Askim

◼ Nau yumi kisim nupela save long man i no baptais yet na wanem taim em i ken autim tok, orait olsem wanem long man yumi Baibel stadi long em? Yumi ken kisim em i raun wantaim yumi bilong luksave long pasin bilong autim tok o nogat?

Man i mas kamap pablisa pastaim, olsem pablisa i no baptais yet, na bai em inap raun wantaim ol Witnes Bilong Jehova long autim tok.

Planti man i orait long ol Witnes Bilong Jehova i mekim gutpela wok bilong ol long raun autim tok na “mekim olgeta lain manmeri i kamap disaipel . . . na . . . lainim ol” na stadim ol long Baibel. (Matyu 28:19, 20) Orait, sapos wanpela man i raun wantaim ol Witnes, ol man bai ting olsem wanem long em? Ol bai ting em tu i mas wanpela Witnes.

Tasol wan wan taim ol elda i orait long ripota bilong nius o profesa bilong skul koles i ken raun wantaim wanpela Witnes na bai em i ken lukim pasin bilong autim tok. Tasol kain man olsem i mas bilas gut na bihainim pasin i stret wantaim pasin bilong ol Witnes taim em i mekim olsem. Na Witnes i ken toksave long ol man olsem dispela poroman bilong em i wanpela ripota o profesa na em i laik luksave long pasin bilong yumi long mekim dispela bikpela wok bilong yumi.

Na ol papamama Kristen i save kisim ol pikinini bilong ol na raun autim tok, maski pikinini i no kamap yet olsem pablisa i no baptais yet. Olsem bai papamama i no larim ol pikinini i stap nating na i no gat was bilong ol. Na sapos pikinini i raun wantaim ol, ol i ken toktok wantaim em long tok bilong Baibel na long pasin bilong God taim ol “i wokabaut long rot.” (Lo 6:4-7) Tasol dispela samting i samting bilong famili, na i no olsem Witnes i larim wanpela man i raun wantaim em bilong luksave tasol. Na taim pikinini i raun wantaim papamama long autim tok, em bai lain na em bai redi long kamap pablisa na litimapim nem bilong Jehova—Matyu 21:15,16; lukim buk Lo Bilong Yumi Bilong Mekim Wok Autim Tok, pes 99, 100.

Tasol olsem wanem sapos wanpela Witnes i stadi wantaim wanpela man long Baibel na dispela man i wok long kamap disaipel? I gat as na em inap tokim ol wanblut na wanwok na ol narapela man long “ol strongpela wok bilong God” em i bin lainim long Baibel. (Aposel 2:11) Na i gutpela sapos em i ken kamap strong inap long em i ken wok wantaim ol Witnes Bilong Jehova long “autim tok bilong God.”—Aposel 13:5.

Wastaua bilong Me 1989, pes 19, i kolim ol samting sumatin i mas mekim na bai em i wokabaut wantaim ol Witnes long autim tok, na long dispela taim em bai kamap wanpela pablisa i no baptais yet. Em i mas i gat save long ol as tok bilong Baibel, na em i mas bihainim ol stretpela lo na pasin olsem Baibel i makim, na em yet i mas i gat laik long raun autim tok wantaim ol Witnes Bilong Jehova. Tupela elda bilong kongrigesen i ken toktok wantaim em na dispela Witnes i bin stadi wantaim em, na ol i ken helpim na strongim em. Ol i mas mekim dispela samting paslain long taim em i go wantaim pablisa long autim tok na kisim sampela save moa.

Sapos dispela sumatin inap kamap pablisa na autim tok, na nau em i kirap mekim olsem, ating em i laik raun pastaim wantaim wanpela pablisa na bai em i ken save yumi autim tok olsem wanem. Na ating pablisa i ken lainim em isi isi—ating pablisa i ken askim em long helpim pablisa long kaunim sampela skripsa samting, na bihain pablisa i ken larim em i go pas long autim tok long man bilong haus. Taim em yet i autim tok, nau em i ken putim namba wan ripot bilong em. Taim em i lain olsem long autim tok, em i mekim olsem Baibel i tok: “Sumatin i no winim tisa bilong en. Tasol taim em i skul gut pinis, orait em bai i kamap wankain olsem tisa bilong en.”—Luk 6:40.