Meri Long Hulwara

Bihain long Pasova, Jisas na ol disaipel i go long Samaria bilong i go bek long Galili. Klostu long taun Sikar, Jisas i stop long wanpela ples ol i kolim hulwara bilong Jekop. Em i malolo long dispela hap, na ol disaipel i go long taun long baim kaikai.

Wanpela meri i kam long hulwara bilong kisim wara. Jisas i tokim em: “Givim sampela wara long mi long dring.” Meri i tok: ‘Wai na yu toktok long mi? Mi wanpela meri Samaria. Ol Juda i no save toktok long ol Samaria.’ Jisas i tokim em: ‘Sapos yu save mi husat, bai yu askim mi long wara na bai mi givim yu wara i gat laip.’ Meri i tok: ‘Wanem mining bilong tok bilong yu? Yu no gat baket.’ Jisas i tok: ‘Man i dring dispela wara mi givim, nek bilong em bai i no inap drai gen.’ Meri i tok: “Bikman, givim dispela wara long mi.”

Na Jisas i tokim em: ‘Go singautim man bilong yu i kam long hulwara.’ Meri i tok: ‘Mi no gat man.’ Jisas i tok: ‘Yu tok tru. Yu bin marit 5-pela taim, na man nau yu stap wantaim, em i no man tru bilong yu.’ Meri i tok: ‘Mi luksave yu wanpela profet. Lain bilong mi i bilip olsem mipela i ken lotuim God long dispela maunten, tasol ol Juda i tok mipela i ken lotu long Jerusalem tasol. Mi bilip olsem taim Mesaia i kam, em bai skulim mipela hau long mekim lotu.’ Bihain Jisas i tokim em long samting em i no bin tokim ol narapela: ‘Mi dispela Mesaia.’

Meri i hariap i go long taun bilong em na tokim ol Samaria: ‘Ating mi painim pinis Mesaia. Em i save long olgeta samting mi mekim. Kam na lukim!’ Ol i bihainim em i go bek long hulwara na harim tok Jisas i skulim ol.

Ol Samaria i invaitim Jisas long stap long taun bilong ol. Inap 2-pela de, em i skulim ol manmeri long dispela hap, na planti manmeri i bilip long em. Ol i tokim meri Samaria: ‘Taim mipela i harim tok bilong dispela man, mipela i save olsem em dispela man bilong kisim bek ol manmeri bilong graun.’