Yumi Mas Amamasim Ol Bikpela De o Nogat?

BAIBEL i no as bilong ol bikpela de bilong lotu na ol bikpela de bilong dispela graun em planti manmeri long olgeta hap i save amamasim long nau. Orait wanem samting i as bilong ol dispela bikpela de? Sapos yu inap mekim wok painimaut long wanpela laibreri, tingim tok ol buk i mekim long ol bikpela de em planti man i save amamasim long hap yu stap long en. Tingim sampela.

Ista. Buk The Encyclopædia Britannica i tok: “I no gat wanpela tok long Nupela Testamen i soim olsem ol man i bin mekim Ista.” Orait Ista i bin kamap olsem wanem? Lotu haiden i as bilong en. Dispela bikpela de i bilong tingim kirap bek bilong Jisas, tasol lotu Kristen i no as bilong ol pasin ol man i save mekim long Ista. Olsem: Buk The Catholic Encyclopedia i tok long “Ista rabit,” olsem: “Rabit em i wanpela mak bilong ol haiden na oltaim em i bin stap olsem mak bilong kamapim pikinini.”

Ol Amamas Bilong Nuyia. Det na ol pasin bilong amamasim Nuyia i no wankain long olgeta kantri. Buk The World Book Encyclopedia i tok long as bilong dispela de, olsem: “Long 46 B.C. empera bilong Rom, Julius Sisar, i bin makim Janueri 1 olsem De Bilong Nuyia. Ol Rom i makim dispela de bilong god Janus, em god bilong ol geit, ol dua, na bilong kirap bilong ol samting. As bilong nem bilong mun Janueri em Janus, em dispela god i gat tupela pes​—wanpela i lukluk i go stret na narapela i lukluk i go long baksait.” Olsem na pasin bilong ol haiden i as bilong ol amamas bilong Nuyia.

Ol Arapela Bikpela De. Yumi no inap stori long olgeta bikpela de ol man i stap long olgeta hap bilong graun i save amamasim. Tasol Jehova i no orait long ol bikpela de i save litimapim nem bilong man o ol oganaisesen bilong man. (Jeremaia 17:​5-7; Aposel 10:​25, 26) Tingim tu olsem as bilong ol bikpela de bilong lotu i helpim yumi long save God i orait long ol o nogat. (Aisaia 52:11; KTH 18:4) Ol stiatok bilong Baibel em Sapta 16 bilong dispela buk i kamapim bai helpim yu long save long God i gat wanem tingting long pasin bilong insait long ol bikpela de bilong dispela graun.