Jisas i Givim Bel Long Lotu i Tru

Bihain long weding i kamap long Kana, Jisas i go long Kaperneam. Mama na ol brata bilong Jisas em Jems, Josep, Saimon, na Judas, ol i go wantaim em.

Tasol bilong wanem Jisas i go long Kaperneam? Dispela taun em wanpela biktaun we i stap klostu long ol narapela taun, na i no olsem taun Nasaret na Kana em ol i stap longwe long ol narapela ples. Na tu, planti bilong ol nupela disaipel bilong Jisas i stap long Kaperneam o klostu long en. Olsem na Jisas i ken skulim ol long ples bilong ol yet.

Taim Jisas i stap long Kaperneam, em i mekim planti gutpela wok. Na planti man long dispela taun na ol narapela ples i stap klostu i harim stori long ol samting em i bin mekim. Jisas na ol disaipel bilong em i bilong lain Juda, na ol i givim bel tru long mekim wok bilong God. Tasol klostu nau ol bai go long Jerusalem long bung bilong Pasova bilong yia 30 C.E.

Taim Jisas na ol disaipel i go stap long tempel long Jerusalem, ol disaipel bilong em i kirap nogut long lukim pasin em i mekim, em samting ol i no bin lukim bipo.

Lo God i givim long ol Israel i tok ol i mas givim ol animal olsem ofa, na ol man i kam long ol narapela ples i mas i gat kaikai samting long taim ol i stap long tempel. Olsem na Lo i tok orait long ol man bilong ol narapela hap i kam long Jerusalem long ol i ken bringim mani bilong ol long baim “bulmakau na sipsip” na ol narapela samting ol i nidim long taim ol i stap long Jerusalem. (Lo 14:24-26) Em risen na ol bisnisman long Jerusalem i save salim ol animal o pisin insait long wanpela bikpela ples bung long banis bilong tempel. Na sampela bilong ol i save mekim pasin giaman na salim ol samting long bikpela pe.

Jisas i belhat, na em i kapsaitim tebol na mani bilong ol man bilong senisim mani, na rausim ol i go ausait long tempel. Jisas i tok: “Rausim ol dispela samting long hia! Maski long mekim haus bilong Papa bilong mi i kamap olsem haus maket!”—Jon 2:16.

Taim ol disaipel bilong Jisas i lukim dispela samting, ol i tingim tok profet i stori long Pikinini bilong God olsem: “Pasin bilong laikim tumas haus bilong yu bai i pulap tru long mi.” Tasol ol Juda i tok: “Bai yu wokim wanem mirakel long mipela bilong soim olsem yu gat namba long mekim ol dispela samting?” Jisas i tokim ol: “Brukim dispela tempel na insait long 3-pela de bai mi kirapim gen.”—Jon 2:17-19; Song 69:9.

Ol Juda i ting Jisas i toktok long tempel long Jerusalem, olsem na ol i tok: “Ol i wokim dispela tempel insait long 46 yia, na yu bai sanapim insait long 3-pela de, a?” (Jon 2:20) Tasol dispela tok bilong Jisas i makim bodi bilong em yet, na i no tempel tru. Tripela yia bihain long taim Jisas i kirap bek, ol disaipel bilong em i tingim bek ol dispela tok.