Lain Brata i Stap Wanbel

INAP olsem 1,500 yia olgeta, lain Israel i bin holim nem bilong God Jehova. Jehova i “kisim wanpela lain em nem bilong em i ken stap long ol.” (Apo. 15:14) Ol manmeri i holim nem bilong Jehova ol i stap witnes bilong em, ol i stap wanbel long tingting na wok, maski ol i stap long wanem hap bilong graun. Bai i gat wanpela lain i holim nem bilong God. Dispela i kamap long wanem ol disaipel bilong Jisas i mekim wok em i bin givim long ol, olsem: “Yupela i mas i go na kamapim ol disaipel long olgeta lain man, na baptaisim ol long nem bilong Papa na bilong Pikinini na bilong holi spirit. Skulim ol long bihainim olgeta samting mi tokim yupela long mekim.”—Mat. 28: 19, 20.

² Taim yu dediketim yu yet long Jehova na kisim baptais, yu kamap wanpela disaipel bilong Jisas Krais. Yu insait long lain brata Kristen i stap wanbel long olgeta hap, maski ol i bilong kain kain kantri, lain, maniman o rabisman, ol i no larim dispela i brukim lain bilong ol. (Sng. 133:1) Olsem na yu laikim tru ol poroman Kristen bilong yu insait long kongrigesen na rispek long ol. Ating sampela bilong ol em ol lain bipo yu no laik bung wantaim ol, long wanem, ol i bilong narapela skin o kantri, o ol i no kisim wankain skul olsem yu. Yumi laikim tru narapela narapela na dispela i pasim yumi strong wantaim, winim olgeta narapela pasin pren i stap namel long ol pren, wanlotu, o famili.—Mak 10:29, 30; Kol. 3:14; 1 Pita 1:22.

STRETIM SAMPELA TINGTING

³ Sapos sampela i hatwok long lusim pasin bilong tingting nogut long man bilong narapela skin, lain politik, ol man i no gat wankain sindaun, o tingting nogut long ol man bilong narapela lain, orait ol i ken tingim ol Juda Kristen bilong bipo, em ol i mas lusim pasin bilong lotu Juda long tingting nogut long ol man bilong ol narapela ples. Taim Jehova i bin tokim Pita long i go long haus bilong Kornilius, em wanpela kepten bilong ami bilong Rom, Jehova i bin redim Pita long mekim dispela wok.—Apo. sap. 10.

⁴ Long wanpela visen, Jehova i tokim Pita long kilim na kaikai sampela animal em ol Juda i no inap kaikai, long wanem, ol i no klin long ai bilong God. Taim Pita i no laik mekim dispela samting, wanpela nek long heven i tokim em: “Ol samting God i mekim i kamap klin pinis, yu no ken tok ol i doti.” (Apo. 10:15) God i mas mekim dispela samting na bai Pita i ken stretim tingting bilong em long wok God i laik givim em, olsem em i mas go lukim wanpela man i no bilong lain Juda. Pita i bihainim tok bilong Jehova, em i tokim ol man i bung: “Yupela i save olsem i tambu tru long wanpela Juda i go klostu o toktok wantaim wanpela man bilong narapela lain, tasol God i soim mi olsem mi no ken tok long wanpela man olsem em i doti o em i no klin. Olsem na mi kam taim yupela i singautim mi, na mi no sakim tok.” (Apo. 10:28, 29) Bihain, Pita i lukim ol samting i kamapim klia olsem Jehova i orait long Kornilius na ol wanhaus bilong em.

⁵ Sol bilong Tarsus, em i wanpela Farisi i bin winim bikpela skul, em i mas daunim em yet na bung wantaim ol man nating em bipo em i no inap bung wantaim ol. Em i mas bihainim tok bilong ol tu. (Apo. 4:13; Gal. 1:13-20; Fili. 3:4-11) Yumi ken tingim olsem sampela i bin stretim tingting bilong ol, kain olsem Sergius Paulus, Dionisius, Damaris, Filemon, Onesimus, na ol arapela taim ol i harim gutnius na kamap disaipel bilong Jisas Krais.—Apo. 13:6-12; 17:22, 33, 34; File. 8-20.

YUMI STAP WANBEL WANTAIM OL BRATA LONG OLGETA HAP

⁶ Pasin laikim bilong ol brata na sista long kongrigesen i helpim yu long i go klostu long Jehova na oganaisesen bilong em. Yu luksave long mak bilong ol disaipel tru bilong Jisas Krais, olsem em yet i tok: “Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela. Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:34, 35) Yu amamas moa yet long Jehova na oganaisesen bilong em taim yu luksave olsem pasin laikim insait long kongrigesen i olsem piksa bilong bikpela pasin laikim i stap namel long lain bilong Jehova long olgeta hap. Yu lukim truim bilong tok profet bilong Baibel i tok long taim bilong las de Jehova bai bungim ol man long lotuim em long bel isi na pasin wanbel.—Mai. 4:1-5.

⁷ Long nau i gat planti samting i save brukim ol lain, olsem na planti man i no ting bai i gat wanpela lain manmeri bilong “olgeta kantri na olgeta traib na olgeta lain pipol na olgeta tokples” inap stap wanbel. (Rev. 7:9) Skelim ol pasin i stap namel long ol manmeri bilong ol kantri i gat planti saveman na kain kain teknoloji samting na ol lain i save bihainim yet ol pasin tumbuna. Tingim ol lain man bilong wankain skin na kantri em ol i pait long ol samting bilong lotu. Planti man moa i litimapim kantri bilong ol, olsem na ol lain man i bruk long ol samting bilong wok politik, winim bilong bipo. Ol man i no wankain, sampela i stap rabis na sampela i maniman, na i gat ol narapela samting tu i mekim na ol i no stap wanbel. Taim yu tingim dispela na skelim wantaim wanpela lain we ol i bilong olgeta kantri, tokples, lain, na sindaun, we ol inap stap wanbel na narapela i laikim tru narapela, em i olsem wanpela mirakel em God i Gat Olgeta Strong tasol inap mekim.—Sek. 4:6.

⁸ Tasol kain pasin wanbel i stap tru, na taim yu kamap wanpela Witnes Bilong Jehova i dediket na baptais pinis, yu insait long en. Dispela pasin wanbel i helpim yu olsem na yu gat wok long lukautim. Yu ken mekim olsem taim yu bihainim tok bilong aposel Pol i stap long Galesia 6:10, em i tok: “Taim rot i op yet, yumi mas mekim gutpela pasin long olgeta man, tasol moa yet long ol wanbilip.” Na tu, yumi bihainim dispela tok: “Yupela i no ken kros o hambak. Nogat. Yupela i mas daunim yupela yet na tingim olsem ol arapela i winim yupela. Yupela i no ken tingim laik bilong yupela yet tasol, nogat, yupela i mas tingim tu laik bilong ol arapela.” (Fili. 2:3, 4) Taim yumi lainim yumi yet long tingim ol brata na ol sista bilong yumi olsem Jehova i save tingim ol na yumi no tingim tasol pasin bilong ol, bai yumi stap amamas na wanbel wantaim ol.—Efe. 4:23, 24.

NARAPELA I TINGIM NARAPELA

⁹ Olsem aposel Pol i kamapim klia, ol bratasista bilong kongrigesen ol i no bruk nabaut, ol i tingim tru narapela narapela. (1 Kor. 12:14-26) Yumi stap longwe long sampela bratasista, em ol i insait long bikpela lain brata i stap long olgeta hap, tasol yumi save tingim tru sindaun bilong ol. Sapos ol man i birua long sampela brata bilong yumi, yumi ol arapela i save bel hevi tru long dispela. Na sapos sampela i sot long ol samting, bikpela bagarap, woa, o pait insait long kantri i bagarapim sindaun bilong ol, yumi ol arapela i wok strong long painim rot bilong helpim ol long ol samting bilong lotu na long skin tu.—2 Kor. 1:8-11.

¹⁰ Long olgeta de yumi olgeta i mas beten askim God long helpim ol brata bilong yumi. Ol traim i painim sampela brata na i laik pulim ol long mekim pasin nogut. Ating yumi save long ol hevi i save painim sampela brata bilong yumi. Sampela i save kisim ol hevi long ol wanwok bilong ol, na long famili i no wanbel long lotu, na yumi no save long ol dispela hevi. (Mat. 10:35, 36; 1 Tes. 2:14) Yumi save tingim dispela, long wanem, yumi wanpela lain brata i stap long olgeta hap. (1 Pita 5:9) Namel long yumi, i gat ol brata i save wok strong long mekim wok bilong Jehova, ol i go pas long wok autim tok na lukautim ol kongrigesen. Na tu, i gat ol brata i save lukautim wok bilong ol Witnes long olgeta hap. Yumi mas beten askim God long helpim olgeta dispela brata, long dispela rot yumi soim olsem yumi tingim na laikim ol tru, maski i no gat narapela samting yumi inap mekim bilong helpim ol.—Efe. 1:16; 1 Tes. 1:2, 3; 5:25.

¹¹ Long dispela taim bilong las de planti hevi i save kamap, olsem na lain bilong Jehova i mas redi long helpim ol wanlotu bilong ol. Sampela taim ol bikpela disasta olsem ol guria na bikpela tait wara i kamap, olsem na i gat bikpela wok long bungim planti kaikai na klos samting na salim long ol brata em hevi i painim ol. Ol Kristen long taim bilong ol aposel i stap gutpela piksa long dispela samting. Ol disaipel long Antiok i tingim tok bilong Jisas na ol i amamas long salim kaikai samting long ol brata i stap long Judia. (Apo. 11:27-30; 20:35) Aposel Pol i stretim wok bilong bungim na salim ol samting i go na bai ol i tilim long pasin i stret. (2 Kor. 9:1-15) Long nau, taim bagarap i painim ol brata na ol i sot long ol samting bilong skin, oganaisesen na ol Kristen i save kirap kwiktaim na givim ol samting.

STAP NARAPELA KAIN BILONG MEKIM LAIK BILONG JEHOVA

¹² Lain brata bilong yumi i stap long olgeta hap i stap wanbel long mekim laik bilong Jehova. Long nau, em laik bilong Jehova long yumi autim gutnius bilong Kingdom long olgeta hap na bai olgeta lain man i ken harim. (Mat. 24:14) Taim yumi mekim dispela wok, Jehova i laik bai oltaim yumi mas bihainim ol stretpela pasin bilong em. (1 Pita 1:14-16) Yumi mas amamas long stap aninit long ol narapela na helpim wok bilong autim gutnius i go bikpela. (Efe. 5:21) Yumi no ken tingting long bihainim laik bilong yumi yet, nau em taim bilong putim Kingdom Bilong God i stap nambawan samting long laip bilong yumi, winim olgeta taim bipo. (Mat. 6:33) Taim yumi tingim dispela na wok wanbel wantaim long autim gutnius, yumi kisim amamas long nau na yumi bai kisim ol gutpela samting inap oltaim oltaim.

¹³ Yumi ol Witnes Bilong Jehova i narapela kain tru, yumi no wankain olsem ol man bilong graun, yumi stap klin na yumi strong long mekim wok bilong God bilong yumi. (Tai. 2:14) Yumi lotuim Jehova na dispela i mekim yumi stap narapela kain. Yumi save wok gut wantaim ol brata bilong yumi long olgeta hap na yumi mekim wankain tokples tasol, em tok i tru, na yumi mekim ol pasin i stret wantaim dispela tok i tru yumi save autim. Jehova i bin tok profet long dispela long rot bilong profet bilong em Sefanaia, em i tok: “Bai mi senisim tokples bilong ol manmeri na ol bai mekim wanpela gutpela tokples tru, na bai olgeta i singaut long nem bilong Jehova, na wanbel wantaim long mekim wok bilong em.”—Sef. 3:9.

¹⁴ Jehova i kirapim Sefanaia long tok profet long dispela lain brata i stap tru long nau, em i tok: “Liklik hap lain bilong Israel i stap yet, ol bai i no inap mekim pasin i no stret; ol i no inap mekim tok giaman o yusim maus bilong ol long giamanim ol man; ol bai kaikai na slip, na i no gat wanpela bai mekim ol i pret.” (Sef. 3:13) Yumi kisim save pinis long tok i tru bilong Baibel, na yumi senisim pasin bilong yumi na bihainim ol lo bilong Jehova, na nau yumi inap wanbel wantaim long mekim wok. Yumi mekim samting em ol man bilong graun i ting ol i no inap mekim. Tru tumas, yumi narapela kain lain, em lain bilong God, na yumi litimapim nem bilong em long olgeta hap.—Mai. 2:12.