Wanpela Kingdom Bai Bosim Graun Olgeta

Wanem dispela Kingdom yumi laik stori long en?— Yes, em Kingdom Bilong God, em dispela Kingdom bai mekim graun i kamap Paradais. Yu laik kisim sampela save moa long dispela Kingdom?—

Olgeta kingdom i gat king bilong ol. Na king i save bosim ol manmeri long kantri em i lukautim. Yu save husat em i King long Kingdom Bilong God?— Em Jisas Krais. Em i stap long heven. Klostu nau em bai stap King bilong olgeta manmeri long graun! Yu ting yumi bai stap amamas taim Jisas i stap King na bosim graun olgeta?—

Bai yumi stap amamas tru! Long Paradais, ol man bai i no pait moa o go long woa. Olgeta manmeri bai laikim narapela narapela. I no gat wanpela man bai sik o dai. Ol aipas bai lukluk, ol yaupas bai harim, na ol lek nogut bai ran na kalap. Olgeta man bai i gat planti kaikai. Na ol animal bai stap pren bilong ol narapela animal na pren bilong yumi tu. Ol man i dai pinis ol bai kirap bek. Ol man na meri em yu ritim stori bilong ol long dispela buklet olsem Rebeka, Rahap, Devit, na Elaija, ol tu bai kirap bek! Yu amamas long bungim ol taim ol i kirap bek?—

Jehova i laikim yu na em i laik bai yu stap amamas. Sapos yu wok yet long kisim save long Jehova na bihainim tok bilong em, yu bai stap laip oltaim long wanpela gutpela ples Paradais! Yu laik stap long kain ples olsem?—