Ol i Putim Gut Yau na Abrusim Bagarap

JISAS KRAIS i mekim tok lukaut long pinis bilong pasin na lo bilong ol Juda em ol i save bihainim long tempel long Jerusalem. Em i no tok long wanem de dispela samting bai kamap. Tasol em i stori long ol samting bai kamap paslain long dispela bagarap. Em i tokim ol disaipel bilong em long was i stap na lusim dispela ples ol inap kisim bagarap long en.

Jisas i tok profet: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau.” Em i tok tu olsem: “Yupela bai i lukim dispela samting nogut tru . . . na dispela samting bai i sanap i stap long haus bilong God yet. . . . Long dispela taim ol manmeri i stap long distrik Judia ol i mas ranawe i go long ples maunten.” Jisas i tokim ol disaipel bilong em long ol i no ken i go bek bilong kisim ol kago bilong ol. Em i bikpela samting long ol i mas ranawe hariap na bai ol i ken abrusim bagarap.​—⁠Luk 21:​20, 21; Matyu 24:​15, 16.

Bilong pinisim pasin bikhet i bin stap longpela taim, Sestius Galus i bringim ami bilong Rom long pait long Jerusalem long 66 C.E. Em i go insait long taun tu na banisim tempel. Ol manmeri long taun i paul nabaut. Ol man i bin was gut, ol inap luksave olsem bagarap i laik kamap. Tasol ol inap ranawe? Wantu Sestius Galus na ami bilong em i lusim taun. Ol bikhetman Juda i ranim ol. Nau em taim bilong ranawe lusim Jerusalem na Judia!

Long yia bihain, ami bilong Rom, em Vespesian na pikinini bilong em Taitus i bosim, ol i kam bek. Kantri olgeta i insait long woa. Long kirap bilong 70 C.E., ol Rom i wokim wanpela bikpela banis i raunim Jerusalem. I no gat rot moa long ranawe. (Luk 19:​43, 44) Ol narapela narapela lain insait long taun i kilim i dai arapela. Ol arapela man i dai long han bilong ol Rom o ol Rom i kisim ol i go long kalabus. Taun na tempel bilong en i bagarap olgeta. Josifas, em wanpela Juda long taim bilong ol aposel na em i raitim stori bilong ol samting i kamap bipo, em i tok winim wan milion Juda i karim pen na i dai. I kam inap long nau ol i no wokim gen dispela tempel.

Sapos ol Kristen i bin stap yet long Jerusalem long 70 C.E., ol man bai kilim ol i dai o ol i mas go mekim wok kalabus wantaim ol arapela. Tasol ol saveman bilong bipo i tok ol Kristen i bin bihainim tok lukaut bilong God na ranawe lusim Jerusalem na Judia na i go long ol maunten i stap long hap is bilong wara Jordan. Sampela i sindaun long Pela, long provins Perea. Ol i bin lusim Judia na ol i no bin go bek. Ol i bin bihainim tok lukaut bilong Jisas, olsem na ol i abrusim bagarap.

Yu Save Putim Gut Yau Long Ol Tok Lukaut Bilong Lain Yu Inap Bilip Long Ol?

Taim ol man i harim pinis planti tok lukaut na ol samting ol i tok long en i no bin kamap, orait planti man bai i no bilip tumas long ol kain tok lukaut olsem. Tasol pasin bilong putim gut yau long tok lukaut inap helpim yu long abrusim bagarap.

Long Saina long 1975, ol i givim tok lukaut olsem graun bai guria. Ol bikman bilong gavman i kirap mekim ol samting. Ol manmeri i bihainim tok. Planti tausen manmeri i abrusim bagarap.

Long Epril 1991 long Filipins, ol asples i sindaun long maunten Pinatubo, ol i tok ol i lukim smok na sit bilong paia i sut i kam antap long maunten. Wanpela lain (Philippine Institute of Volcanology and Seismology) i skelim dispela samting inap tupela mun, na bihain ol i tok klostu nau bagarap i laik kamap. Kwiktaim planti tausen tausen manmeri i lusim dispela hap. Long moningtaim long Jun 15, maunten i pairap bikpela tru na planti graun, olsem 8 kubik kilomita, i bruk liklik liklik olsem sit bilong paia samting na i sut i go antap long skai na bihain ol dispela samting i kam daun na karamapim graun. Pasin bilong putim gut yau long tok lukaut i mekim na planti tausen man i abrusim bagarap.

Baibel i mekim tok lukaut long pinis bilong pasin nogut bilong dispela graun. Nau yumi stap long taim bilong las de. Olsem wanem? Taim pinis i wok long kam klostu, yu wok long was i stap? Yu save mekim ol samting na yu no stap long hap em yu inap kisim bagarap long en? Yu tingim olsem taim i sot pinis na yu givim tok lukaut long ol arapela long ol tu i mas was i stap?

[Piksa long pes 20]

Pasin bilong putim gut yau long tok lukaut i helpim planti man long abrusim bagarap taim maunten Pinatubo i sutim sit bilong paia

[Piksa long pes 21]

Ol Kristen husat i bin putim gut yau long tok lukaut bilong Jisas ol i abrusim bagarap taim Jerusalem i bagarap long 70 C.E.