Luksave Long Wok Bilong Krais Insait Long Ol Samting God i Mekim

“TAIM God i stat long wokim ol samting, em i wokim ples antap na graun” na olgeta dispela samting em i wokim “i gutpela tru.” (Stt. 1:1, 31) Jehova i wokim ol man bilong ol i ken stap gut oltaim. Tasol pasin bikhet long Iden i bagarapim gutpela sindaun bilong ol man inap liklik taim. Maski i olsem, samting Jehova i tingting pinis long mekim long graun na long ol man, dispela i no senis. God i kamapim olsem bai i gat rot bilong kisim bek ol tumbuna pikinini bilong Adam i bihainim tok. Wok bilong stretim bek lotu i tru bai kamap, na God bai bagarapim na pinisim Satan na ol wok nogut bilong em. (Stt. 3:15) Olsem na ol samting bai kamap “gutpela” gen. Jehova bai kamapim dispela samting long rot bilong Pikinini bilong em, Jisas Krais. (1 Jon 3:8) Olsem na em i bikpela samting long yumi luksave long wok bilong Krais insait long ol samting God i mekim.—Apo. 4:12; Fili. 2:9, 11.

WOK BILONG KRAIS

² Taim yumi tingim wok bilong Krais insait long ol samting God i mekim, yumi luksave olsem em i gat kain kain wok. Jisas em i Man Bilong Baim Bek ol man, Hetpris, Het bilong kongrigesen Kristen, na nau em i King bilong Kingdom Bilong God. Pasin bilong tingim tingim long bel ol dispela wok i mekim na yumi amamas moa long ol samting God i kamapim na yumi laikim moa yet Krais Jisas. Baibel i stori long ol narapela narapela wok bilong Krais.

³ Taim Krais i stap long graun, ol samting i kamapim klia olsem ol manmeri bai kamap wanbel wantaim God long rot bilong Jisas. (Jon 14:6) Em i Man Bilong Baim Bek ol man, olsem na em i givim em yet olsem pe bilong baim bek planti manmeri. (Mat. 20:28) Olsem na Jisas i no stap tasol olsem gutpela piksa long mekim ol pasin God i laikim. Em i nambawan rot bilong kamapim ol samting Jehova i tingting pinis long mekim long ol manmeri. Long rot bilong em tasol God i ken orait gen long yumi. (Apo. 5:31; 2 Kor. 5:18, 19) Indai bilong Jisas olsem ofa na kirap bek bilong em i bin opim rot long ol man i harim tok ol inap kisim ol blesing taim Kingdom Bilong God long heven i bosim graun.

⁴ Jisas em i Hetpris na em “inap pilim tru ol samting i save traim yumi” na tekewe sin bilong ol disaipel bilong em hia long graun. Aposel Pol i tok: “Hetpris bilong yumi inap pilim tru ol samting i save traim yumi. Olgeta traim i save kamap long yumi, ol i bin kamap long em tu, tasol em i no gat sin.” Pol i strongim ol man husat i bilip long Jisas Krais long mekim ol samting bilong kamap wanbel wantaim God, em i tok: “Olsem na yumi mas i go klostu long sia king bilong God husat i save mekim bikpela pasin helpim long yumi, na yumi mas beten long em na yumi no ken surik long kamapim tingting bilong yumi. Yumi mekim olsem bai em i ken marimari long yumi na mekim bikpela pasin helpim long yumi long taim stret.”—Hib. 4:14-16; 1 Jon 2:2.

⁵ Jisas i stap tu olsem Het bilong kongrigesen Kristen. Olsem ol disaipel bilong em long taim bilong ol aposel, yumi tu long nau i no gat wok long wanpela man bilong graun i bosim yumi. Jisas i stiaim yumi long rot bilong holi spirit, na ol wasman i wok aninit long em, na Jisas na Papa bilong em long heven bai skelim wok bilong ol long lukautim ol sipsip bilong God. (Hib. 13:17; 1 Pita 5:2, 3) Jehova i mekim tok profet long Jisas, olsem: “Lukim! Mi mekim em i kamap olsem wanpela witnes long ol lain manmeri, na olsem wanpela lida na komanda long ol lain manmeri.” (Ais. 55:4) Jisas i kamapim klia truim bilong dispela tok profet taim em i tokim ol disaipel bilong em: “Yupela i no ken larim ol man i kolim yupela lida, long wanem, yupela i gat wanpela Lida tasol, em Krais.”—Mat. 23:10.

⁶ Bilong kamapim klia tingting bilong em na pasin bilong em long amamas long helpim yumi, Jisas i mekim dispela singaut: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela. Karim hap plang bilong mi na kisim skul long mi, long wanem, mi man bilong pasin isi na pasin daun, na yupela bai kisim nupela strong. Hap plang bilong mi i gutpela na samting mi askim yupela long karim i no hevi.” (Mat. 11:28-30) Jisas Krais i bosim kongrigesen Kristen long pasin isi na long rot i save givim nupela strong long yumi, na long dispela rot em i kamapim klia olsem em i “gutpela wasman bilong sipsip” i bihainim pasin bilong Papa bilong em long heven, God Jehova.—Jon 10:11; Ais. 40:11.

⁷ Long namba 1 pas em i raitim long ol Korin, Pol i stori long narapela wok Jisas Krais i mekim: “Em i mas mekim wok king i go inap long God i putim olgeta birua i stap aninit long lek bilong em. Tasol taim olgeta samting i stap aninit pinis long Pikinini, orait Pikinini bai putim em yet aninit long God, em Man husat i putim olgeta samting i stap aninit long Pikinini, na bai God i ken i stap het bilong olgeta samting.” (1 Kor. 15:25, 28) Paslain long Jisas i kam daun long graun, em i mekim wok olsem “saveman bilong wok,” em i namba wan samting God i bin wokim. (Prov. 8:22-31) Taim God i salim Jisas i kam daun long graun, em i mekim laik bilong God long olgeta taim. Em i sanap strong taim bikpela traim tru i painim em na em i stap gut long Papa bilong em i go inap long taim em i dai. (Jon 4:34; 15:10) Jisas i stap gut long God i go inap long em i dai, olsem na God i kirapim em bek na em i go long heven na God i givim em namba bilong stap King long Kingdom bilong heven. (Apo. 2:32-36) Olsem King, Krais Jisas i bin kisim bikpela wok long God long go pas long planti tausen strongpela ensel long rausim wok bos bilong ol man long graun na pinisim olgeta kain pasin nogut. (Prov. 2:21, 22; 2 Tes. 1:6-9; Rev. 19:11-21; 20:1-3) Long dispela taim Kingdom Bilong God long heven em Krais i king bilong en, em wanpela tasol bai bosim dispela graun olgeta.—Rev. 11:15.

LUKSAVE LONG WOK BILONG EM

⁸ Jisas Krais, em Man i stap gutpela piksa bilong yumi ken bihainim pasin bilong em, em i gutpela olgeta. God i makim em bilong lukautim yumi. Olsem na bilong kisim helpim long gutpela pasin laikim bilong em long lukautim yumi, yumi mas i stap gut long Jehova na wok gut wantaim oganaisesen bilong em.

⁹ Ol disaipel bilong Jisas long taim bilong ol aposel i luksave tru long wok God i bin givim long Krais. Ol i soim dispela long rot bilong wanbel long wok wantaim aninit long wok bos bilong Krais, taim ol i larim em i stiaim ol long rot bilong holi spirit. (Apo. 15:12-21) Aposel Pol i toktok long pasin bilong kongrigesen Kristen God i bin makim long wanbel wantaim taim em i tok: “Yumi mas mekim tok tru, na long rot bilong pasin laikim yumi mas kamap olsem man i bikpela pinis long olgeta samting na stap aninit long man husat i stap het, em Krais. Long rot bilong em, bodi olgeta i helpim bodi yet long gro na kamap strong long pasin laikim. Olsem: Olgeta hap bilong bodi i pas wantaim na i mas wok gut wantaim long rot bilong ol join i save mekim gut wok bilong ol. Olgeta wan wan hap bilong bodi i mekim wok bilong ol inap long skel bilong ol.”—Efe. 4:15, 16.

¹⁰ Taim olgeta wan wan bilong kongrigesen i wok gut wantaim ol arapela na olgeta i wanbel long wok aninit long wok bos bilong Krais, kongrigesen bai go bikpela na pasin laikim bai stap, em “nambawan gutpela rot bilong mekim ol man i kamap wanbel.”—Jon 10:16; Kol. 3:14; 1 Kor. 12:14-26.

¹¹ Ol samting i kamap long graun i truim ol tok profet bilong Baibel olsem kirap long 1914, Jisas Krais i bin kisim wok King long Kingdom. Nau em i mekim wok king namel long ol birua bilong em. (Sng. 2:1-12; 110:1, 2) Dispela i makim wanem samting long ol man i stap nau long graun? Klostu nau Jisas bai kamapim klia tru wok bilong em olsem King bilong olgeta king na Bikpela bilong olgeta bikpela, taim em i mekim save long ol birua bilong em. (Rev. 11:15; 12:10; 19:16) Orait tok promis bilong Jehova long kisim bek ol man em i bin mekim taim namba wan man i bikhet, dispela bai kamap tru long ol man em Krais i orait long ol na ol i stap long rait sait bilong em. (Mat. 25:34) Yumi amamas tru long luksave long wok em Krais i holim insait long ol samting God i makim pinis bilong mekim! Yumi laik i stap wanbel wantaim long mekim wok bilong God long olgeta hap aninit long wok bos bilong Krais nau long dispela taim bilong las de.