Sapta 20

Namba Tu Mirakel Long Kana

JISAS i mekim bikpela wok bilong autim tok long Judia na bihain em i go bek long as ples bilong em long Galili. Tasol em i no i go bilong kisim malolo. Em i laik mekim bikpela wok moa long dispela hap em i go bikpela long en. Tasol ol disaipel i no wok wantaim em. Ol i go bek long famili bilong ol na long wok bipo ol i bin mekim.

Jisas i kirap autim wanem tok? Olsem: “Kingdom bilong God em i kam klostu pinis. Yupela i mas tanim bel na bilip long gutnius.” Na wanem samting i kamap? Ol Galili i amamas long em. Olgeta i litimapim nem bilong em. Tasol ol i no tingim dispela tok em i autim na ol i mekim olsem. Nogat. Ol i bin i go lukim Pasova long Jerusalem sampela mun bipo, na ol i bin lukim ol mirakel na olgeta samting em i bin mekim.

Jisas i laik mekim bikpela wok long hap bilong Galili na ating em i kirap mekim long ples Kana. Bipo, taim em i lusim Judia i kam long Galili, em i bin go long wanpela kaikai bilong marit long Kana na em i tanim wara i kamap wain. Yu tingim? Nau em i kamap long dispela ples long namba tu taim na pikinini bilong wanpela ofisa bilong King Herot Antipas em i gat bikpela sik. Dispela ofisa i harim tok olsem Jisas i lusim Judia na i kamap long Kana, olsem na em i lusim haus bilong em long Kaperneam na em i go painim Jisas. Ofisa i hevi tru long pikinini bilong em na em i askim Jisas long i go mekim orait dispela pikinini, nogut pikinini i dai.

Jisas i tokim dispela man: ‘Yu go. Pikinini bilong yu bai orait bek!’ Ofisa bilong Herot i bilipim tok bilong Jisas na em i go. Em i go yet na sampela wokboi bilong em ol i painim em long rot, na ol i tokim em pikinini i orait pinis. Olsem na em i askim ol long wanem aua pikinini i orait bek.

Ol i tok: “Asde long 1 klok long apinun.”

Ofisa i save, asde long dispela aua tasol Jisas i bin tokim em, ‘Pikinini bilong yu bai orait bek!’ Olsem na em wantaim olgeta lain bilong em ol i bilip na ol i kamap disaipel bilong Jisas.

Em nau, gutpela samting i bin kamap long Kana. Tupela taim Jisas i wokim mirakel long dispela ples taim em i lusim Judia i kam long Galili. Em i wokim planti narapela mirakel tu, tasol dispela tupela mirakel i makim olsem em i kam bek pinis long Galili.

Nau Jisas i go long Nasaret, em as ples bilong em. Wanem samting bai kamap long Nasaret? Jon 4:​43-54; Mak 1:​14, 15; Luk 4:​14, 15.

▪ Taim Jisas i kamap gen long Galili, ol disaipel i mekim wanem? Na ol Galili i mekim wanem long Jisas?

▪ Jisas i wokim wanem mirakel? Olsem na dispela man wantaim lain bilong em ol i mekim wanem?

▪ Jisas i mekim wanem ol gutpela samting long Kana?