Skulim Ol Pikinini Bilong Yu Long Litimapim Nem Bilong Jehova
1 Long Song 148:12, 13, Baibel i strongim ol yangpela man na meri long “litimapim nem bilong Bikpela!” Baibel i gat stori bilong planti yangpela pikinini husat i bin mekim olsem. Olsem: “Yangpela mangi Samuel i mekim wok bilong Bikpela.” (1 Sml. 2:18) Wanpela “yangpela meri” i tokim meri bilong Naman olsem profet bilong Jehova long Israel inap oraitim sik lepra bilong Naman. (2 Kin. 5:1-3) Taim Jisas i go insait long tempel na mekim ol strongpela wok, “ol pikinini” i singaut olsem: “Amamas long Pikinini Bilong Devit.” (Mt. 21:15) Olsem wanem ol papamama i ken skulim ol pikinini long litimapim nem bilong Jehova?
2 Stap Gutpela Piksa: Paslain long ol papa Israel i putim tok i tru long bel bilong pikinini bilong ol, ol papa yet i mas laikim tru Jehova na putim ol lo bilong em long bel bilong ol yet. (Lo 6:5-9) Sapos yu stori long ol gutpela samting bilong wok autim tok na autim tok long olgeta wik, ol pikinini bilong yu bai i ting wok autim tok i bikpela samting na i save givim amamas long ol.
3 Wanpela sista i stori olsem: “Taim mi wok long kamap bikpela, long olgeta wiken famili bilong mipela i save mekim wok autim tok. Mi lukim olsem papamama bilong mi i save amamas long mekim dispela wok. Taim mipela ol pikinini i wok long kamap bikpela, mipela i ting wok autim tok em i wanpela wok bilong amamas.” Dispela sista i kamap pablisa i no baptais taim em i gat 7-pela krismas, na inap 32 yia em i bin mekim fultaim sevis.
4 Wok Long Skulim Ol: Taim yu mekim wok autim tok, givim sampela wok long ol pikinini. Ating ol i ken paitim dua o geit, givim liklik nius long man bilong haus, o ritim wanpela skripsa. Dispela bai mekim na ol i amamas moa long wok autim tok na i helpim ol long pilim olsem ol inap insait long wok bilong autim gutnius bilong Kingdom. Na taim ol i wok long kamap bikpela moa, ol i ken mekim sampela wok moa bilong autim tok. Olsem na helpim ol long kamap strong na kirapim ol long tingting long ol mak bilong spirit ol i ken winim.
5 Toktok wantaim ol elda taim yu ting ol pikinini bilong yu i winim mak bilong kamap pablisa i no baptais na taim ol pikinini i tok ol i gat laik long kamap pablisa. Taim ol i kamap pablisa, dispela bai i helpim ol long tingim olsem ol yet i gat wok long litimapim nem bilong Jehova. Tingim, bilong winim mak bilong kamap pablisa, i no olsem pikinini i mas i gat wankain save olsem ol man i baptais na i bikpela pinis. Olsem wanem? Pikinini bilong yu i kliagut long ol bikpela tok bilong Baibel? Em i save bihainim ol lo bilong Baibel long stretpela pasin? Em i gat laik long mekim wok autim tok na stap olsem wanpela Witnes Bilong Jehova? Sapos olsem, ol elda inap tok olsem em i winim mak bilong kamap pablisa i no baptais.—Lukim Oganaisesen Bilong Mekim Laik Bilong Jehova, p. 79-82.
6 Bilong skulim ol pikinini long litimapim nem bilong Jehova, yu mas wok strong tru. Tasol i no gat planti samting ol papamama i ken kisim bikpela amamas long en olsem amamas ol i kisim taim ol i lukim pikinini bilong ol i kamap strong long ol samting bilong spirit. Na bikpela samting moa, Jehova i amamas taim ol pikinini i tokim ol narapela man long ol gutpela wok bilong Em.
[Askim Bilong Stadi]
1. Ol yangpela pikinini inap litimapim nem bilong Jehova?
2. Bilong wanem em i bikpela samting long papamama i stap gutpela piksa long ol pikinini bilong ol?
3. Olsem wanem pasin bilong papamama bilong wanpela sista i bin helpim em tru?
4. Olsem wanem ol papamama i ken wok long skulim ol pikinini?
5. Long wanem taim pikinini i winim mak bilong kamap pablisa i no baptais?
6. Bilong wanem em i gutpela samting tru long ol papamama i skulim pikinini bilong ol?