Jisas i Wokim Namba Wan Mirakel

Nau em namba 3 de bilong Nataniel long i stap olsem wanpela bilong ol fes disaipel bilong Jisas. Jisas wantaim sampela bilong ol fes disaipel bilong em, ol i go long hap not long distrik Galili, em asples bilong ol. Ol i laik go long taun Kana, em ples bilong Nataniel. Kana i stap long ol ples maunten long hap not bilong Nasaret, em ples Jisas i go bikpela long en. Ol i invaitim Jisas na ol disaipel bilong em long go long wanpela kaikai bilong marit long Kana.

Mama bilong Jisas tu i bin kam long dispela weding. Maria em i pren bilong famili bilong man na meri i laik marit, olsem na ating em i helpim ol long lukautim ol man i kam long weding. Olsem na kwiktaim em i luksave olsem wain i laik pinis, na em i tokim Jisas: “Ol i no gat wain.”—Jon 2:3.

Tok bilong Maria i soim olsem em i laik bai Jisas i mekim sampela samting, long wanem, wain i pinis. Tasol Jisas i tok: “Olsem wanem dispela em samting bilong mi na bilong yu?” (Jon 2:4) Olsem King God i makim, Jisas i save olsem em i mas mekim ol wok em Papa bilong em long heven i tokim em long mekim, na i no famili o ol pren bilong em. Maria i bihainim gutpela savetingting na larim pikinini bilong em long tingim samting em bai mekim, na em i tokim ol man i lukautim wain: “Wanem samting em i tokim yupela long mekim, yupela i mas mekim.”—Jon 2:5.

I gat 6-pela sospen ston bilong pulapim wara, na wan wan bilong ol inap holim winim 40 lita wara. Jisas i tokim ol man i lukautim wain: “Pulapim ol sospen ston long wara.” Bihain Jisas i tokim ol: “Kisim sampela na karim i go long man bilong bosim kaikai.”—Jon 2:7, 8.

Man bilong bosim kaikai i laikim tru dispela gutpela wain, tasol em i no save olsem dispela wain i kamap long rot bilong mirakel. Olsem na em i tokim man i marit olsem: “Olgeta arapela man i save tilim gutpela wain pastaim, na taim ol manmeri i spak pinis, ol i save tilim wain i no gutpela tumas. Yu bin holim bek dispela gutpela wain inap long nau.”—Jon 2:10.

Dispela em namba wan mirakel Jisas i wokim. Taim ol disaipel bilong Jisas i lukim dispela mirakel, dispela i strongim bilip bilong ol. Bihain, Jisas, mama bilong em, na ol brata bilong em i go long taun Kaperneam long nambis bilong raunwara Galili long hap not wes.