bambai em i ken karim pikinini. Jehova i harim beten bilong Hana na Hana i karim Samuel. Liklik Samuel ‘i mekim wok bilong Jehova na i kamap bikpela.’ (1 Samuel 2:​20, 21) Taim pikinini i liklik yet, sapos papamama i lainim em long mekim wok bilong God, em gutpela samting tru! Na wanpela taim ol papamama i bringim ol liklik pikinini bilong ol i kam long Jisas. Yu tingim? Pastaim ol disaipel i krosim ol. Tasol “Jisas i lukim dispela, na em i bel nogut. Em i tokim ol, ‘Yupela larim ol liklik pikinini ol i kam long mi. Yupela i no ken pasim ol. Kingdom bilong God em i bilong kain man olsem.’ ” Jisas i orait long ol papamama i bringim ol liklik pikinini bilong ol i kam long em. Em i holim ol long han bilong em na givim blesing long ol.−Mak 10:​13-16.

Olsem wanem long ol papamama long nau? Ol inap lainim ol pikinini bilong ol long mekim wok bilong Jehova taim ol i liklik yet na bringim ol i go long Jisas bambai ol i stap klostu long Jehova na long Jisas? Ol inap mekim, tasol ol i mas lusim bikpela hap taim liklik long mekim. Jisas i redi long givim taim bilong em bilong helpim pikinini bilong ol narapela man. Olsem wanem? Yumi no laik givim taim bilong yumi bilong helpim ol pikinini bilong yumi yet? Sapos yumi inap mekim, yumi mas kirap long lainim pikinini taim em i bebi yet, olsem mama bilong Timoti i bin mekim. (2 Timoti 3:15) Oltaim yumi mas stori long God Jehova na long Krais Jisas bambai ol pikinini i ken save, tupela i man tru na i stap tru. Yumi mas lainim ol liklik pikinini bilong yumi long ol gutpela samting God na Krais i bin wokim na bai ol i laikim tru. Taim yumi kisim ol i go wokabaut long bus o long nambis samting, yumi ken tokim ol Jehova i bin wokim ol gutpela samting ol i lukim. Ol toktok yumi mekim inap kirapim laik long bel bilong ol na bai ol i laik tru long mekim pasin i stret, long wanem God Jehova na Krais Jisas i laikim kain pasin olsem. (Lukim Diuteronomi 6:⁠7.) Yumi no ken ting, ‘Bihain bai mi mekim.’ Nogat. Nau yumi mas mekim, long wanem ol liklik pikinini bilong yumi i go bikpela kwiktaim. Nau yumi gat taim long lainim ol, nogut dispela taim i lus nating.−Matyu 19:​13-15.

Famili-stadi em nambawan gutpela rot bilong lainim ol pikinini long tok i tru na helpim ol long i stap klostu long Jehova. Famili-stadi inap helpim gut ol pikinini sapos . . .

Ol Inap Amamas long En

Sapos mama i laik kirapim pikinini long laikim gutpela kaikai em inap strongim skin bilong em, mama i no subim nating bikpela bikpela hap kaikai i go insait long maus bilong pikinini. Nogat. Em i redim gut dispela kaikai bambai i swit long maus bilong pikinini, na em i kirapim pikinini long kisim liklik liklik pastaim, na bai pikinini i lain long laikim dispela kaikai. Na i wankain tu long ol kaikai bilong spirit. Maski nau yu laik kirap long mekim famili-stadi o longtaim pinis yu save mekim na pikinini i les, tasol yu mas mekim wankain pasin. Yu mas mekim ol dispela kaikai bilong spirit i “swit” long pikinini na bai pikinini i laikim.

Taim yu mekim stadi wantaim ol liklik pikinini, ating yu no ken mekim ol askim na bekim na yu no ken pulim i go inap wanpela aua olgeta. Yu mas mekim stadi i stret long pikinini bilong yu. Stori wantaim em long sampela man o meri Baibel i stori long ol. Tokim em long wokim piksa bilong sampela samting Baibel i stori long en. Tokim ol pikinini long mekim liklik pilai na makim sampela stori bilong Baibel. Makim sampela samting ol i mas redim bilong narapela stadi bihain. Mekim kain kain samting bambai i kirapim gut tingting bilong pikinini na em i no ken les. Yu laik bai pikinini bilong yu i “laikim tumas” ol kaikai bilong spirit, a? Orait yu mas helpim pikinini long pilim swit bilong en.−1 Pita 2:​2, 3.

Sapos yu wok strong long lainim gut pikinini olsem, dispela inap helpim pikinini inap long olgeta taim bihain. Sapos pikinini bilong yu i laikim ol samting bilong spirit taim em i liklik yet, orait, taim em i go bikpela em i no ken lusim; bai em i pas gut wantaim Jehova. Baibel i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” (Provep 22:⁠6) Tasol i gat narapela samting em inap helpim pikinini bilong yu long laikim tumas ol samting bilong spirit. Em wanem samting?

Famili i Pas Gut Wantaim

Taim yumi planim diwai, sapos yumi planim long gutpela graun em bai kamap bikpela na kamap gut. Na i wankain tu long pikinini. Pikinini i kamap insait long gutpela famili i pas gut wantaim, dispela pikinini i save kamap strong long spirit. Tasol famili i laik pas gut wantaim, ol i mas bung wantaim. Yupela ol papamama−yu stretim rot bambai famili bilong yu i gat taim bilong bung wantaim na toktok wantaim? Yu putim lo long lukim televisen o video? long painim amamas? long wanem kain musik ol i ken harim? Yu makim taim bilong famili i ken bung wantaim na mekim famili-stadi? na mekim ol narapela wok bilong spirit? Olsem wanem taim famili i sindaun wantaim long apinun na ol i laik kisim kaikai? Ol i save amamas na toktok gut wantaim? Em gutpela taim bilong famili i ken bung wantaim na toktok wantaim long ol samting i bin kamap long dispela san, na lap wantaim na amamas. Dispela inap helpim olgeta long famili.

Ol pikinini i mas mekim ol wok bilong spirit na mekim ol wok bilong ol long haus, tasol ol i mas i gat taim bilong pilai tu. Yumi mas tingim gut dispela samting. Wanpela man i raitim buk (Psychology for Life Today, bilong Charles R. Foster) na em i tok: ‘Ol papamama i mas save, pilai em i bikpela samting long ol pikinini. Ol papamama i save gut long dispela samting, ol i save givim taim long ol pikinini bilong ol i ken pilai. . . . Taim ol pikinini i go bikpela ol i mas tingim gut pilai na mani bilong lukautim famili na ol wok bilong ol long haus. Sapos ol i save ol dispela samting i wok wantaim, bai ol i no i go pilai bilong abrusim wok bilong ol long haus. Bai ol i skelim gut wok na pilai na mekim gut wok bilong ol, na dispela samting bai helpim famili long i stap amamas.’

Sapos papamama i helpim pikinini long kisim stretpela tingting long pilai na wok na ol samting bilong spirit, dispela bai helpim pikinini long laikim tumas ol samting bilong spirit na i stap klostu long Jehova. (Lukim 2 Timoti 3:​4, namba tu hap; Taitas 3:⁠3.) Taim papamama i lukim pikinini i kamap strong long spirit olsem, ol i save amamas tru. Na i gat narapela samting ol i ken mekim bilong kirapim pikinini long laikim tumas ol samting bilong spirit taim em i liklik yet, em olsem:

Helpim Pikinini long Tingim Gutpela Wok Em i Ken Mekim Bihain

Saveman King Solomon i givim gutpela tok long ol papamama, em i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” (Provep 22:⁠6) Dispela tok “gutpela pasin” i makim gutpela pasin em yet inap bihainim o gutpela pasin yu laik bai em yet i tingting long bihainim. Olsem na wanpela bikpela samting papa o mama i ken mekim bilong helpim pikinini long i stap amamas na kamap strong long spirit, em olsem: Em i mas helpim pikinini long tingim sampela wok em i ken mekim bihain, em ol wok i gat as bilong en. Ol dispela wok i mas gutpela na inap long pikinini i mekim. Kirapim pikinini long tingim sampela wok em i ken inapim liklik taim bihain. Olsem bai em i ken inapim sampela wok na dispela bai strongim em na kirapim em long makim sampela wok moa em i ken inapim long bihain, em ol dispela wok i bikpela wok moa.

Planti papamama i popaia na ol i larim pikinini yet i tingim wanem wok em i laik mekim long bihain. Ol pikinini i no gat bikpela save bambai ol inap tingim gut dispela samting. Sapos papamama i no helpim pikinini long tingim ol wok em i laik mekim long bihain, narapela man bai givim tingting long em−ating ol narapela pikinini o sampela tisa long skul. Ol papamama Kristen i save helpim pikinini bilong ol long tingim ol wok bilong spirit pikinini i ken mekim. Ol liklik pikinini i ken tingting long wok strong bambai ol inap i go insait long Skul Bilong Wok Autim Tok. I gat narapela narapela hap wok bilong autim tok ol i ken tingting long mekim. Olsem: Pastaim ol i ken givim tanget long man bilong haus na singautim em i kam harim pablik-tok samting, o mekim liklik tok bilong tilim magasin, na bihain kolim sampela tok bilong Baibel na toktok wantaim man. Gutpela sapos papamama i helpim pikinini long tingim sampela wok bilong stadi em i ken mekim. Olsem: Em i ken lain long kolim nem bilong olgeta 66 hap bilong Baibel, o lainim lainim sampela tok bilong Baibel na holim long tingting. Taim pikinini i liklik yet, papamama i mas toktok wantaim em long ol wok em i ken mekim long bihain. Ol tisa samting long skul bai kirapim ol pikinini long mekim wok mani samting, tasol ol papamama Kristen i ken kirapim ol pikinini bilong ol long mekim ol wok bilong inapim laik bilong ol long mekim wok bilong Jehova, olsem mekim wok painia o wok long Betel o mekim wok misineri samting.

Ol papamama i laik helpim pikinini bilong ol long kisim gutpela tingting bambai pikinini i save i gat sampela wok em i mas mekim. Ol i mas lainim pikinini long ol tok na lo bilong Baibel na bai dispela i lainim maus bilong bel bilong pikinini. Taim pikinini i kamap strong liklik, ol i ken tokim em ol i bilip long em−ol i bilip olsem em bai mekim pasin i stret. Long sampela samting ol i ken larim pikinini yet i tingim wanem samting i stret em i mas mekim na sapos pikinini i popaia, papamama i no ken krosim em; tupela i mas helpim em long kisim save long dispela rot. Sapos pikinini i kisim gutpela nem olsem man bilong harim tok, em i ken amamas. Dispela bai helpim pikinini long ‘kamap bikpela na i stap gut wantaim God.’

Taim pikinini i wok long kamap bikpela, papamama i ken skelim gut na sapos ol i lukim senis i kamap, ol i ken kirap bihainim narapela kain pasin bilong skulim na stretim pikinini. Ol i no ken giaman liklik long em. Ol i mas tok stret long em long ol i ting olsem wanem long pasin em i mekim o long senis i kamap. Sapos papamama i tok stret long pikinini na tupela i no giaman, bai pikinini i mekim wankain pasin long tupela. Bai em i toktok gut wantaim tupela na bai famili i pas gut wantaim.

Taim Devit i yangpela yet em i laikim tumas ol samting bilong spirit. Tok bilong ol singsing em i raitim i kamapim bel bilong em, em i pilim tru sori bilong God. (Sam 23:​1-6) Devit i bilip tru long Jehova na dispela samting i helpim em taim em i pait wantaim bea bilong bus na wanpela laion na draipela man bilong Filistia, em Golaiat, em i mekim pretim olgeta ami bilong Isrel. Yumi save, papa bilong Devit, em Jesi, em i amamas tru long strongpela bilip bilong pikinini man bilong em! Devit i stap klostu long Jehova, olsem pren bilong Jehova, i go inap long taim em i dai. (1 Samuel 17:​32-37, 45-50; Sam 19:​9, 10, 14; 15:​1, 2; 24:​3, 4) Sapos yumi helpim ol pikinini bilong yumi, ol tu inap i stap klostu olsem long Jehova, na bai yumi amamas long ol. Tasol yumi no inap mekim long strong bilong yumi yet.

Beten Askim God long Helpim Yu

Taim Manoa i save em bai kamap papa, em i beten askim God long tokim em long ol samting em i mas mekim bambai em i ken mekim bikpela long pikinini na skulim em gut. Jehova i harim beten bilong em na helpim em. (Ol Hetman 13:​8, 12, 24) Ol papamama long nau tu, ol i no ken les long beten askim God long helpim ol. Ol i mas singaut long God long givim gutpela tingting long ol bambai ol inap stiaim pikinini bilong ol i go long gutpela rot. Samuel, em wanpela profet bilong Jehova, em i tok: “Mi gat wok long beten oltaim long God i helpim yupela [lain bilong God]. Sapos mi lusim beten bai mi mekim sin long Bikpela.” (1 Samuel 12:23; skelim wantaim Provep 1:​24, 25.) Yumi tu i mas i gat wankain tingting long wok bilong yumi long helpim ol pikinini. Yumi laik helpim ol bambai ol i laikim tumas ol samting bilong spirit. Oltaim yumi mas beten askim God long helpim yumi bambai yumi inap mekim olsem.

No Ken Les

Olsem wanem? I no hatwok long mekim ol dispela samting? Em hatwok. Tasol sapos yu mekim, bai yu kisim bikpela amamas. Taim pikinini i kamap bikpela liklik na em i gat 13, 14 krismas samting, sampela hevi i mas kamap. Tasol taim hevi i kamap, yu no ken pret na longlong nabaut. Wok long stretim olgeta wan wan hevi taim ol i kamap, na yu no ken ting mirakel inap kamap. Taim hevi i kamap, yu mas strong, tasol yu no ken kros tumas; yu no ken mekim ol tok em bai sutim tru bel bilong pikinini; long pasin isi yu mas wok long stretim dispela hevi. Long kain taim olsem, sapos yu bosim gut bel na tingting, bai hevi i pinis na bihain bai yu pas gut wantaim pikinini gen.

Olgeta papamama i bilip long God ol i laik bai pikinini bilong ol i ken i stap gutpela. Yumi laik bai ol pikinini bilong yumi ol i givim bel long God, na laikim tumas tok bilong God, na long dispela rot bai ol i ‘kamap bikpela na i stap gut wantaim God.’ Tasol sampela taim, maski papamama Kristen i bin wok strong, tasol pikinini bilong ol i go bikpela na givim baksait long tok i tru. Tasol sapos yumi wok strong, ating wan wan taim tasol bai kain samting olsem i kamap. Sapos Jehova i helpim yumi bai yumi wok strong long lainim ol pikinini long bihainim gutpela pasin. Olsem bai yumi kisim gutpela pe−bai yumi lukim ol pikinini bilong yumi ol i wokabaut long rot bilong tok i tru olgeta de ol i stap laip.−Hibru 12:16; 1 Pita 2:2; Provep 22:⁠6.

[Rait long pes 30]

Jisas i redi long givim taim bilong em bilong helpim pikinini bilong ol narapela man. Olsem wanem ? Yumi no laik givim taim bilong yumi bilong helpim ol pikinini bilong yumi yet?

[Rait long pes 31]

Sapos yu laik bai pikinini bilong yu i ‘laikim tumas tok i tru,’ orait yu mas mekim dispela kaikai i kamap swit long em