Skulim Ol Pikinini Bilong Yupela Long Kamap Man Bilong Autim Tok
1. Buk Song 148:12, 13 i kirapim ol papamama Kristen long mekim wanem?
1 Jehova i laik bai ol yangpela i litimapim nem bilong em. (Sng. 148:12, 13) Olsem na ol papamama Kristen i save skulim ol pikinini bilong ol long ol tok i tru bilong Baibel na ol lo bilong God long stretpela pasin. Na tu, ol i skulim ol long kamap ol man bilong autim gutnius. Olsem wanem papamama i ken wok yet long mekim olsem?
2. Taim papamama i stap gutpela piksa, dispela i mekim wanem long ol pikinini?
2 Stap Gutpela Piksa: Hetman Gideon i tokim 300 soldia bilong em olsem: “Yupela was na lukim mi . . . orait yupela tu i mas mekim olsem.” (Het. 7:17) Ol pikinini i save lukim pasin papamama i mekim na ol i save bihainim. Wanpela papa i save wok nait, tasol taim em i kam bek long haus long Sarere moning em i no save slip, nogat, em i save kisim ol pikinini bilong em i go autim tok maski em i taiet tru. Tru, em i no mekim wanpela tok, tasol pasin bilong em i skulim ol pikinini olsem wok bilong autim tok i bikpela samting. (Mat. 6:33) Olsem wanem? Ol pikinini bilong yu i save lukim yu i amamas long insait long ol wok bilong lotu, olsem beten, ritim Baibel, bekim tok, na go autim tok? Tru, i no olsem yu bai stap gutpela piksa olgeta. Tasol ol pikinini bilong yu bai redi long bihainim ol tok bilong Jehova em yu skulim ol long en sapos ol i lukim olsem yu givim bel tru long mekim wok bilong em.—Lo 6:6, 7; Rom 2:21, 22.
3. Ol papamama i ken helpim ol pikinini long putim wanem ol mak bilong spirit long winim?
3 Putim Ol Mak Ol Pikinini i Ken Winim: Ol papamama i save wok strong tru long skulim ol pikinini bilong ol long wokabaut, toktok, bilas, na long mekim ol narapela samting tu. Taim ol pikinini i wok long i go bikpela, papamama i save putim ol nupela mak em ol pikinini i ken winim. Sapos ol papamama i Kristen, ol i save helpim ol pikinini bilong ol long putim ol mak bilong spirit, em ol mak i stret long krismas na save bilong ol pikinini. (1 Kor. 9:26) Olsem wanem? Yu skulim ol pikinini bilong yu long bekim ol tok long miting long toktok bilong ol yet na yu helpim ol long redim ol tok bilong ol long Skul Tiokratik Bilong Autim Tok? (Sng. 35:18) Olsem wanem? Yu skulim ol long insait long ol narapela narapela rot bilong autim tok? Yu helpim ol long putim mak bilong kisim baptais na insait long wok bilong God fultaim? Yu helpim ol long bung wantaim ol bratasista em ol i save givim bel long autim tok bambai ol dispela bratasista i ken strongim ol?—Snd. 13:20.
4. Taim papamama i kirap skulim ol pikinini taim ol i liklik yet long insait long wok autim tok, olsem wanem dispela i save helpim ol pikinini?
4 Man bilong raitim song i tok: “God, yu bin skulim mi long taim mi liklik yet na i kam inap long nau, na mi save tokaut yet long ol gutpela gutpela samting yu bin mekim.” (Sng. 71:17) Taim ol pikinini i liklik yet, yu mas kirap skulim ol long kamap ol manmeri bilong autim tok. Taim yu skulim ol gut long tok bilong God dispela bai helpim ol i go inap long taim ol i kamap bikpela man na meri.—Snd. 22:6.