I Stap na Wok Bilong Jisas

Namba Wan Mirakel Jisas i Wokim

JISAS wantaim ol nupela disaipel bilong em ol i lusim ples Jodan. Nau tasol, Andru na Pita na Jon na ating Jems na Filip na Nataniel tu, ol i bin kamap disaipel bilong Jisas. Ol i namba wan disaipel bilong Jisas.

Nau ol i laik i go bek long as ples bilong ol long Galili. Ol i laik i go long Kena, em as ples bilong Nataniel. Kena i stap long ples maunten klostu long taun Nasaret, em ples Jisas i bin i go bikpela long en. Wanpela man bilong dispela hap i bin singautim ol i go long wanpela kaikai bilong marit.

Mama bilong Jisas tu i go long dispela kaikai bilong marit. Em i pren bilong famili bilong man na meri i laik marit, olsem na em i helpim wok bilong lukautim ol man i kam long kaikai bilong marit. Em i lukim ol i sot long wain na kwiktaim em i tokim Jisas, “Ol i no gat wain.”

Taim Maria i mekim dispela tok, i olsem em i laik tokim Jisas long mekim wanpela samting na stretim dispela hevi. Tasol pastaim Jisas i no laik. Em i tok: “Meri, em i samting bilong mi, na i no samting bilong yu.” God i bin makim em i stap King, olsem na famili na ol wantok bilong em i no ken tokim em long ol samting em i mas mekim. Orait Maria i bihainim gutpela tingting na em i no mekim sampela tok moa; em i tok tasol long ol wokman: “Sapos em i mekim wanpela tok long yupela, em yupela i mas bihainim.”

I gat 6-pela sospen ston i stap. Ol inap pulimapim 10-pela galen wara samting long olgeta wan wan sospen. Jisas i tokim ol wokman: “Pulimapim wara long ol sospen.” Na ol wokman i pulimapim tru. Bihain Jisas i tok: “Kapsaitim sampela nau na kisim i go long bos bilong kaikai.”

Bos bilong kaikai i laikim tru dispela wain na em i tok em i gutpela tru. Em i no save dispela wain i bin kamap long rot bilong wanpela mirakel. Em i singautim man i laik marit na tokim em: “Olgeta man ol i save tilim gutpela wain pastaim. Na bihain ol man i dring planti pinis, orait ol i save tilim wain i nogut liklik. Tasol yu, yu bin pasim gutpela wain, na nau tasol yu kisim i kam.”

Dispela em i namba wan mirakel Jisas i wokim. Taim ol nupela disaipel bilong Jisas i lukim dispela samting Jisas i mekim, dispela i strongim bilip bilong ol. Bihain, ol i go daun long ples Kapaneam wantaim Jisas na mama na ol brata bilong em. Dispela ples i stap klostu long Solwara Galili. Jon 2:​1-12.

◆ Dispela marit long Kena i kamap long wanem taim?

◆ I gat wanem as na Jisas i no amamas long tok mama bilong em i mekim?

◆ Jisas i wokim wanem mirakel? Dispela samting i mekim wanem long ol narapela man?