Namba Tu Mirakel Long Kana

Jisas i stap 2-pela de samting long Samaria, na bihain em i go bek long asples bilong em long Galili. Em i bin mekim bikpela wok bilong autim tok long Judia, tasol em i no go bek long Galili bilong kisim malolo, nogat. Em i laik mekim bikpela wok moa bilong autim tok long dispela hap em i go bikpela long en. Jisas i save olsem ol man long Galili bai i no inap mekim gutpela pasin long em, na em i tokaut olsem, “profet i no gat nem long asples bilong em yet.” (Jon 4:44) Maski i olsem, ol disaipel i lusim Jisas na go bek long famili bilong ol na mekim ol wok bilong ol long bipo.

Jisas i kirap long autim wanem tok? Em i autim tok olsem: “Kingdom bilong God i kam klostu. Yupela i mas tanim bel na bilip long gutnius.” (Mak 1:15) Taim em i autim dispela tok, wanem samting i kamap? Planti manmeri long Galili i amamas long Jisas, na givim biknem long em. Ol i no mekim olsem bikos ol i harim ol tok em i autim, nogat. Sampela mun i go pinis, sampela manmeri bilong Galili i bin stap long Pasova long Jerusalem na ol i lukim ol mirakel Jisas i bin wokim.—Jon 2:23.

Jisas i kirap mekim bikpela wok long wanem hap long Galili? Ating long Kana, em i bin wokim mirakel na tanim wara i kamap wain long wanpela marit kaikai. Nau em namba 2 taim Jisas i stap long dispela hap, na em i harim olsem wanpela yangpela mangi i sik nogut tru, na klostu em i laik dai. Dispela mangi em pikinini man bilong wanpela ofisa bilong Herot Antipas, em dispela king husat i tok orait na ol i katim nek bilong Jon Bilong Baptais. Dispela ofisa i harim olsem Jisas i lusim Judia na i kamap long Kana. Olsem na em i lusim haus bilong em long Kaperneam na i go long Kana bilong painim Jisas. Em i wari tru long pikinini bilong em, na em i tokim Jisas: “Bikpela, kam daun paslain long pikinini bilong mi i dai.”—Jon 4:49.

Dispela man i kirap nogut long tok bilong Jisas olsem: “Yu ken i go, pikinini bilong yu i kamap orait.” (Jon 4:50) Ofisa bilong Herot i bilipim tok bilong Jisas na em i kirap wokabaut bilong i go bek long ples bilong em. Tasol ol wokman bilong em i kam bungim em long rot, na ol i tokim em long wanpela gutpela nius. Ol i tok pikinini man bilong em i stap laip na em i orait! Olsem na ofisa i askim ol, ‘Wanem taim em i kamap orait?’ Em i givim dispela askim na bai em inap save long wanem aua stret dispela samting i kamap.

Ol i tok, “Asde long namba 7 aua skin hat bilong en i pinis.”—Jon 4:52.

Ofisa i luksave olsem long dispela taim stret Jisas i bin tok: “Pikinini bilong yu i kamap orait.” Bihain, dispela ofisa husat i maniman na em i gat ol wokman, em na famili bilong en i kamap disaipel bilong Krais.

Kana em ples Jisas i bin wokim tupela mirakel, em i tanim wara i kamap wain na bihain em i oraitim wanpela mangi i stap longwe inap olsem 26 kilomita. Tru em i wokim ol narapela mirakel. Tasol mirakel Jisas i wokim bilong oraitim dispela mangi i bikpela samting bikos em i kamapim klia olsem em i kam bek long Galili. Tru tumas, Jisas yet i dispela profet God i bin makim. Tasol ol man long “asples bilong em yet” bai mekim gutpela pasin long em na onarim em, o nogat?

Ol man bai luksave long dispela taim Jisas i go bek long asples bilong em long Nasaret. Wanem samting bai painim em long dispela hap?