Ol Papamama​—⁠Skulim Ol Pikinini Taim Ol i Liklik Yet

¹ “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” (Snd. 22:⁠6) Yupela ol papamama, sapos yupela i laik bai pikinini bilong yupela i “wokabaut long dispela rot” bilong tok i tru, yupela i mas kirap skulim ol long wanem taim? Taim ol i liklik pikinini yet!

² Taim Pol i tok ol i kirap skulim Timoti long ol samting bilong spirit taim em i “liklik pikinini,” dispela tok i makim taim em i bebi yet. (2 Ti. 3:​14, 15) Olsem na Timoti i kamap gutpela man i tingim tru ol samting bilong spirit. (Fl. 2:​19-22) Ol papamama, yupela tu i mas kirap skulim ol pikinini bilong yupela taim ol i “liklik pikinini” na bai ol i ‘mekim wok bilong God taim ol i kamap bikpela.’​—⁠1 Sml. 2:⁠21.

³ Givim Wara Ol i Mas Kisim Bilong Kamap Bikpela: Ol yangpela diwai i mas kisim wara oltaim na bai ol i ken kamap strongpela diwai, na olsem tasol ol pikinini i gat kain kain krismas ol i mas kisim wara bilong tok i tru bilong Baibel bilong ol i ken kamap strongpela wokman bilong God. Nambawan gutpela rot bilong skulim ol pikinini long tok i tru na helpim ol long pas gut wantaim Jehova, em pasin bilong mekim oltaim famili-stadi. Tasol yupela ol papamama i mas tingim skel bilong wan wan pikinini, olsem hamas minit samting ol inap putim yau na kisim ol tok. Ating i gutpela moa long skulim ol liklik pikinini inap sotpela taim tasol na mekim planti taim, winim pasin bilong skulim ol i go longpela taim na mekim wan wan taim tasol.​—⁠Lo 11:​18, 19.

⁴ No ken ting ol pikinini bilong yu i no inap kisim save. Stori long ol man em Baibel i kamapim stori bilong ol. Kirapim ol long wokim piksa bilong sampela stori bilong Baibel o mekim pilai bilong sampela stori olsem. Sapos yu gat ol video na kaset, na ol pilai bilong Baibel, mekim gutpela wok long ol. Senisim ol tok bilong famili-stadi na bai em i stret long krismas na skel bilong ol pikinini long kisim save. Pastaim skulim ol pikinini long ol samting i no hatwok long kisim na skulim ol inap sotpela taim; tasol taim ol i wok long go bikpela, yu mas skulim ol long planti samting moa. Taim yu skulim ol long Baibel, mekim long pasin ol i amamas long en na skulim ol long kain kain samting. Yu laik bai pikinini bilong yu i “laikim tumas” tok bilong Baibel, olsem na mekim stadi long pasin i kirapim tingting bilong ol.​—⁠1 Pi. 2:⁠2.

⁵ Helpim Ol Long Insait Long Kongrigesen: Putim ol mak bilong ol pikinini i ken winim bambai ol i ken insait tru long ol wok bilong kongrigesen. Wanem samting i ken stap olsem namba wan mak bilong winim? Papamama bilong tupela liklik pikinini i tok: “Mipela i bin wok long skulim ol long sindaun isi long Haus Kingdom.” Bihain, helpim ol pikinini long bekim sampela tok long toktok bilong ol yet, na putim mak bilong insait long Skul Tiokratik Bilong Autim Tok. Long taim bilong autim tok, ol gutpela mak pikinini i ken winim i olsem: Em i ken givim ol liklik nius, ritim wanpela skripsa, tilim nius, na toktok gut wantaim man bilong haus.

⁶ Stap Olsem Gutpela Piksa Long Pasin Bilong Givim Bel: Olsem wanem? Ol pikinini bilong yu i save harim yu stori long Jehova long olgeta de na beten long em? Ol i save lukim yu stadi long Tok bilong em, go long ol miting, autim tok, na amamas long mekim laik bilong God? (Sng. 40:⁠8) Em i bikpela samting long ol i lukim yu mekim olsem na yu mekim ol dispela samting wantaim ol. Wanpela pikinini meri i stori long mama bilong em i bin mekim bikpela long 6-pela pikinini na olgeta i kamap gutpela Witnes. Em i tok: “Wanpela samting i bin kirapim tingting bilong mi, em mama yet i stap olsem gutpela piksa​—⁠dispela i winim pasin bilong toktok.” Mama bilong 4-pela pikinini i tok: “Mipela i no save tok nating olsem ‘mipela i putim Jehova i stap namba wan,’ nogat; mipela i bihainim dispela tok long olgeta samting long i stap bilong mipela.”

⁷ Yes ol papamama, kirap hariap long skulim ol pikinini bilong yupela, lainim ol long tok i tru bilong Baibel, putim ol mak ol i ken winim, na stap olsem gutpela piksa ol i ken bihainim. Bihain bai yupela i amamas long yupela i bin mekim olsem!

This article is repeated in km 2/06.